Yoanɛ 15

Yezo nga ma bɛta kɛkɛ vinɔ

1Yezo apa hɛ̃ ava lo ya: “Mbi nga ma bɛta kɛkɛ vinɔ, To lɔ mbi tɛ lo nga ma wa sɛ̃ngɔ yaka vinɔ. 2Akati vinɔ kɔi kɔi mɛ ta ndole ma ko, lo fara ni, lo sa tise. Lo lɛkɛ akati mɛ ndole, ko lo fara li ni yɛɛ ya ati ale gba. 3Atɛnɛ mɛ ndo mbi ndotɛnɛ hɛ̃ ĩ alɛkɛ ndo bɛ ĩ avuru wɛ. 4Ale ĩ ndodu ndoni kɔi na mbi, nga ma se ko mbi ndodu ndoni kɔi na ĩ. Se ta kati kɛkɛ adu ka tɛrɛ kɛkɛ ma ko, ta kati kɛkɛ ni alengbi ti lengɔ na kunɛ lo ma. Se mɛ nga se ta ĩ du ndoni kɔi na mbi ma ko, ta ĩ lengbi nga ti lingɔ ye kɔi ma la.

5“Mbi nga ma beta kɛkɛ vinɔ, ĩ tɛ ĩ nga ma akati kɛkɛ vinɔ. Zo ko la adu ndoni kɔi na mbi, nga ma se ko mbi ndodu ndoni kɔi na lo ko, lo ti nga ma kati kɛkɛ mɛ ndole nzɛngbɛ nzɛngbɛ. Se ta ĩ du ndoni kɔi na mbi ma ko, ta ĩ lengbi ti lingɔ ye bɛ kɔi ma. 6Se ta zo adu ndoni kɔi na mbi ma ko, lo ti nga ma kati kɛkɛ mɛ afa, abi tise, la aulɛ. So pɛni ko, alɔ ni, asa ya wá, agbi. 7Se ĩ du ndoni kɔi na mbi, ĩ kpa nga tɛnɛ tɛ mbi ka ya bɛ ĩ ko, ĩ hũnda ye mɛ ĩ ye, wa ĩ lua ni. 8Se ĩ du nga ma akati kɛkɛ mɛ ale nzɛngbɛ nzɛngbɛ ko, ĩ fa nga ya, ĩ ava mbi, wadila azi ahũ ndima tɛ To mbi. 9Mbi ye ĩ nga ma se mɛ To mbi aye na mbi. Ale ĩ ngba na ya yengɔ mɛ mbi ndoye na ĩ. 10Se ĩ tɔndɔ andia tɛ mbi, wadila ĩ ngbã na ya yengɔ mɛ mbi ndoye na ĩ, nga ma se mɛ ndo mbi tɔndɔ na andia tɛ To mbi, ko mbi ngbã na ya yengɔ mɛ lo ndoye na mbi.

11“Mbi pa tɛnɛ olo hɛ̃ ĩ ya ĩ ma, wadila ĩ lua nga dengɔ bɛ mɛ mbi na ni, ko dengɔ bɛ ni adu kotani buai. 12Ĩ ma ndia mɛ mbi lu hɛ̃ ĩ lo mɛ: ĩ yengbi nga ma se mɛ mbi ye na ĩ. 13Yengɔ mɛ aɔ ndo yengɔ zu la, oko zo aye kangɔ tɛrɛ lo so afɔ̃ lo. 14Se ĩ li ye na se nyɔ mbi, wadila ĩ ti afɔ̃ mbi. 15Ko ta mbi ti ili ĩ ya, ĩ awa kwa tɛ mbi ma, na lo mɛ ya, ta wa kwa ndohĩnga ye mɛ gbia tɛ lo ndosepara lingɔ ma. Mbi ili ĩ ya, ĩ afɔ̃ mbi, na lo mɛ ya, mbi fa ĩ na ye zu mɛ ndo mbi ma ka nyɔ To mbi. 16Ta ĩ ndo la ĩ sara mbi ĩ kpa ma, kanda mbi ndo la mbi sara ĩ mbi kpa. Mbi sara ndo ĩ mbi kpa ya, mbi to ĩ, ĩ li kwa, lɛ kwa ni asi yango, ko angbã nga buai. Se ĩ li nga so, wa ye zu ko la ĩ hũnda na ili mbi ka ti To mbi ko, lo hɛ̃ ĩ. 17Ndia mɛ mbi lu hɛ̃ ĩ la, ale ĩ ndoyengbi.”

Bɛ azi ti lɛ sese akɛ̃ Yezo na ava lo

18“Se bɛ azi ti lɛ sese akɛ̃ ĩ ko, ale ĩ hĩnga ya, bɛ la akɛ̃ nga ndo mbi uzu tɛ ĩ. 19Se adu ya, ĩ du azi ti lɛ sese ko, ale bɛ la aye ĩ, na lo mɛ ya, ĩ du azi tɛ la. Wa oko mbi hãna ndo ĩ ka popo tɛ azi ti lɛ sese, mbi kpã katɛ ko, ta ĩ ti dɛ azi ti lɛ sese ma. Nda mɛ bɛ azi ti lɛ sese akɛ̃ ĩ la. 20Ĩ da bɛ ĩ na tɛnɛ ko ndo mbi tɛnɛ hɛ̃ ĩ, tɛnɛ ni lo mɛ: ‘Ta wa kwa ndoɔ gbia tɛ lo ma.’ Se ko ndo ala hɛ̃ mbi pɛnɔ ko, se mɛ nga ala na hɛ̃ngɔ ĩ pɛnɔ la. Se ko ndo ala kɛ̃ na atɛnɛ tɛ mbi ko, se mɛ nga ala na kɛ̃ngɔ na atɛnɛ tɛ ĩ la. 21Ala na hɛ̃ngɔ ĩ apɛnɔ ni ko zu na lo tɛ mbi, na lo mɛ ya, ta ala hĩnga wa tongɔ mbi ma. 22Se adu ya, ta mbi ga ndo ge lɛ sese, mbi tɛnɛ tɛnɛ hɛ̃ la ma ko, ale ta siɔ ye tɛ la angbã na li la ma. Wa na olo, oko mbi ga, mbi fa la na asiɔ ye tɛ la we, ko se ala baba bo lingɔ siɔ ye ko, ta ala lengbi ti bɛrɛngɔ lo siɔ ye tɛ la ma. 23Zo ko la bɛ lo akɛ̃ mbi ko, afa ya, bɛ lo akɛ̃ nga To mbi. 24Aye ti kpɛnɛ mɛ ta zo ade ali ma ko, mbi li ni. Se adu ya, ta mbi li ni na popo tɛ la ma ko, ale ta siɔ ye tɛ la angbã na li la ma. Kanda na olo, ala hũ kwa mɛ mbi li, ko ala kɛ̃ kia, akɛ̃ mbi na To mbi. 25Ko alo ni ko asi ya, tɛnɛ mɛ asu ka ya buku ti ndia tɛ la ati na seni. Tɛnɛ ni lo mɛ: ‘Bɛ la akɛ̃ mbi sanga sanga.’ ”

26Yezo apa nga ya: “Wa zangɔ ĩ na gangɔ. Mbi na tongɔ lo hɛ̃ ĩ, lo Tɔrɔ Santo mɛ lo ndopa beta lo tɛ Nzapa. Lo na longɔ ka tɛ To mbi, wa lo ga, ko lo na dungɔ temwɛ tɛ mbi. 27Ko ĩ nga na dungɔ atemwɛ tɛ mbi, na lo mɛ ya, na tongɔ nda kwa tɛ mbi ko, e na ĩ bo ndoni kɔi.”

Currently Selected:

Yoanɛ 15: NGB87

Highlight

Copy