Etatelu 18

Abaranama Ambuka Daka diʼEutwelu ka Isaka

1Lamʼakawale yanyi wulu, Abarahama akadjase la suku dia luudu landi la dipema. Ku Latuyalaka akene le ndi lʼatei wʼelamba wʼelungu wa Mamare. 2Abarahama akedia ashu, enyi ku apami asatu ane wemadi tshalula la ntundu kandi.#18:2 Heb. 13:2. Lamʼakandawaenyi, ndi akakundjo la luwangu dia ntalungula, akatakhusamela. 3Ku ndi akati ati: Khumemi, dimi lambukosengasenga nti: Naka dimi lambuhumo lukulu lʼolo lu ashu aye, tundekanaki, dimi ukambi aye. 4Nyetawo ntukumuya la tshina diʼutamba one, wanyela ashi wa nyu nsula ekulu. 5Dimi lambutsho dia ntunyosela ukama a ma dia nyu nkikitsha alimba anyu, ne dia le mi, dimi ukambi anyu, kuyenyu. Uma laso kanyokolameli lokendo lanyu. Vo wakûkaluya diui vati: Utshi uku wataye. 6Ku Abarahama akatshu esadi le Sara lu luudu la dipema, akatuwutela ati: Samanya, ose tediko tusatu ta shima ka pudipudi, osohanya, ukati ma esadi. 7Ku Abarahama akalawo, akatunda osongo a ngombe wʼololo wununyi uma lu limba landi la dungalunga, ku akayuwusha ukambi andi omotshi. Ukambi ako akasamanya dia mbolongosola. 8Ndi akose ma la awele kame la unatshi wʼosongo a ngombe wakawalongosola, akayukitsha la ntundu kawo. Lamʼakawalekaka ma diako, Abarahama akayemala la le wo la tshina diʼutamba.

9Vo wakawumbula vati: Lendʼeli wadeye Sara? Ndi akakaluya diui ati: Ndi eko lene lu luudu la dipema. 10Otoi awo omotshi akati ati: Etena uku kene lʼeleku kʼuyuyu, dimi layukalula le ye. Lʼetena keso ku wadeye Sara ambuyala la ona.#18:10 Rom. 9:9. Sara lakadjashi lu suku dia luudu la dipema laki lʼokongo andi akuki aui ako. 11Abarahama la Sara waki esumbi. Sara kunungamela ntu ati: Lukuta ona. 12Sara akole lʼutema andi ati: Ndu dimi ndu khumemi#18:12 1 Pet. 3:6. tambuyalaka esumbi. Ukundi ukukisu nungamela otshoko oso kakiane? 13Ku Latuyalaka akambula Abarahama ati: Okoko wana wakodi Sara ati: Mete mete, dimi layuyala la ona, dimi usumbi wʼuntu? 14Undi dikambu dimotshi dieko diaheyi Latuyalaka ntsha uka?#18:14 Luk. 1:37. Etena keso uku akamakutedi kayumukalula le ye. Lʼetena kako wadeye Sara ayuyala la ona. 15Ku Sara akanguna ati: Dimi hambodi, ne dia ndi akuki woma. Keli Latuyalaka akawutela ati: Mete mete, we akodi.

Abarahama Amboteketela Sodoma

16Apami ako wakunela, wakelela utsha la Sodoma. Abarahama akatshu la wo yema dia mbatshindela. 17Ku Latuyalaka akayambula ati: Ukundi ashemi Abarahama dikambu diayangami ntsha? 18Mete, dimi mbeyaka nti: Abarahama ayuyala wudja a wuki ndu a wulu. Ku wedja tshe wa la kete wayotshokwama lu dikambu diandi. 19Dimi lakenyi ololo nti: Abarahama ayekiya anʼandi ndu wa lu luudu landi tshe dia vo nkendakendaka ololo lu mbuka ka Latuyalaka, la dia vo ntsha akambu wʼusimbwi ndu wʼololo. Osoku ku dimi Latuyalaka, layushidiya daka diakamalaki Abarahama. 20Latuyalaka akati ati: Lundju la Sodoma la Ngomora lambotekoya efula, ndu kolo kawo kambuleka yediko. 21Uma lu dikambu ne mbayangami mpulo utsha leko dia ntenda kana ditshelu diatshawo diambufana la lundju latumukaka. Ku naka aha osoku, dimi layulimbitela dikambu diako.

22Apami ako wakunela uma leko, wakatshu utsha la Sodnma. Keli Abarahama akatshikala laawo emadi la ntundu ka Latuyalaka. 23Ku Abarahama akasukana la le ndi; akawumbula ati: Undi, we ayudiaka antu wʼololo kame la antu wa kolo? 24Ku naka antu wʼololo akumi atanu weko lʼusumba, we ayulanya usumba ako? We hashimbela usumba ne dia antu wʼololo akumi atanu weli loko? 25We ayetawo ndjaka antu wʼololo kame la antu wa kolo? Dikambu ne tadiuyalaki le ye dia ntshela untu ololo uku untu a kolo. Umbadi we kete tshe hatalaka la dialelu diʼololo uka? 26Latuyalaka akûkaluya diui ati: Naka dimi layutana antu wʼololo akumi atanu la Sodoma, ku dimi layuhandja usumba tshe dikambu diawo. 27Abarahama akûkaluya diui ati: Mete, dimi ako leli ditshu la utuku, lakatanuyi dihuli dia nsawula la Khumadiondjo. 28Naka uma lu antu wʼololo akumi atanu, we ayutana akumi anei la atanu atu, ayuyutsha na? We ayulanya usumba tshe ne dia antu wʼololo atanu weli kema? Ndi akûkaluya diui ati: Naka layutana antu wʼololo akumi anei la atanu leko, dimi halulanya usumba. 29Ku Abarahama akawumbula ntu ati: Naka we ayutana antu wʼololo akumi anei atu, ku ukundi? Ku ndi akûkaluya diui ati: Dimi halulanya usumba ne dia akumi anei ako. 30Ku Abarahama akosengasenga ati: Khumadiondjo, tukaki kele, dimi nti: Moteketa. Naka we ayutana antu wʼololo akumi asatu leko, ku ukundi? Ndi akûkaluya diui ati: Naka layutana antu wʼololo akumi asatu, dimi halulanya usumba. 31Ku Abarahama akati ati: Mete, dimi lakatanyi dihuli dia nsawula la Khumadiondjo. Naka we ayutana antu wʼololo akumi ahendi atu, ku ukundi? Ndi akûkaluya diui ati: Dimi halulanya usumba dikambu dia akumi ahendi ako. 32Abarahama akati ati: Khumadiondjo li, tukaki kele; dimi nti: Ntekete etena kene ketu. Naka we ayutana antu wʼololo dikumi, ku ukundi? Ku ndi akûkaluya diui ati: Dimi halulanya usumba dikambu dia antu wʼololo ako dikumi. 33Latuyalaka akatshiki Abarahama lamʼakandashili nsawula la ndi. Ku Abarahama akakalula lakandi.

Currently Selected:

Etatelu 18: TLL

Highlight

Copy