Yoanɛ 17

Yezo asambela Nzapa na lo tɛ ava Io

1Yezo ĩ tɛnɛ so wɛ ko, lo ya lɛ lo ndozu, lo pa ya: “Baba, bi mɛ ndo mɔ ko alengbi wɛ. La azi na ndima tɛ mbi Nyi mɔ, wa mbi fa nga la na ndima tɛ mɔ. 2Ta sanga ma, mɔ hɛ̃ mbi nguru ya, mbi hɛ̃ du ti kaka hɛ̃ azi zu mɛ mɔ hɛ̃ la hɛ̃ mbi. 3Du ti kaka mɛ ala lua afa ya, ala hĩnga mɔ mɛ bo mɔ kɔi la bɛta Nzapa, ala hĩnga nga mbi Yezo Kristo mɛ mɔ to mbi ge lɛ sese. 4Mbi fa azi ge lɛ sese na ndima tɛ mɔ. Kwa mɛ mɔ hɛ̃ mbi ya mbi li ko, mbi kɔ nda ni kpɛkɛlɛ. 5Wa na olo ko. Baba, diri na mbi ka tɛ mɔ, ko mɔ hɛ̃ mbi ndima mɛ ndo mbi na ni ka tɛ mɔ gã, uzu ti mɔ lingɔ sese.

6“Mɔ hã ambanga azi ti lɛ sese na popo tɛ afɔ̃ la, mɔ hɛ̃ mbi, ko mbi fa mɔ na la, ala hĩnga mɔ. Ala azi tɛ mɔ, la mɔ hɛ̃ la hɛ̃ mbi, ala tɔndɔ tɛnɛ tɛ mɔ. 7Na olo ko, ala hĩnga ya, ye zu mɛ mɔ hɛ̃ mbi ko, alo ka tɛ mɔ, 8ta sanga ma, atɛnɛ mɛ ndo mɔ tɛnɛ hɛ̃ mbi ko, mbi tɛnɛ nga hɛ̃ la, ala ye lo ni. Ala hĩnga ya, mbi lo ka tɛ mɔ biani la mbi ga, ala ye nga ya, mɔ la mɔ to mbi.

9“Mbi sambela mɔ na lo tɛ la. Ta mbi sambela mɔ na lo tɛ azi ti lɛ sese ma, kanda mbi sambela mɔ na lo tɛ azi mɛ mɔ hɛ̃ la hɛ̃ mbi, ta sanga ma, ala azi tɛ mɔ. 10Azi tɛ mbi zu ti mɔ, azi tɛ mɔ zu nga ti mbi. Ko andohũ ndima tɛ mbi ti ndo la. 11Ta mbi ti dɛ ge lɛ sese ma, mbi na diringɔ ka tɛ mɔ. Kanda ala dɛ tɛ la ge lɛ sese. To mbi, mɔ mɛ mɔ santo, bata la na nguru tɛ mɔ mɛ mɔ hɛ̃ mbi, wadila ala ti bo kɔi, nga ma se mɛ mbi na mɔ e bo kɔi. 12Ngoi mɛ ndo mbi dɛ ndoni kɔi na la ko, mbi bata la na nguru tɛ mɔ mɛ mɔ hɛ̃ mbi. Mbi bata la ko ta zo kɔi ayu ndo na ti mbi ma, wenge bo zo ko ndo ale lo yu ndo, ya tɛnɛ ti ya Buku tɛ mɔ ati na seni.

13“Na olo ko, mbi na diringɔ ka tɛ mɔ, ko mbi tɛnɛ nga so na ngoi mɛ mbi dɛ ge lɛ sese, wadila bɛ la ade zɔgɔrɔ, nga ma se mɛ bɛ mbi ndode na ni. 14Mbi ha la na tɛnɛ tɛ mɔ, ko bɛ azi ti lɛ sese akɛ̃ la, na lo mɛ ya, ta ala azi ti lɛ sese ma, nga ma se mɛ ta mbi nga zo ti lɛ sese ma. 15Ta mbi hũnda mɔ ya, mɔ hã la so lɛ sese olo mɔ zi ma, kanda mbi hũnda mɔ ya, mɔ bata la, so ala ti na gbe ti Satana. 16Ta ala azi ti lɛ sese ma, nga ma se mɛ ta mbi nga zo ti lɛ sese ma. 17Ha la na beta lo tɛ mɔ, wa ala ti azi tɛ mɔ biani. Tɛnɛ tɛ mɔ ndofa beta lo. 18Mbi to la na lɛ sese, nga ma se mɛ mɔ to na mbi ge lɛ sese. 19Mbi hɛ̃ tɛrɛ mbi zu hɛ̃ mɔ na lo tɛ la ya, ala ti nga azi tɛ mɔ biani.

20“Ta mbi sambela mɔ bo na lo tɛ la kɔi ma, kanda mbi sambela nga mɔ na lo tɛ azi mɛ na yengɔ lo tɛ mbi mɛ ala na hangɔ. 21Mbi hũnda mɔ ya, azi ni ko zu ati bo kɔi. Baba, e na la e ti bɛ kɔi, nga ma se mɛ mbi e na mɔ bo kɔi ma ke! Ala ti bɛ kɔi, wadila azi ti lɛ sese aye ya, mɔ la mɔ to mbi ma ke! 22Mbi hɛ̃ la ndima mɛ mɔ hɛ̃ mbi, ya ala ti bo kɔi, nga ma se mɛ mbi na e mɔ bo kɔi. 23Mbi e na la bo kɔi, mbi e na mɔ bo kɔi, ya ala ti bo kɔi nvɛni, wadila azi ti lɛ sese ahĩnga ya, mɔ la mɔ to mbi, ko mɔ ye nga awa yengɔ lo tɛ mbi, nga ma se mɛ mɔ ye na mbi.

24“Baba, mɔ hɛ̃ la hɛ̃ mbi, ko mbi separa ya, mbi e na la e dunga na ndo mɛ mbi na dungɔ da, wa ala hũ ndima tɛ mbi mɛ mɔ hɛ̃ mbi, na lo mɛ ya, mɔ ye mbi uzu ti mɔ lingɔ sese. 25Baba, mɔ mɛ mɔ wa lingɔ ye na seni, ta azi ti lɛ sese ahĩnga mɔ ma, mbi la mbi hĩnga mɔ, ko azi olo ahĩnga ya mɔ la mɔ to mbi. 26Mbi fa mɔ na la, ko mbi ti mbi fa gbanda mɔ na la ya, ala yengbi, nga ma se mɛ mɔ ye na mbi, wadila mbi nvɛni, e na la e ti bo kɔi.”

Currently Selected:

Yoanɛ 17: NGB87

Highlight

Copy