Etumbelu 17

Ashi wʼUma lu Dive

(Wal. 20:1-13)

1Ului tshe wʼasi Isariyele wakunela uma lʼusui wa shenga wa Sine, wakatakendakendaka uku kendo yakawadjangela Latuyalaka, ku wakatuhanga la Refidime. Keli antu kuntana ashi wa no leko. 2Okone antu wakadji la Mose lundju, wakati vati: Utusha ashi wa no. Mose akawambula ati: Ukundi adjanyu la mi lundju? Okoko wana wedikanyu Latuyalaka? 3Antu wakadienyi la pusa kʼashi leko. Ku vo wakangunangunela Mose vati: Okoko wana wakayatutundja uma lʼEdjibitu, dia ndjutudiaka, shu la anʼasu la dungalunga diasu la pusa kʼashi? 4Ku Mose akaleli le Latuyalaka ati: Ngandi ayumutsha la wudja one? Vo weko suki la ndjalongosola dia mbukami ave. 5Latuyalaka akatela Mose ati: Eti la ntundu ka wudja, we la dihangamendi dia Isariyele. Ukimeli danga diakayakomola lu ndjali ka Nile lu lunya laye, okendekende. 6Enda, dimi layutemala la ntundu kaye ladiku dia dive dia wuki, la Horeba. Kokomole dive diako, ku ashi wayutumba uma loko, diʼantu no. Mose akatshi osoku la ntundu ka dihangamendi dia Isariyele. 7Ndi akole dihuli diako ati: Masa (kitshimudi ati: Edikelu), la Meriba (kitshimudi ati: Lundju), ne diʼasi Isariyele wakami ndu wakedika Latuyalaka; wambwana vati: Latuyalaka eko lʼatei asu, kana kema?#17:7 Wal. 20:2-13.

Amaleka Ambolo la Isariyele Ta

8Ku Amaleka akayi, akayolo la Isariyele ta la Refidime. 9Mose akatela Jashua ati: Utosonwele apami; utumbi, utolo la Amaleka ta. Ku lui, dimi layemala lʼote a dikuna la danga dia Unyashungu lu lunya lami. 10Okone Jashua akatshi uku akawutela Mose, akalo la Amaleka ta. Ku Mose, Arona la Hura wakambela lʼote a dikuna. 11Lamʼakedia Mose lunya landi, Isariyele wakaleki wulu. Keli lamʼakandahuluya lunya landi, Amaleka akaleki wulu. 12Keli anya wa Mose wakole. Ku vo wakela dive dimotshi, wakayukitshiyadio, ku ndi akadjase ladiku a dio. Arona la Hura wakakimela anya andi, one wedi one wedi. Okone anya andi wakatshikala wulu, edja ndu lamʼakadji unya. 13Ku Jashua akalembia Amaleka la wudja andi la diesa dia yombo.

14Latuyalaka akatela Mose ati: Ufundi dikambu ne lu buku, dia nama euhwelu. Uteli Jashua wati: Latuyalaka ayushisha euhwelu ka Amaleka pundju lʼesi ulungu.#17:14 Euh. 25:17-19; 1 Sam. 15:2-9. 15Ku Mose akatshi ediakelu, akakiole ati: Jehowa-Nisi (kitshimudi ati: Latuyalaka keli ekuhu kami ka koi). 16Ndi akati ati: Lunya lambediama ladiku diʼekuhu ka koi ka Latuyalaka! Latuyalaka ayolokaka la Amaleka ta lu lolonga la lolonga.

Currently Selected:

Etumbelu 17: TLL

Highlight

Copy