Etumbelu 18

Jetero Ambuya la Ndjenda Mose

1Jetero, olombedi wa Midiyana, ukilu a Mose, akuki akambu tshe wakatshela Unyashungu Mose la wudja andi Isariyele, uku akatundja Latuyalaka Isariyele uma lʼEdjibitu. 2Jetero, ukilu a Mose, akose Zipora, wadi a Mose, lakandunyia, 3ndi la ana andi ahendi wʼapami,#18:3 Etsh. 7:29. lukumbu la omotshi laki, Ngereshoma (ne dia Mose akati ati: Ongendangenda mbudjashimi lu kete ya kana),#18:3 Etum. 2:21-22. 4la lukumbu la ukina laki, Eliezere (ne dia Mose akati ati: Unyashungu a papa keli ekimanyelu kami, ndi kakanshimbela uma lu yombo ya Farayo). 5Ku Jetero, ukilu wa Mose, akunela la wadi a Mose la anʼandi ahendi wʼapami, ku vo wakakumi le Mose lu dihuli diakandahangi lʼusui wa shenga, lʼukungu wa Unyashungu. 6Lamʼakawatutela Mose vati: Ulungi, ukilu aye Jetero eko lu ndjayi le ye, la wadeye la anʼandi ahendi wʼapami, 7ku Mose akatshu dia ntuhumana la ukilu andi lu mbuka; ndi akolemia, akawusha moyo. Vo wakambwana dia wulu wʼalimba awo; wakayoto lu luudu la dipema. 8Ku Mose akasanyia ukilu andi diʼakambu tshe wakatshela Latuyalaka Farayo la asi Edjibitu dikambu dia Isariyele, diʼasui wakayakaka le wo lu mbuka, ndu dia okone akatshungula Latuyalaka. 9Ku Jetero akangenangena dia ololo tshe wakatshela Latuyalaka Isariyele, ndu okone akandatshungula uma lʼanya wʼasi Edjibitu.

10Ku Jetero akati ati: Latuyalaka, lakanyutshungula uma lʼanya wʼasi Edjibitu ndu wa Farayo, atumbwami! One lakatshungula wudja andi uma lu anya wʼasi Edjibitu, atumbwami! 11Kakiane dimi lambulimbitela nti: Latuyalaka ndeka ditemolatemola tshe wuki, ndu ndeka asi Edjibitu lu akambu wakawayasemaka wulu. 12Jetero, ukilu a Mose, akalambula Unyashungu elambu wa lutshumba la elambu ekina. Ku Arona la dihangamendi tshe dia Isariyele wakayi dia ndjole la ukilu wa Mose ma la ntundu ka Unyashungu.

Esonwelo kʼEmbadi

(Euh. 1:9-18)

13La wedi a pindju, Mose akadjase lu elumbwelu dia mbala akambu wʼantu. Ku antu wakemala la ntundu kandi umaka pindju edja ndu la dikolo. 14Lamʼakenyi ukilu a Mose akambu tshe wakatshela Mose wudja, ndi akawumbula ati: Katshaye la antu ane? Okoko wana wadjaseye weme, ku antu ane nkemalelaka umaka pindju edja ndu dikolo? 15Ku Mose akakaluya ukilu andi diui ati: Wudja one ndjakaka le mi, dia ndjumumbula akambu uma le Unyashungu. 16Lamʼatuwuyalaka la dikambu, vo ndjaka le mi. Ku dimi ndjasambulaka, la mbalimbitshiya adjangu wa Unyashungu, la sangweyu diandi. 17Ku ukilu a Mose akûkaluya diui ati: Wuhu watshaye one, kema ololo. 18Nyu nyayokomo alimba, we la wudja one, ne dia dikambu ne diambuleka wulu aye. We hakuki ntsha dikambu ne weme. 19Umbukeli; nkuteli kanyi motshi, la Unyashungu ayalaki la ye! Uyali oteketshi wʼantu le Unyashungu; kotolaki akambu awo le ndi. 20Kuwaetshaki adjangu la sangweyu, kuwalimbitshiyaki mbuka kahumbawo ndjela, la ulimu wahumbawo ntsha. 21Dikambu dikina, osonole apami a wulu uma lʼatei a wudja tshe, wane wuka Unyashungu woma, akanga a mete, wane watuhetshaka ekundjelu kʼuma lu lukesu, akitsha ladiku dia wudja one, dia vo ndjala uku embuledi wʼantu kinunu kinunu, wʼantu lukama lukama, wʼantu akumi atanu atanu, ndu wʼantu dikumi dikumi. 22Vo wakawusambulaki akambu wʼantu tena tshe. Kawelaki akambu tshe a waki le ye, keli vame kawusambulaki tukambukambu. Osoku mbayuyukitshakitsha wutshu aye, ku vo wayuwemba kame la ye. 23Naka we ayutsha dikambu ne, ndu naka Unyashungu ambukudjangela dia we ditsha, ku we ayuyalaka la wulu lʼulimu aye, la wudja one tshe wayukuma lu dihuli diawo la ki.

24Ku Mose aketawo diui dia ukilu andi; akatshi uku akandawutela. 25Mose akasonola apami wʼololo wa mete uma lʼatei wa Isariyele tshe, akawaete ete wa wudja: embuledi wʼantu kinunu kinunu, wʼantu lukama lukama, wʼantu akumi atanu atanu, ndu wʼantu dikumi dikumi. 26Ku vo wakasambulaka akambu wʼantu tena tshe. Vo wakayakaka la akambu a wulu le Mose, keli vo wakasambulaka tukambukambu tshe vame. 27Mose akakendja ukilu andi Jetero. Ku ndi akakalula utsha lu kete yawo.

Currently Selected:

Etumbelu 18: TLL

Highlight

Copy