Etatelu 17

Ahemelu kʼUhekeli Eli Djimbitelu ya Daka

1Lamʼaki Abarama la deku akumi divwa la divwa, Latuyalaka akene le ndi, akawutela ati: Dimi leli Unyashungu, Kanga-Wulu-Tshe. Okendakendaki ololo la ntundu kami, ndu uyali ololo tshe. 2Dimi layushikike daka diami lʼasami la ye. Layufudia tukanula taye otekoya. 3Abarama akakhusama la ntundu ka Unyashungu. Ku Unyashungu akawutela ati: 4Enda, dimi lambukulaka daka diami ne nti: We ayuyala lotshetshe la wedja efula. 5Dimi lambukete lotshetshe la wedja efula.#17:5 Rom. 4:17. Okone untu taketaki ntu ati: Abarama. Keli lukumbu laye layali Abarahama (kitshimudi atil lotshetshe la wedja efula). 6Dimi layukete kanga diwutshi otekoya. Layutunga wedja efula uma le ye. Khumi ya dikanga efula yayutumba uma le ye. 7Dimi layushikike daka diami lʼasami la ye ndu lʼasami la tukanula taye tayuto lʼokongo aye. Dio diayuyala le lolonga la lolonga. Daka ne diayuyala daka dia pundju#17:7 Luk. 1:55. le ye ndu le tukanula taye, dia dimi ndjala Unyashungu aye ndu a tukanula taye. 8Kete yudjashiye ongendangenda mbayumunyusha, we la tukanula taye ta nonga la nonga. Kete tshe yʼasi Kanana yayuyala yanyu, we la tukanula taye pundju,#17:8 Etsh. 7:5. Osoku dimi layuyalaka Unyashungu awo pundju.

9Unyashungu akatela Abarahama ati: Nyulamaki daka diami, we la tukanula taye ta lolonga la lolonga. 10Lamʼayutoka ona pami lʼatei anyu, kanyuwahemiaki uhekeli. Oso eli olembe wa daka diayunyulamaka, we la tukanula taye.#17:10 Etsh. 7:8; Rom. 4:11. 11Kanyahemaki uhekeli. Oso ayuyala djimbitelu ya daka diasami la nyu. 12Kanyahemiaki ona pami tshe layutoka lʼatei anyu uhekeli lamʼayundukuka nshi enanei. Etshelu kene kayuyalaka le ana tshe wa lolonga la lolonga, kuyanga le ona layunyukundja uma le untu lahuto la nyu. 13Le ona lambuto lu luudu lanyu kana le ona lambunyusumba la falanga, dieli la nyu dia mbahemia uhekeli. Ku djimbitelu ya daka diami yayutshikala pundju lu alimba anyu. 14Usika pami tshe lahahema uhekeli ayutshanyema uma lu wudja andi, ne dia ndi ambudiaka olembe wa daka diami. 15Unyashungu akatela Abarahama ati: Tetaki wadeye ntu wati: Sarai, ne dia umaka kakiane lukumbu landi layuyala Sara (kitshimudi ati: Umuntu la nemo). 16Dimi layotshokola, ku ndi ayukutela ona pami, Ee, dimi layotshokola, la ndi ayuyala lotshetshe la wedja efula. Ku khumi ya dikanga ya wedia efula yayutumba uma le ndi. 17Abarahama akako ekhukhumadi; akole ata lʼutema ati: Untu laya la deku lukama mbeyaka mbuta ona? Ndu Sara laya la deku akumi divwa, mbeyaka mbuta ona uka? 18Ku Abarahama akasengasenga Unyashungu ati: Unyashungu li, Ishamele akendakendaki ololo la ntundu kaye! 19Unyashungu akûkaluya diui ati: Mete mete wadeye Sara kayukutela ona pami, kuwole wati: Isaka (kitshimudi ati: Tola). Okone dimi layushikike daka diami le ndi ndu le tukanula tandi pundju. 20Lu dikambu dia Ishamele dimi lakakukela. Dimi layotshokola, layuwete kanga diwutshi, layfifudia otekoya. Ndi ayuta ewandji dikumi la ehendi. Ndu layutunga wudja a wuki uma le ndi. 21Keli dimi layushikike daka diami le Isaka, ona layukutela Sara, lʼetena uku kene lʼeleku kʼuyuyu.

22Lamʼakawashidiya nsawula, Unyashungu akatshiki Abarahama, akambela utsha lʼulungu. 23Ku Abarahama aketi apami tshe wa lu luudu landi, onʼandi Ishamele la ana wʼekambi andi tshe wakuto lu luudu landi, ndu wane tshe wakandasumbi lusumba. Ku lushi lako ndi akawahemia uhekeli vo tshe, uku akawutela Unyashungu. 24Ndu Abarahama ndame akayahema uhekeli lamakindi la deku akumi divwa la divwa. 25Laso ku ndu Ishamele akayahema uhekeli lamʼakindi la deku dikumi la satu. 26Okone Abarahama la onʼandi Ishamele wakahema uhekeli lushi lame. 27Ndu apami tshe wa lu luudu landi, wane wakuto lu luudu landi ndu wane wakandasumbi lusumba uma lu kete kina, wakahema uhekeli kame la ndi.

Currently Selected:

Etatelu 17: TLL

Highlight

Copy