Yoanɛ 20

Ya du sɛndɛ tɛ Yezo angbã gɛgɛrɛ

(Mat. 28.1-8; Mar. 16.1-8; Luk. 24.1-12)

1Ĩ ti na lá yenga, na nda perere, na gbe bi ko, Maria wa Magadala anɔ ka ndo sɛndɛ tɛ Yezo. Ngoi mɛ lo ĩ si kai ko, lo tã abilingi tɛ́nɛ ka nyɔ sɛndɛ ni azi. 2La lo kpɛ, lo nɔ, lo tã Simɔ Petro na mbanga va Yezo ti kpɔ̃ bɛ lo, lo pa hɛ̃ la ya: “Ahã kinda tɛ Gbia Yezo ka ya du sɛndɛ aɔ na ni, ko ta e hĩnga ndo mɛ akpã na ni ma.” 3Petro na mbanga va Yezo ni ko ahã nɔ, anɔ ka ndo sɛndɛ. 4Ala zu sɛ so ndokpɛlɛ kpɛ ndoni kɔi, ko mbanga va Yezo ko akpɛ aɔ Petro, asi uzu ka ndo sɛndɛ. 5Lo wo tɛrɛ lo, lo ba ya du sɛndɛ, ko lo hũ bɔngɔ mɛ ndo agana na Yezo, angbã so tise, kanda ta lo li ka ya du sɛndɛ ni ma. 6Simɔ Petro asi kai gesi, ko lo li tɛ lo ka ya du sɛndɛ ni. Lo hũ bɔngɔ mɛ ndo agana na Yezo angbã so tise, 7lo hũ nga bɔngɔ mɛ ndo abi na ndo li Yezo. Bɔngɔ mɛ ndo abi na ndo li Yezo ko, ta akpã ndo ni ndoni kɔi na bɔngɔ mɛ ndo agana na Yezo ma. Kanda ango ndo bɔngɔ ni ko ngongɔ, akpã katɛ. 8So pɛni kwe la va Yezo mɛ asi uzu ka ndo sɛndɛ, ali nga ka ya du sɛndɛ ni. Lo hũ ni na le lo, la lo ye ya Yezo aso. 9Ta ava Yezo ade ndo ahĩnga nda tɛnɛ mɛ asu ka ya Buku tɛ Nzapa ya, ale Yezo aso na pɛ kwa ma. 10So pɛni, ava Yezo ko se adiri ka ndo tɛ la.

Yezo afa tɛrɛ lo na Maria wa Magadala

(Mat. 28.9-10; Mar. 16.9-11)

11Maria wa Magadala alo ka gegi, so tɔ̃ sɛndɛ, lo so ndoto to. Ngoi mɛ lo so ndoto to ko, lo wo tɛrɛ lo, lo ba ya du sɛndɛ, 12ko lo hũ aangelo sɛ na vuru bɔngɔ tɛrɛ la. Ala dunga na ndo mɛ ndo akpã kinda tɛ Yezo da. Kɔi adu na ta li lo, omɛ ndɛ̃ ka ta gɛrɛ lo. 13Aangelo ko ahũnda Maria ya: “Zo wali, mɔ ndoto ya nɛ?” Maria agbinya hɛ̃ la ya: “Ahã kinda tɛ Gbia tɛ mbi aɔ na ni, ko ta mbi hĩnga ndo mɛ akpã na ni ma.” 14Lo ĩ tɛnɛ so, lo ĩ sana tɛrɛ lo ko, lo hũ Yezo so ndolo, ko ta lo hĩnga ya Yezo la ma. 15Yezo ahũnda lo ya: “Zo wali, mɔ ndoto ya nɛ? Zo mɛ mɔ ndogi lo na?” Maria ada bɛ lo ya, adu wa kwa ti yaka la. La Maria ahũnda lo ya: “Pakala, se adu ya, mɔ la mɔ hã kinda tɛ lo, mɔ ɔ na ni ko, fa mbi na ndo mɛ mɔ kpã lo da, ko mbi nɔ, mbi mu ni, mbi gwe na ni.” 16Yezo aili lo ya: “Maria!” Maria ĩ ma so ko, asana tɛrɛ lo ka tɛ Yezo, apa hɛ̃ Yezo na yanga tɛ Ayuda ya: “Rabuni!” (Nda Rabuni ni la: “Wa hangɔ lo tɛ Nzapa.”) 17Yezo apa hɛ̃ lo ya: “Zi ti mɔ tɛrɛ mbi, ta sanga ma, ta mbi dɛ mbi ma ka tɛ To mbi ma. Wa nɔ mɔ pa hɛ̃ ava mbi ya, mbi ma ka tɛ To mbi mɛ lo nga To ĩ, lo Nzapa tɛ mbi ko lo nga Nzapa tɛ ĩ.” 18La Maria wa Magadala anɔ apa hɛ̃ ava Yezo ya: “Mbi hũ Gbia!” Lo pa nga hɛ̃ la atɛnɛ mɛ fɛrɛ Gbia Yezo atɛnɛ hɛ̃ lo.

Yezo afa tɛrɛ lo na ava lo

(Mat. 28.16-20; Mar. 16.14-18; Luk. 24.36-49)

19Ĩ ti na ndɔ, bo na la yenga ni ko, ava lo abombi tɛrɛ la na ya da kɔi, ala tolo nyɔ ngise ni na kɛrɛrɛ, ta sanga ma, ala ndokpɛ ndo mbɛtɔ tɛ agbia tɛ Ayuda. La Yezo aga so popo tɛ la, alo so ndo bɛ ni, apa hɛ̃ la ya: “Bɛ ĩ adu piini!” 20Lo ĩ tɛnɛ so wɛ ko, lo fa la na yamba ti lo nga na katɛ lo. Ava lo ĩ hũ ya, Gbia Yezo la ko, bɛ la ade sĩ nvɛni. 21Yezo ti pa hɛ̃ la ya: “Bɛ ĩ adu piini! Se ko la To mbi ato na mbi ge lɛ sese ko, se mɛ nga mbi to na ĩ ya, ĩ nɔ, ĩ li kwa tɛ mbi la.” 22Lo ĩ tɛnɛ so wɛ ko, lo ulu mbo tɛrɛ la, lo pa hɛ̃ la ya: “Ĩ lua Tɔrɔ Santo! 23Azi ko la ĩ na kangɔ lɛ ĩ ndo asiɔ ye tɛ la ko, Nzapa nga na kangɔ lɛ lo ndo asiɔ ye tɛ la. Wa azi ko la ĩ na kɛ̃ngɔ kangɔ lɛ ĩ ndo asiɔ ye tɛ la ko, Nzapa nga na kɛ̃ngɔ kangɔ lɛ lo ndo asiɔ ye tɛ la.”

Yezo afa tɛrɛ lo na Toma

24Mbanga va Yezo kɔi ili lo la Toma, andoili nga lo ya Ngbɔ. Ngoi mɛ Yezo aga atã ava lo ko, ta Toma ndo da ma. 25Ko ngoi mɛ lo ĩ ga ko, afɔ̃ lo apa hɛ̃ lo ya: “Toma, e hũ fɛrɛ Gbia Yezo.” Toma agbinya hɛ̃ la ya: “Se mbi hũ ndoro ti sɛtɛ na yamba ti lo, mbi bɔrɔ ndo mɛ agɔngɔ na sɛtɛ, mbi bɔrɔ nga katɛ lo kwe, wadila mbi ye ya Yezo la. Ta so ma ko, ta mbi ye ni bɛ gbɔ ma.”

26Ĩ la so pɛni pɔsɔ kɔi ko, ava Yezo ti bombi tɛrɛ la na ya da, ko Toma nga ndo so popo tɛ la. Ala tolo ndo nyɔ ngise na kɛrɛrɛ. Ko Yezo aga so popo tɛ la, alo so ndo bɛ ni, apa hɛ̃ la ya: “Bɛ ĩ adu piini!” 27So pɛni, lo pa hɛ̃ Toma ya: “Ye li ti mɔ ge, mɔ ba nga yamba ti mbi. Ye li ti mɔ, mɔ bɔrɔ katɛ mbi. Zia dɛngɔ kitɛ, ko mɔ̃ ye ya mbi la!” 28Toma agbinya hɛ̃ lo ya: “Mɔ Gbia tɛ mbi, mɔ nga Nzapa tɛ mbi!” 29Yezo ahũnda lo ya: “Mɔ ye ya mbi la, na lo mɛ ya, mɔ hũ mbi na lɛ mɔ? Dengɔ bɛ ati na azi ko la ta ahũ mbi ma, ko aye lo tɛ mbi!”

Nda mɛ asu na buku olo mɛ

30Yezo ali ndo nga aye ti kpɛnɛ mɛ ndɛ̃ ma wo ma na lɛ ava lo, ko ta asu aye ti kpɛnɛ ni ko so ya buku olo mɛ ma. 31Kanda aye ti kpɛnɛ mɛ asu so ya buku olo mɛ ko, asu ni ya, ĩ di, ko ĩ ye ya, Yezo lo Mɛsia, lo nga Nyi Nzapa, wadila ĩ lua beta du ti ndo lo, na lo ti lo yengɔ tɛ ĩ.

Currently Selected:

Yoanɛ 20: NGB87

Highlight

Copy