Etatelu 24
24
Wambosonwela Isaka Wadi
1Abarahama akayala usumbi a lukusumbi. Latuyalaka akatshokola Abarahama lu akambu andi tshe. 2Abarahama aketi olombodi wʼekambi andi, lakalamaka diango diandi tshe. Ndi akawutela ati: Dimi lambukosengasenga nti: Ukitsha lunya laye lʼesi ehelohelo kami, 3keli nkutshibia le Latuyalaka, Unyashungu a lʼulungu, ndu a la kete, diaha we mbosela onʼami wadi uma lʼatei ana amantu wʼasi Kanana wako wudjashimi lʼatei awo. 4Keli kutshu lu wudja asu, lu kete yakamuto, dia ntosonwela onʼami Isaka wadi leko. 5Ku ukambi andi akûkaluya diui ati: Ku naka umuntu halangi ndja la mi uya lu kete nye, kayumutsha na? Dieli la mi dia ntola onʼaye pulu lu kete yakayuto? 6Ku Abarahama akawutela ati: Ewo, totolaki onʼami leko. 7Latuyalaka, Unyashungu a lʼulungu, lakantundja uma lu luudu la papa ndu uma lu kete yakamuto, akasawula la mi. Ndi akandaki ati: Dimi layusha tukanula taye kete nye. Ndi ndame ayutuma ondjelo andi la ntundu kaye. Ku we ayutosela onʼami wadi uma leko. 8Keli naka umuntu halangi ndja la ye, we ayutshungo uma lu etshibelu kene kamumukutshibia. Dikambu otoi, totolaki onʼami leko. 9Ku ukambi ako akakitsha lunya landi lʼesi ehelohelo ka khumendi Abarahama. Ndi akulaki dia namaka akambu ako.
10Ukambi andi akose kamelo dikumi uma lʼatei a limba la khumendi, ne dia diango tshe dia khumendi diaki lu anya andi. Ndi akunela, akatshu utsha la Mesopotamiya pulu ndu lʼusumba wa Nahora. 11Ndi akakhusamia kamelo lʼandja wʼusumba dia yo mumuya lasuki lʼeteko kʼashi. Etena kako kaki ushidi wa dikolo watutshokaka amantu la ntuduwula ashi. 12Ku ndi akati ati: Latuyalaka, Unyashungu a khumemi Abarahama, dimi lambukosengasenga nti: Uki khumemi Abarahama ketshi. Umpumuya lukulu lʼolo, dia dimi mpumana la kene kalangami elo. 13Dimʼone ambemala lʼumamu wʼeteko kʼashi, ku ana amantu wʼasi sumba aso wayayi la ndjuduwula ashi. 14Ku usekaseka a umuntu tshe layumolomba nti: Enge mbaka keli no ashi; ku ndi ayunkaluya diui ati: Noka; dimi layusha ndu kamelo yaye ashi a no. Oso kayuyala one lakayasonwela ukambi aye Isaka. Uma lu dikambu so mbayumulimbitela nti: We mbukaka khumemi ketshi. 15Kamʼakandateketaka, enyi ku Rebeka one ayayi la mbaka kandi lu diheka. Rebeka akuto le Betuele, onʼa Milika, wadi a Nahora, onangu Abarahama. 16Ona umuntu ako aki dimena diahangone, ndu ateyana la pami. Ndi akahulo utsha lʼeteko, akaludia mbaka kandi, akawandi uma lʼeteko. 17Ku ukambi wʼAbarahama akalawo utsha le ndi; akalombe ati: Umbisha tema tʼashi uma lu mbaka kaye no. 18Ku ndi akûkaluya diui ati: Khumemi, yaka, yono. Ku ndi akahuluya mbaka esadi lu lunya dia mbusha ashi wa no. 19Lamʼakashili Rebeka mbusha ashi, ndi akati ati: Dimi layuduwela ndu kamelo yaye ashi edja ndu yo yambunduya pusa. 20Ndi akasamanya, akangula ashi lu luteti, akalawo ntu utsha lʼeteko la ntuduwula ashi wa nosha kameio yandi tshe. 21Ukambi ako akawendaka amba, aha diui baku, dia mbeya kana Latuyalaka ambuhumuya lukulu lʼolo, kana kema. 22Lamʼakashili kamelo no ashi, ukambi wʼAbarahama akatundja lohete la etenyi otoi ka hendi ka shekele ya paunyi, ekoma ehendi wʼanya la shekele dikumi ya paunyi. 23Ndi akawumbula ati: Onʼa na eye? Kema dihuli dia shu mbetama lu luudu la sho? 24Ndi akûkaluya diui ati: Dimi onʼa Betuele, lakuto le Milika la Nahora. 25Ndi akawutela ntu ati: Adiyu efula weko lakasu wa dungalunga nde la mbetama, ndu dihuli dia nyu mbetama dieko. 26Pami kako akakolama, akatemola Latuyalaka. 27Ndi akati ati: Unyashungu a khumemi Abarahama atumbwami! Ndi ataheko menya khumemi ketshi la kolamelu. Latuyalaka akanombola, ndu dime, lu mbuka pulu lu luudu lʼanangu khumemi.
28Usekaseka ako akalawo esadi, akatusanyia wa lu luudu la nyangu akambu ako. 29Rebeka aki la onangu la pami, lukumbu landi Labana. Ku Labana akatumbi la luwangu la ntulungula pami kako kaki lasuki lʼeteko. 30Lamʼakenyi onangu lohete la ekoma lu anya wa kadiyendi, ndu lamʼakanduki aui wa kadiyendi Rebeka ati: Osoku mbakandamvutedi, ndi akakumi le pami kako. Ndi akutani emadi lasuki lʼeteko la le kamelo yandi. 31Ndi akawutela ati: Uyi, we otshokwami wa Latuyalaka. Ukundi wemalaye lʼandja na? Dimi lakakolongoswedi luudu ndu ukutu wa kamelo yaye. 32Vo wakakumi la luudu. Ku Labana akakelekula diango diaki ladiku dia kamelo; akasha kamelo adiyu wa yo nde ndu wa yo mbetama. Ndi akela ukambi wʼAbarahama la antu wakayi la ndi ashi wa vo nsula ekulu. 33Wakawela ma. Keli ndi akati ati: Dimi hali la ntundu latati dikambu diakamayi. Labana akawutela ati: Uditaka. 34Ku ndi akati ati: Ukambi wʼAbarahama mbemi. 35Latuyalaka akatshokola khumemi utamanya, ku ndi akayala untu a wuki. Ndi akawusha ekoko la ngombe, fesa la paunyi, ekambi wʼapami la ekambi wʼamantu, ndu kamelo la punda. 36Sara, wadi a khumemi, akawutela ona pami lu nshi yandi yʼusumbi. Ku khumemi akasha ona ako tshe keli la ndi. 37Khumemi akantshibia ati: Toselaki onʼami wadi uma lʼatei wa ana amantu wʼasi Kanana, akanga a kete yudjashimi. 38Keli kutshu lu luudu la papa, lʼatei a khumbu kasu, dia ntosela onʼami wadi leko. 39Ku dimi lakambula khumemi nti: Naka umuntu halangi ndja la mi, ku ukundi? 40Ku ndi akankaluya diui ati: Latuyalaka, latumokendakendaka la ntundu kandi, ayutuma ondjelo andi kame la ye dia nkuhumuya lukulu lʼolo lu lokendo laye. Ku we ayutosela onʼami wadi uma lʼatei a khumbu kasu, uma lu luudu la papa. 41Lamʼayuyukuma lʼatei a khumbu kasu, naka vo hawukushandi, ku we ayutshungo uma lu etshibelu kamumukutshibia. 42Lamʼakamakumi elo lʼeteko, dimi lakalombi nti: Latuyalaka, Unyashungu a khumemi Abarahama, naka we ambuluwanya lokendo latamatshu lone, 43dimʼone ambemala lʼeteko kʼashi. Layolomba usekaseka a umuntu layuya dia ndjuduwula ashi nti: Umbisha tema tʼashi uma lu mbaka kaye keli no. 44Naka ndi ayunkaluya diui ati: Yaka, yono; dimi layutuduwela ndu kamelo yaye ashi akina, ku umuntu oso kayuyala wadi lakasonwela Latuyalaka onʼa khumemi. 45Kamʼakamateketaka lʼutema, menyi ku Rebeka one ambutumba la mbaka kandi lu diheka. Ndi akahulwi lʼeteko, akaduwudi ashi. Dimi lakolombi nti: Umbisha ashi wa no. 46Ndi akahulusha mbaka esadi uma lu diheka diandi, akamvutedi ati: Noka; dimi layutuduwela kamelo yaye ashi akina. Okone dimi lakanwe. Ndi akasha ndu kamelo ashi a no. 47Ku dimi lakawumbudi nti: Onʼa na eye? Ku ndi akatshi ati: Onʼa Betuele kemi, lakuti Milika la Nahora. Ku dimi lakawudji shingu lʼohembe la ekoma lʼanya. 48Dimi lakakolami la ntundu ka latuyalaka, lakatumbudi Latuyalaka, Unyashungu a khumemi Abarahama, lakanombola ololo dia dimi ndjosela Isaka, ona umuntu lakuti onangu khumemi, wadi. 49Nyumvuteli naka nyu nyayulanga ntshela khumemi la kenemo ndu la kolamelu. Naka hanyulangi, nyumvuteli, dimi kankadimo lu lunya la lomoso kana lu lunya la pami.
50Labana la Betuele wakûkaluya diui vati: Latuyalaka kutungi dikambu ne. Okone shu hateyi kutela diui dia kolo kana diʼololo. 51Enda, Rebeka one eko la ntundu kaye. Uwose, utshu la ndi; katuyali wadi a khumeye, uku akati Latuyalaka. 52Lamʼakuki ukambi wʼAbarahama aui awo, ndi akakhusamela Latuyalaka. 53Ku ndi akatundja dengalenga dia fesa, dengalenga dia paunyi, la ahondo, akasha Rebeka. Ndi akasha ndu onangu ndu nyangu eshasha wʼushinga a wulu. 54Lʼokongo diku, ndi la wane waki la ndi wakali, wakano, waketama. Lamʼakaweto la pindju, ukambi wʼAbarahama akati ati: Nyunkimo nkaluli le khumemi. 55Onangu Rebeka la nyangu wakati vati: Ona umuntu one atukutshikala la su nshi motshi, kuyanga nshi dikumi. Lʼokongo diku kutshu la ndi. 56Ndi akakaluya diui ati: Tanyuntshimbiatshimbiaki, ne dia Latuyalaka akaluwanya lokendo lami. Nyunkimo nkaluli le khumemi. 57Wakukaiuya diui vati: Teti ona umuntu, tuyuwumbuli. 58Ku vo waketi Rebeka, wakawumbula vati: We nangaka ntsho la pami kene? Ndi akakaluya diui ati: Dimi layutsho. 59Vo wakakimo kadiyewo Rebeka la yaya yandi, dia ndi ntsho la ukambi wa Abarahama la antu andi. 60Ku vo wakatshokola Rebeka; wakawutela vati: We kadiyesu, kuyali lotshetshe la nunu diʼantu diaheyama mbala. Tukanula taye kawuleli asuku wa wedja wʼantunyi awo.
61Rebeka akunela ndi la ekambi andi wʼamantu, wakahema lu kamelo, wakayeli ukambi wʼAbarahama. Okone ukambi ako akose Rebeka, akatshu la ndi. 62Laso ku Isaka akayayakaka lu mbuka kʼuma la Bere-Lahai-Roi, ne dia ndi akadjashi lu leke la diku dia kushi la kete sho. 63Dikolo dimotshi, lamʼakatshu Isaka lʼekambo la ntotemola Unyashungu, ndi akedia ashu, enyi ku kamelo nye yayayi. 64Ndu Rebeka akedia ashu, akenyi Isaka. Ndi akakiti uma lu kamelo kandi. 65Ndi akambula ukambi wʼAbarahama ati: Pami kakona keku kayayi lʼekambo la ndjuhumana la su? Ku ukambi ako akawutela ati: Khumemi uku. Rebeka akose dihondo, akayakumbi lʼote. 66Ku ukambi akasanyia Isaka akambu tshe wakandatshi. 67Isaka akatshu la Rebeka, akatoto la ndi lu luudu la dipema laki Sara nyangu. Rebeka akayala wadendi. Isaka akawukaka ngandji. Okone Isaka akasambama lʼokongo a nyoi ka nyangu.
Currently Selected:
Etatelu 24: TLL
Highlight
Share
Copy
Want to have your highlights saved across all your devices? Sign up or sign in
La Bible en Otetela © Allianee Biblique de la Republique Democratique du Congo, 1991
