Etumbelu 15

Usambu wa Mose la Miriyama

1Ku Mose la asi Isariyele wakimbela Latuyalaka usambu one,#15:1 Eny. 15:3. vati:

Layimbela Latuyalaka usambu one,

ne dia ndi ambolembia la lutumbu.

Ndi akaditsha falasa ndu ambahami

ato lʼuduwa.

2Latuyalaka keli wulu ami ndu usambuami.

Ndi kakayala panda kami.#15:2 Esam. 118:14; Is. 12:2.

Ndi keli Unyashungu ami, dimi layutumbuiaka.

Ndi keli Unyashungu a papa, dimi

layuwandulaka.

Unyashungu a papa, dimi layutumbulaka.

3Latuyalaka eli ondoshi wa ta.

Latuyalaka keli lukumbu landi.

4Ndi akaditsha pusupusu ya Farayo la

ului andi wʼalimbi lʼuduwa.

Elombodi andi wʼalimbi wakaditi

lʼUduwa a Tilili.

5Asukhu wakakhukhume.

Vo wakaditi lu dingunda uku dive.

6Latuyalaka li, lunya laye la pami leko

la wulu wa mamba!

Latuyaiaka li, lunya laye la pami

mpandjulaka atunyi!

7Uma lu wuki wa lutumbu laye,

Mbatuyambaka wane watukehetshaka.

We ntumaka ududu aye,

Ku vo mbatshumbaka uku adiyu.

8Lu efufelu ka luwi lʼuma lʼehembe aye,

ashi wakamotshama,

Asukhu wakemala lukingi uku eheli.

Ashi wa dingunda wakakami lʼatei

wʼuduwa.

9Utunyi akati ati: Mbayeli, layutuwanda.

Dimi layukahanya diango dia dimbu.

Somboya kami kayukuka le wo.

Layosomola yombo, ku lunya lami layadiaka.

10We akapepia lopepe la luwi laye,

Ku uduwa wakakhukhume.

Vo wakaditi uku luwulu lu ashi a wulu.

11Latuyalaka li, lʼatei a ditemolatemola,

kakona kedimi la ye?

Akona edimi la ye, lu lutumbu lʼekila?

Akona eli woma uku we, lu etsha wa

lutumbu, lu ntsha akambu wa mamba?

12We akasimbula lunya laye la pami,

Ku kete yakamene.

13We akalombola wudja one,

wakayatshungula, la ngandji ka shikaa.

We akalombola la wulu aye utsha

lʼedjaselu kaye kʼekila.

14Wedja wambuka lukumu lone,

wambudidima.

Okei wa mamba wambuyala le wane

wudjashi la Filistiya.

15Ewandji wa Edome wambukasana.

Elombodi wʼasi Moaba wambundama

la woma.

Wane tshe wudjashi la Kanana wambusuwo.

16Sasi la woma wambuwanda;

Ne dia wuki wa lunya laye, vo

wambuyala nyumi uku dive,

Edja ndu wudja aye wambeta,

We, Latuyalaka, edja ndu wudja aye

wakayakundji wambeta.

17We ayalombola pulu, ayutashikike

ladiku diʼukungu wakayasonwela,

Lu dihuli diakayatshi edjaselu kaye,

we Latuyalaka!

Lu etemwelo kakayabiki la anya aye,

we Latuyalaka!

18Latuyalaka ayulelaka pundju, pundju.

19Lamʼakoto falasa ya Farayo, pusupusu yandi la ambahemi andi wa falasa lʼuduwa, Latuyalaka akakaluya ashi wʼuduwa la diku diawo. Keli asi Isariyeie wakatakendakendaka lu lokongo la wumu lʼatei wʼuduwa. 20Miriyama, umvutshi a umuntu, kadiya Arona, akakimela losese lu lunya landi. Ku amantu tshe wakuyeli la sese watano wenye. 21Miriyama akakaluya Isariyele diui ati:

Nyimbeli Latuyalaka usambu, ne dia

ndi akalembia la lutumbu.

Ndi akaditsha falasa la umbahemi

ato lʼuduwa.

Ashi wʼUlulu wa Mara

22Ku Mose akalombola Isariyele uma lʼUduwa a Tilili. Vo wakatshu utsha lʼusui wa shenga wa Shura; wakakendakenda nshi shatu lʼusui ako, ku vo kuntana ashi. 23Lamʼakawakumi la Mara, vo kumbeya no ashi wa la Mara, ne dia ashi ako waki ululu. Diako mbakawole dihuli diako vati: Mara (kitshimudi ati: Ululu). 24Ku antu wakangunangunela Mose vati: Kayutono na? 25Mose akaleli le Latuyalaka, ku Latuyalaka akawenya utamba omotshi. Mose akawukandja lu ashi, ku ashi wakayala ololo.

Lu dihuli diako, Latuyalaka akasha antu elembe la adjangu; leko kakandawaedika. 26Ndi akawatela ati: Naka nyu nyayulungaka diui dia Latuyalaka, Unyashungu anyu, naka nyayutshaka akambu wʼololo lu ashu andi, naka nyayuhukeka atui lu elembe andi, ndu naka nyayukitanyiaka adjangu andi, dimi halunyutumela asui wakamatumela asi Edjibitu; ne dia dimi keli Latuyalaka, latunyokonoyaka.

27Ku vo wakakumi la Elime, lene aki teko dikumi la pendi diʼashi la atuku akumi esambeli. Ku vo wakahangi leko lasuki lʼashi.

Currently Selected:

Etumbelu 15: TLL

Highlight

Copy