Yoanɛ 16

1“Mbi pa tɛnɛ ni ko hɛ̃ ĩ ya, so ĩ dɔ lo yengɔ lo tɛ mbi ĩ zia. 2Azi atoma gbanda ĩ ka ya da sambela, asa gegi. Mbanga lá kɔi gbanda ko, azi aho gbanda ambanga azi na popo tɛ ĩ, ko ala da bɛ la gbanda ya, oko ani ho la ko, ani li kwa hɛ̃ Nzapa. 3Ala li gbanda aye nga so na tɛrɛ ĩ, na lo mɛ ya, ta ala hĩnga To mbi, ahĩnga nga mbi ma. 4Wa mbi pa tɛnɛ olo hɛ̃ ĩ ya, na ngoi ko gbanda ala li aye ni ko na tɛrɛ ĩ ko, ĩ da bɛ ĩ ya, mbi pia ndo mbi pa hɛ̃ ĩ we.”

Kwa mɛ Tɔrɔ Santo ndoli

“Ndo uzu ko, ta mbi pa hɛ̃ ĩ lo tɛ Tɔrɔ Santo ma, na lo mɛ ya, mbi dɛ ndo ndoni kɔi na ĩ. 5Na olo ko, mbi na diringɔ ka tɛ wa tongɔ mbi, wa ta zo kɔi so popo tɛ ĩ ahũnda mbi ya: ‘Mɔ na gwengɔ wa?’ ma. 6Ko vundu agbɔ̃ fɛrɛ ĩ sĩ, na lo ti tɛnɛ mɛ fɛrɛ mbi pa ya, mbi na diringɔ ka tɛ wa tongɔ mbi. 7Ko mbi pa beta tɛnɛ hɛ̃ ĩ ya, se mbi gwe ko, adu nzɔ̃ni na lo tɛ ĩ. Ta sanga ma, se ta mbi gwe ma ko, ta wa zangɔ ĩ aga ge tɛ ĩ ma. Se mbi gwe hĩ, wa mbi to lo. 8Ngoi mɛ lo na gangɔ ko, lo na fangɔ azi na lege, wa ala hĩnga siɔ ye, ala hĩnga beta se li ye, ko ala hĩnga nga ya, Nzapa afa gbanda ngbanga tɛ azi. 9Ko ala na hĩngangɔ ya, ani li siɔ ye, na lo mɛ ya, ta ala ye lo tɛ mbi ma. 10Ala na hĩngangɔ ya, mbi ha ndo azi na beta se li ye, na lo mɛ ya, mbi na diringɔ ka tɛ To mbi, ko ta ĩ na hũngɔ mbi fani mɛ ndɛ̃ ma. 11Ala nga na hĩngangɔ ya, Nzapa afa gbanda ngbanga tɛ azi, na lo mɛ ya, Nzapa afa ngbanga abi li Satana mɛ gbia ti le sese wɛ.

12“Mbi dɛ na tɛnɛ ma wo ma ya mbi tɛnɛ hɛ̃ ĩ, kanda se mbi tɛnɛ na olo ko, ta ĩ hĩnga nda ni ma. 13Ngoi mɛ Tɔrɔ Santo mɛ ndopa beta lo tɛ Nzapa aga aza ĩ hĩ, wadila ĩ hĩnga beta lo zu. Ta lo na tɛnɛngɔ tɛnɛ na nguru tɛ lo nvɛni ma, kanda lo na pangɔ hɛ̃ ĩ atɛnɛ zu mɛ lo ma ka nyɔ To mbi, lo nga na pangɔ hɛ̃ ĩ alo mɛ gbanda na singɔ. 14Azi na gondangɔ mbi na lo tɛ lo, ta sanga ma, lo na pangɔ hɛ̃ ĩ atɛnɛ mɛ alo ka nyɔ mbi. 15Aye tɛ To mbi zu nga ti mbi. Nda mɛ fɛrɛ mbi pa hɛ̃ ĩ ya, Tɔrɔ Santo na pangɔ hɛ̃ ĩ atɛnɛ mɛ alo ka nyɔ mbi la.”

Vundu tɛ ĩ na tingɔ dengɔ bɛ

16“Na pɛ nyi ngoi ko, ta ĩ ti hũ mbi ma. So pɛni, na pɛ nyi ngoi wa ĩ ti ĩ hũ mbi.” 17Ambanga ava lo ĩ ma so ko, ala hũndangbi tɛrɛ la ya: “Nda tɛnɛ ni ko nɛ? Lo pa hɛ̃ e ya, na pɛ nyi ngoi ko, ta e ti e hũ ni ma, ko so pɛni, na pɛ nyi ngoi wa e ti e hũ ni. Lo pa nga ya, ta e ti e hũ ni ma, na lo mɛ ya, ni na diringɔ ka tɛ To ni. 18Wa nda ‘nyi ngoi’ ni nɛ? Ta e hĩnga nda tɛnɛ ko lo ye tɛnɛngɔ ma.” 19Yezo ahĩnga ya, ala separa hũndangɔ ni na ndo, la lo pa hɛ̃ la ya: “Mbi pa fɛrɛ hɛ̃ ĩ ya: ‘Na pɛ nyi ngoi ko, ta ĩ ti ĩ hũ mbi ma, ko so pɛni, na pɛ nyi ngoi, wa ĩ ti ĩ hũ mbi.’ Ko ĩ ndohũndangbi tɛrɛ ĩ na lo tɛnɛ ni ko? 20Mbi pa hɛ̃ ĩ ti beta tɛnɛ ya, ĩ na tongɔ to, ĩ na demangɔ tɛrɛ ĩ, kanda azi ti lɛ sese na sabangɔ. Ĩ na dungɔ na vundu, kanda vundu tɛ ĩ na tingɔ dengɔ bɛ. 21Ngoi mɛ se gwa atɛ wali ko, lo ndodu na vundu, na lo mɛ ya, ngoi hũngɔ pɛnɔ tɛ lo alengbi wɛ. Wa ngoi mɛ se lo dú wɛ ko, bɛ lo ali na pɛnɔ mɛ lo hũ, na lo mɛ ya, bɛ lo ade na lo tɛ nyi mɛ lo dú. 22Se mɛ nga ĩ ndohũ na apɛnɔ na olo mɛ la, wa mbi na hũngɔ ĩ fani mɛ ndɛ̃, bɛ ĩ na dengɔ, ko ta zo kɔi na gbɛ̃ngɔ dengɔ be tɛ ĩ ma.

23“Ngoi mɛ se lá ni ko alengbi ko, ta ĩ hũnda mbi na ndo fani mɛ ndɛ̃ na lo ye kɔi ma. Mbi pa hɛ̃ ĩ ti bɛta tɛnɛ ya, To mbi na hɛ̃ngɔ ĩ ye zu mɛ ĩ na yɔngɔ ka ti lo na ili mbi. 24Ato ndo gã asi na olo ko, ta ĩ de ĩ yɔ ye kɔi na ili mbi ma. Ĩ yɔ ye, ĩ na luangɔ, wa se mɛ bɛ ĩ ade ti buai la.”

Yezo anwɔ asiɔ ye ti lɛ sese zu wɛ

25“Mbi tɛnɛ tɛnɛ olo zu hɛ̃ ĩ gi na matɔ. Mbanga lá kɔi ko, ta mbi na tɛnɛngɔ tɛnɛ hɛ̃ ĩ fani mɛ ndɛ̃ na matɔ ma, kanda mbi na pangɔ lo tɛ To mbi yango hɛ̃ ĩ. 26Ngoi mɛ se ngoi ni ko alengbi ko, ĩ yɔ aye ka ti To mbi na ili mbi, wa ta mbi pa ya, mbi na yɔngɔ ye ka ti lo hɛ̃ ĩ ma, 27ta sanga ma, To mbi Nzapa nvɛni ndoye ĩ. Lo ndoye ĩ, na lo mɛ ya, ĩ ye mbi, ko ĩ ye nga ya, mbi lo ka tɛ lo. 28Mbi lo ka tɛ To mbi la mbi ga ge lɛ sese. Na olo ko, mbi na ziangɔ lɛ sese diringɔ ka tɛ To mbi.”

29Ava lo ĩ ma so ko, ala pa hɛ̃ lo ya: “Ba na olo ko, ta mɔ tɛnɛ tɛnɛ na matɔ ma, kanda mɔ tɛnɛ tɛnɛ yango. 30Ko e hĩnga na olo ya, mɔ hĩnga ye kwe zu, ko adu gɛgɛrɛ ya, azi ahũnda mɔ na ndo, ta sanga ma, mɔ ndopia mɔ hĩnga ndo mɛ azi asepara hũndangɔ na mɔ. Nda mɛ e ye ya, mɔ lo ka tɛ Nzapa la.” 31La Yezo agbinya hɛ̃ la ya: “Ĩ ye lo tɛ mbi bo na olo? 32Ĩ ma lu, mbanga ngoi na lengbingɔ, ko ngoi ni alengbi wɛ, ko ĩ na gundungɔ zu. Zo kɔi kɔi na diringɔ ka ya da tɛ lo, ko ĩ na ziangɔ mbi na kunɛ mbi. Ipɔ, ti biani ko, ta mbi na ngbãngɔ na kunɛ mbi ma, na lo mɛ ya, To mbi ndodu ndoni kɔi na mbi. 33Mbi pa tɛnɛ olo kwe zu hɛ̃ ĩ ya, ĩ ma, ko ĩ du nga ndoni kɔi na mbi, wadila bɛ ĩ adu pii. Ĩ na hũngɔ penɔ ge lɛ sese. Kanda ale ĩ gbe bɛ ĩ! Ĩ hĩnga ya, mbi nwɔ asiɔ ye ti lɛ sese wɛ.”

Currently Selected:

Yoanɛ 16: NGB87

Highlight

Copy