Etatelu 16

Hangara la Ishamele

1Sarai, wadi a Abarama, kumbuta la ndi nduku ona. Keli ndi aki la ukambi a umuntu, usi Edjibitu, lakawetaka vati: Hangara. 2Ku Sarai akatela Abarama ati: We henyi, Latuyalaka akambete ekumba. Dimi lambukosengasenga nti: Osa ukambi ami wadi, kana ndi ambutelaka ana. Osoku Abarama aketawo diui dia Sarai. 3Lʼokongo a deku dikumi diʼedjaselu kʼAbarama lukete ya Kanana, wadendi Sarai akawusha Hangara, ukambi andi wʼusi Edjibitu, dia ndi ndjala wadendi. 4Ndi akadjase la Hangara, ku Hangara akatshu diemi. Lamʼakandenyi ati: Laya diemi, ndi akatatela monyola khumendi. 5Ku Sarai akatela Abarama ati: Lotengo lako lone layali le ye. Dimi lakakusha ukambi ami. Ku lamʼambundena ati: Laya ia diemi, ndi ambutatela monyolami. Latuyalaka, ayali usambudi lʼasami la ye! 6Ku Abarama akûkaluya diui ati: Ukambi aye one. Ndi eki lu anya aye, utsheli uku alangaye. Uma laso Sarai akatatela mbutshela la ngala, ku Hangara akulawo etali.

7Ondjelo wa Latuyalaka akutani lʼumamu wʼeteko kʼashi kaki lʼatei wʼusui wa shenga. Eteko kako kaki lu mbuka kʼutsha la Shura. 8Ku ondjelo akawumbula ati: Hangara, ukambi wa Sarai, uma lendi ayayayi? ndu utsha lendi atayatshu? Ku Hangara akûkaluya diui ati: Khumemi Sarai, katamalawo. 9Ku ondjelo wa Latuyalaka akawutela ati: Ukaluli utsha le khumeye. Utuyakitshakitsha la ntundu kandi. 10Ondjelo wa Latuyalaka akawutela ntu ati: Dimi layufudia tukanula taye. To tayuyala efula kaheyama mbala. 11Ku ondjelo wa Latuyalaka akawutela ati: Enda, we ay a la diemi. We ayuta ona pami; kuwole wati: Ishamele (kitshimudi ati Unyashungu ambuka), ne dia Latuyalaka akenyi shoko yaye. 12Onʼaye ayuyala uku ndjati kuhumwi. Lunya landi layolosha antu ta. Ku anya wʼantu wayoloshanya la ndi. 13Hangara akole Latuyalaka lakateketaka la ndi lukumbu ati: Unyashungu Latomenaka. Ndi akati ati: Ndi ambushila menami, ukundi eyami mbena dimi na? 14Uma lu dikambu diako mbakaweti eteko kako vati: Bere-Lahai-Roi (kitshimudi ati: Eteko ka Leli la Lumu Latomenaka). To keko lasa Kadeshe la Berede.

15Hangara akutela Abarama ona pami,#16:15 Ngal. 4:22. ku Abarama akole ona ako lukumbu ati: Ishamele. 16Abarama aki la deku akumi enanei la samalu lamʼakanduti la Hangara Ishamele.

Currently Selected:

Etatelu 16: TLL

Highlight

Copy