Yoanɛ 21

Yezo afa tɛrɛ lo na ava lo mbara mbara

1Ĩ ti na lá mɛ ndɛ̃ ko, Yezo ti fa tɛrɛ lo na ava lo ka nyɔ kpo mɛ ili ni la Tiberiadɛ. Wa ĩ ba se mɛ ndo lo fa tɛrɛ lo na la lo mɛ: 2Simɔ Petro, na Toma (mɛ andoili lo ya Ngbɔ), na Natanaɛlɛ (mɛ zo ti kɔdɔrɔ ti Kana mɛ ka sese ti Galilea), na aya Zebedeo, na ambanga ava Yezo mɛ ndɛ̃ sɛ, ala ndo zu ndoni kɔi. 3Simɔ Petro apa hɛ̃ la ya: “Mbi nɔ so sangɔ gbanda.” La ala pa hɛ̃ lo ya: “E na mɔ e nɔ nga.” La ala nɔ ako ya ngɔ, aɔ. Ala sa gbanda na bi ni ko ngbĩi, ko ta ala gbɔ̃ susu be kɔi ma. 4Ngoi mɛ ndã ĩ to nda dengɔ ko, Yezo aga asi ka nyɔ tungu, kanda ta ava lo ahĩnga ya lo la ma. 5La Yezo ahũnda la ya: “Aya mbi, ĩ gbɔ̃ susu nga?” Ala gbinya hɛ̃ lo ya: “Ipɔ.” 6Yezo apa hɛ̃ la ya: “Ĩ sa gbanda ni na ndo kɔti, wadila ĩ gbɔ̃ susu.” Ala ĩ sa gbanda ko, asusu asĩ ya ni mɛkɛ̃, ko ala ha giɔngɔ gbanda ni ka ya ngu singɔ na ni gba. 7La va Yezo ti kpɔ̃ bɛ lo apa hɛ̃ Petro ya: “Gbia Yezo la!”

Ngoi mɛ Simɔ Petro ĩ ma ya: “Gbia Yezo la” ko, lo mu bɔngɔ tɛ lo mɛ lo hã so lingɔ kwa, lo yu, lo ti ya ngu, lo nɔ ka tɛ Yezo. 8Ambanga ava Yezo mɛ ndɛ̃ anɔ tɛ la ndo na ngɔ, ko ala so ndogiɔ gbanda mɛ asusu asĩ ya ni mɛkɛ̃. Ala ndo ndũ na nyɔ tungu, popo tɛ la na nyɔ tungu ndo nga ma ge tɛ mɛtrɛ ngbangbo kɔi. 9Ngoi mɛ ala ĩ ko ka ndo gegi wɛ ko, ala hũ kenge lɛ wa na susu so lɛ ni, ala hũ nga mapa. 10Ko Yezo apa hɛ̃ la ya: “ĩ ga na ambanga susu mɛ ĩ gbɔ̃, ĩ zɔrɔ e tɛ.” 11Simɔ Petro ako ya ngɔ, agiɔ gbanda mɛ akota susu asĩ ya ni, ako na ni ka ndo gegi. Asusu ni ndo zu ngbangbo kɔi na sui kɔ̃ ndoni ta. Abɛ nga asusu ni ndo ma wo ma ko, ta gbanda ni asuru ndo ma. 12Ko Yezo apa hɛ̃ la ya: “Ĩ ga, ĩ tɛ ye.” Ko ta va lo kɔi atara hũndangɔ lo ya: “Mɔ na?” ma, ta sanga ma, ala hĩnga ya, Gbia Yezo la. 13Yezo anɔ amu mapa, aga na ni hɛ̃ la, amu nga susu ahɛ̃ la.

14Ato na la ko ndo Yezo aso na pɛ kwá ko, lo fa tɛrɛ lo na ava lo ati fani ta la.

Yezo ahũnda Petro na ndo

15Ala ĩ tɛ ye we ko, Yezo ahũnda Simɔ Petro ya: “Simɔ nyi Yoanɛ, mɔ ye mbi aɔ yengɔ mɛ afɔ̃ mɔ aye na mbi?” Simɔ agbinya hɛ̃ lo ya: “Ĩi ma, Gbia, mɔ hĩnga ya, mbi ye mɔ.” Yezo apa hɛ̃ lo ya: “Bata azi tɛ mbi nzɔ̃ni, nga ma se ko wa batangɔ angasã ngbaga ndobata na angasã ngbaga tɛ lo.” 16Yezo ati hũnda lo ti fani sɛ ya: “Simɔ nyi Yoanɛ, mɔ ye mbi?” Simɔ agbinya hɛ̃ lo ya: “Ĩi ma Gbia, mɔ hĩnga ya mbi ye mɔ.” Yezo ati pa hɛ̃ lo ya: “Bata azi tɛ mbi nzɔ̃ni.” 17So pɛni, Yezo ahũnda lo ti fani ta ya: “Simɔ nyi Yoanɛ, mɔ ye mbi?” Petro ĩ hũ ya, Yezo ahũnda ni ti fani ta ya: “Mɔ ye mbi?” ko, vundu agbɔ̃ lo, ko lo gbinya hɛ̃ lo ya: “Gbia, mɔ hĩnga ye zu, mɔ hĩnga ya mbi ye mɔ!” Yezo apa hɛ̃ lo ya: “Bata azi tɛ mbi nzɔ̃ni! 18Mbi pa hɛ̃ mɔ ti beta tɛnɛ ya, ngoi mɛ ndo mɔ dɛ nyi kɔli ko, mɔ nvɛni ndo la mɔ ndogbe gba tɛ mɔ na gu ya mɔ, ko mɔ ndogwe ndo na ndo mɛ mɔ ye gwengɔ da. Kanda ngoi mɛ gbanda mɔ ti bange ko, mɔ ya gbanda ti mɔ ndozu, ko zo mɛ ndɛ̃ agbe gbanda gba tɛ mɔ na gu ya mɔ, ko lo mu mɔ, lo gwe na mɔ na ndo mɛ ta mɔ ye gwengɔ da ma.” 19Yezo atɛnɛ ndo tɛnɛ ni ko so fangɔ se kwá mɛ Petro na kpingɔ, wa Nzapa alua ndima na lo ni. La Yezo apa hɛ̃ Petro ya: “Mu lege tɛ mbi!”

Yezo na va lo ti kpɔ̃ bɛ lo

20Petro ĩ sana tɛrɛ lo ko, lo hũ va Yezo ti kpɔ̃ bɛ lo ka pɛko lo so ndoga. Adu va Yezo mɛ ndo awo tɛrɛ lo ndo Yezo na ngoi ti tɛ, ahũnda Yezo ya: “Gbia, zo mɛ na kangɔ mɔ na?” 21Ko Petro ĩ hũ va Yezo ni ko, Petro ahũnda Yezo ya: “Gbia, wa tɛ zo olo ko, ló mɛ na singɔ na lo nɛ?” 22Yezo agbinya hɛ̃ lo ya: “Se mbi ye ya, lo ngba le lo ngɛ̃ nga ka mbi diri mbi ga ko, ta oko aba mɔ ma! Mu tɛ mɔ lege tɛ mbi!” 23La pa ti tɛnɛ ni ko ati gboo na popo tɛ awa yengɔ lo tɛ Yezo ya, ta va Yezo ni ko akpi gbanda ma. Kanda ta Yezo apa ndo hɛ̃ Petro ya, va ni ni ko angbã gbanda lɛ lo ngɛ̃ ma. Lo pa ti lo ndo ya, se ni ye ya, va ni ni ko angbã lɛ lo ngɛ̃ nga ka ni diri ni ga ko, ta oko aba Petro ma.

24Ko adu bo va Yezo ni ko la akambisa atɛnɛ olo mɛ, nga bo lo la lo su ni, ko e hĩnga ya tɛnɛ mɛ lo tɛnɛ adu biani.

Kɔngɔ nda tɛnɛ

25Yezo ali nga ndo mbanga ye mɛ ndɛ̃ ma wo ma. Wa se adu ya, asu ni kɔi kɔi zu na mbɛti ko, mbi da bɛ mbi ya, ale ta alua ndo ge lɛ sese, akpã na abuku ni da ma.

Currently Selected:

Yoanɛ 21: NGB87

Highlight

Copy