Etumbelu 16

Unyashungu Ambutuma Mana

1Asi Isariyele tshe wakunela uma la Elime. Ku lu lushi la dikumi lʼatanu la ngondo ka hendi uma lamʼakawunela uma lʼEdjibitu, vo wakakumi lʼusui wa shenga wa Sine. Usui ako weko lʼasa Elime la Sinai. 2Asi Isariyele tshe wakangunangunela Mose la Arona lʼusui. 3Asi Isariyele wakawatela vati: Aki ololo shu mvo lu lunya la Latuyalaka lu kete ya Edjibitu, lene akatadjaseka lasuki la puki yʼenatshi too, too, ndu lene akatalutaka ma efula. Nyu nyambutolombola uya lʼusui one dia ndjushila utundu wʼului one tshe la ndjala.

4Ku Latuyalaka akatela Mose ati: Ulungi, dimi layunyoloshiya ma uma lʼulungu,#16:4 Joa. 6:31. ku antu wayutumbaka dia ntongona etenyi la lushi la lushi uku ahumbawo. Dimi layaedika kana vo wayokendakenda lu elembe ami, kana kema. 5Lu lushi la samalu lamʼayuwuditongonaka, kawuditongonaki yediko yatuwuditongonaka la lushi la lushi tena pendi. 6Ku Mose la Arona wakatela asi Isariyele vati: La dikolo, nyu nyayulimbitela nyati: Latuyalaka kakanyutundja uma lu kete ya Edjibitu. 7Ku lui la pindju, nyu nyayena lutumbu la Latuyalaka, ne dia ndi akuki uku wakanyungunangunela. Kakona kesu, katungunangunelanyu? 8Mose akawatela ati: Latuyalaka ayunyusha unatshi wa nde la dikolo, ku ma diukuki la pindju, ne dia ndi mbukaka okone atunyungunangunelaka. Kakona kesu? Nyu hanyutungunangunela shu, Latuyalaka kangunangunelanyu.

9Mose akatela Arona ati: Uteli ului wʼasi Isariyele tshe wati: Nyusukani la ntundu ka Latuyalaka, ne dia ndi akuki engunungunu awo. 10Kamʼakateketaka Arona la ului tshe wʼasi Isariyele, wenyi ku lutumbu la Latuyalaka lambene lu dingi, lʼusui wa shenga. 11Latuyalaka akatela Mose ati: 12Dimi lakuki engunungu wʼasi Isariyele. Uwateli wati: La tushu ta shimba, nyu nyayolekaka unatshi, ku la pindju, nyu nyayulutaka ma. Osoku mbayunyeya nyati: Dimi keli Latuyalaka, Unyashungu anyu.

13La dikolo, fudu ya tuluhu yakayi, yakakumbi pangu kawo tshe. Ku la pindju, lopopo lakayala efula lʼutshimba, lʼumamu a pangu kawo. 14Ku lamʼakumi lopopo, tango tʼetshimbedi, uku ekongo ka wema, takayala lʼusui wa shenga ladiku dia kete. 15Lamʼakatenyi asi Isariyele, vo wakambwana vati: Keku na? ne dia vo kumbeya tango tako. Ku Mose akawatela ati: Mbu ya nde yambunyusha Latuyalaka ku.#16:15 1 Kor. 10:3. 16Nyotongone yediko yukuki untu lʼuntu nde, untu lʼuntu omera otoi. Pami tshe atongone uku efula kʼantu weli lu luudu landi la dipema. 17Asi Isariyele wakatshi osoku. Vo wakatongona, amotshi efula, akina yema tshitshe. 18Keli lamʼakawayedika lu omera, one lakatongona efula kundjala la tomotshi ladiku; la one lakatongona etenyi ka tshitshe, kumpumba.#16:18 2 Kor. 8:15. Untu lʼuntu akatongonaka yediko yakandakuki nde. 19Mose akawatela ati: Untu tatshikaki tomotshi edja ndu la pindju. 20Keli vo kumbukela Mose. Antu amotshi wakatshiki tomotshi edja ndu la pindju, ku to takoto kusu, takayala sulu. Ku Mose akawauki kele. 21Vo wakatotongonaka pindju la pindju, untu lʼuntu uku yediko yakandakuki nde. Ku lamʼakawaleka yanyi, to takaleloka.

22Lu lushi la samalu, vo wakatongona yediko ya nde nshi hyendi: omera ehendi ehendi le untu lʼuntu. Ku dihangamendi dia lʼului awo wakayutela Mose dikambu so. 23Mose akakaluya diui ati: Dikambu ne dieko uku akanyudjangela Latuyalaka. Lui, ayuyala lushi la mumuya, lushi lʼekila le Latuyalaka.#16:23 Etum. 20:8-11. Nyufumbi kene kalanganyu nfumba; nyukati kene kalanganyu nkate. Kanyumbi tone tambutshikala edja ndu la pindju. 24Vo wakatumbi edja ndu pindju, uku akawatela Mose. Ku to komponda kuyanga mboto kusu. 25Mose akawatela ati: Nyutuli elo, ne dia elo eli lushi la mumuya le Latuyalaka. Nyu hanyututani lʼusui elo. 26Kanyutotongonaki nshi shamalu, keli lushi lʼesambeli, eli lushi la mumuya. To hatuyakaka lushi lako. 27Keli antu amotshi wakatumbi la ntutotongona lushi lʼesambeli, ku vo kuntutana. 28Ku Latuyalaka akambula Mose ati: Edja ndu etena kakona kayunyuheko ntuna adjangu ami la elembe ami? 29Nyendi, Latuyalaka ambunyusha lushi la mumuya. Diako mbatundunyushaka mbu ya nde yukuki nshi hyendi, lushi la samalu. Okone untu tshe, tatumbaki uma lu dihuli diandi lushi lʼesambeli. Keli nyu tshe untu lʼuntu atshikali lu dihuli diandi. 30Okone antu wakumuyaka lushi lʼesambeli.

31Khumbu ka Isariyele wakole tango tako vati: Mana (kitshimudi ati: Keku na?). To takafani la tongo ya sele, ndu taki wema. To taki mpe uku ekati wosohanyemi la usanga.#16:31 Wal. 11:7-8. 32Mose akati ati: Didjangu diambudjanga Latuyalaka ne, ati: Nyulamaki omera otoi wuludi too la mana pundju, dia tukanula tanyu ta lolonga la lolonga mena wuhu wa mbu ya nde yakamanyushaka lʼusui, lamʼakamanyutundja uma lu kete ya Edjibitu. 33Ku Mose akatela Arona ati: Ose utika omotshi, udji mana yediko ya omera otoi loko,#16:33 Heb. 9:4. dia yo namema la ntundu ka Latuyalaka lu nonga tshe. 34Okone Arona akayikitsha la ntundu kʼoshete wa sheki, dia yo namema, uku akadjangela Latuyalaka Mose. 35Asi Isariyele wakalekaka mana deku akumi anei, edja ndu lamʼakawakumi lu kete yakadjashi antu. Vo wakalekaka mana, edja ndu lamʼakawakumi lu elelu wa kete ya Kanana.#16:35 Jas. 5:12. 36(Omera ako weko etenyi ka dikumi ka efa.)

Currently Selected:

Etumbelu 16: TLL

Highlight

Copy