Etatelu 15

Unyashungu Ambulaka Abarama Ona

1Lʼokongo wʼakambu aso, Latuyalaka akene le Abarama lu do. Ndi akawutela ati: Abarama, tukaki woma; dimi leli engawu kaye. Difutu diaye diayuyala wuki efula. 2Ku Abarama akûkaluya diui ati: Khumadiondjo Latuyalaka li, kayuyumbisha na? Dimʼone utatshu aha la ona. Eliyezere, usi Damaseke, kayuyala ukito a luudu lami. 3Ku Abarama akati ntu ati: Enda, we atambisha nduku ona. Okone onʼa ukambi ami, one lakuto lu luudu lami, kayuyala ukito ami. 4Ku diui dia Latuyalaka diakayi le ndi ati: Untu one huyala ukito aye, keli one layuyuta weme kayukukita. 5Lʼokongo a laso ndi akolombola lʼandja; akawutela ati: Alela lʼulungu, ali toto, naka we mbeyaka ntala. Ku ndi akawutela ntu ati: Ukuku mbayuyala tukanula taye.#15:5 Rom. 4:18; Heb. 11:12 6Ndi aketawo Latuyalaka lʼutema tshe. Okone Latuyalaka akawalela mbetawo kandi lu dihuli diʼololo andi.#15:6 Rom. 4:3; Ngal. 3:6; lak. 2:23. 7Ku ndi akawutela ati: Dimi leli Latuyalaka lakakolombola uma la Ura ka la Kaladiya dia ndjukusha kete nye. 8Ku Abarama akati ati: We Khumadiondjo, Latuyalaka, ukundi ayumulimbitela nti: Dimi kayuyala kangayo? 9Ku Latuyalaka akawutela ati: Osa osongo a ngombe weki deku satu, mbudi ka wadi keki deku satu, ndu okoko wʼumi weki deku satu, ndu yembi la yana yʼenga. 10Ku Abarama akayiose tshe, akayati kʼatei atei, akedianyia betshi diayo pendi pendi. Keli ndi kumbata fudu. 11Fudu yatolekaka emunyi yakahatula edu ayo; ku Abarama akayitshanya.

12Lamʼakadji unya, Abarama akalali djo ya wulu. Udjima a tshududu akuhutamela, ku ndi akuki woma efula. 13Latuyalaka akatela Abarama ati: Eyi wati: Tukanula taye wayuyala angendangenda lu kete ya kana. Leko vo wayutukambela akina ulimu, ku akanga a kete yako wayasuyaka deku kama nyei.#15:13 Etum. 1:1-14; Etsh. 7:6. 14Keli dimi layulumbuya wudja ako wayuwutukambela ulimu. Lʼokongo diku vo wayumo uma leko la ekundji efula.#15:14 Etum. 12:40-41; Etsh. 7:7. 15Keli we ayutayadi usumbi a lukusumbi ntundu we atakhundama Ku we ayutsho la lutui tshitshi utsha lʼudimu a pengandu. 16Ku lu lolonga la nei, vo wayukalula lindu, ne dia kolo kʼasi Amora katakumela. 17Lamʼakadji unya, udjima a tshududu akayala. Difuku diakaluli too la dinga, la nyumbi ya dja yaki lu ndjikita lʼasa nyama yakawakahanya. 18Lushi lako Latuyalaka akakimo daka le Abarama ati: Dimi lambusha tukanula taye kete nye#15:18 Etsh. 7:5. uma lu ndjali ka Edjibitu edja ndu lu ndjali ka wuki, ndjali kʼEyufarate: 19kete yʼasi Kena, y asi Kenizi, yʼasi Kademona, 20yʼasi Hiti, yʼasi Perizi, yʼasi Refa, 21yʼasi Amora, yʼasi Kanana, yʼasi Ngiringashe, ndu yʼasi Jebuse.

Currently Selected:

Etatelu 15: TLL

Highlight

Copy