Yoanɛ 14

Yezo lo nga ma lege mɛ agwe ka tɛ To lo Nzapa

1Yezo apa hɛ̃ ava lo ya: “Ta ĩ kpã bɛ ĩ ngbũ ma, ĩ ye lo tɛ Nzapa, ĩ ye nga lo tɛ mbi. 2Ka ya da tɛ To mbi ko, ndo da ma wo ma, ko mbi gwe so lɛkɛngɔ ndo hɛ̃ ĩ. Se ta adu biani ma ko, ale ta mbi pa nga hɛ̃ ĩ ma. 3Wa ngoi mɛ se mbi gwe, mbi lɛkɛ ndo hɛ̃ ĩ wɛ ko, mbi diri, mbi ga, mbi mu ĩ ya, ĩ du nga ka ndo mɛ mbi na dungɔ da. 4Ĩ hĩnga lege mɛ agwe ka ndo mɛ mbi na gwengɔ da.” 5La Toma ahũnda lo ya: “Gbia, ta e hĩnga ndo mɛ mɔ na gwengɔ da ma, ko kɔdɛ mɛ e hĩnga lege ni nga sia?” 6Yezo agbinya hɛ̃ lo ya: “Mbi nga ma lege mɛ agwe ka tɛ To mbi, mbi beta lo tɛ Nzapa, mbi ndohɛ̃ nga beta du. Zo ko la aye singɔ ka tɛ To mbi ko, ale lo ɔ uzu ti ndo mbi. 7Se ĩ hĩnga mbi ko, ĩ hĩnga nga To mbi. Wa ato bo na olo ko, ĩ hĩnga lo wɛ, ĩ hũ nga lo wɛ.”

8Filipo apa hɛ̃ lo ya: “Gbia, fa e na To mɔ, wa ta e ti e hũnda alo mɛ ndɛ̃ ma.” 9Yezo agbinya hɛ̃ lo ya: “Filipo, mbi e na ĩ na ndo mɛ ndogã, ta mɔ hĩnga mbi ma? Zo ko la ahũ mbi ko, ahũ nga To mbi. Ko nda mɛ mɔ pa ya, mbi fa mɔ na To mbi nɛ? 10Hĩnga ya, mbi na To mbi e bo kɔi. Atɛnɛ mɛ mbi ndotɛnɛ hɛ̃ ĩ zu ko, ta mbi ndoko na bɛ mbi ma. To mbi mɛ mbi na lo bo kɔi la ndoli akwa tɛ lo nvɛni ti ndo mbi. 11Ale ĩ ye ya, mbi na To mbi e bo kɔi. Wa se ta ĩ ye ya, e na lo bo kɔi, na lo ti tɛnɛ tɛ mbi ma ko, ale ĩ ye na lo ti akwa mɛ mbi ndoli. 12Mbi pa hɛ̃ ĩ ti beta tɛnɛ ya, zo ko la aye lo tɛ mbi ko, lo nga na lingɔ akwa mɛ mbi ndoli, ko tɛ lo akwa ni na ɔngɔ ndo tɛ mbi, na lo mɛ ya, mbi na gwengɔ ka tɛ To mbi. 13Wa aye zu ko la ĩ na hũndangɔ na ili mbi ko, mbi na lingɔ ni ya, azi ahũ ndima tɛ To mbi ti ndo mbi Nyi lo. 14Se ĩ hũnda mbi na ye na ili mbi ko, mbi na lingɔ ni.”

Yezo ako kapa ti tongɔ Tɔrɔ Santo hĩ ava lo

15“Se ĩ ye mbi ko, ĩ tɔndɔ nga andia tɛ mbi. 16Ko mbi na hũndangɔ To mbi ya, lo to Zo mɛ ndɛ̃ hɛ̃ ĩ, wa Zo ni aza ĩ na se lɛ mbi. Zo ni adu Tɔrɔ Santo mɛ ndopa beta lo tɛ Nzapa, ko lo na dungɔ ndoni kɔi na ĩ ngoi zu. 17Ta azi ti lɛ sese alengbi ti luangɔ lo ma, na lo mɛ ya, ta ala lengbi ti hũngɔ lo ma, ta ala lengbi nga ti hĩngangɔ lo ma. Kanda ĩ la ĩ hĩnga lo, na lo mɛ ya, lo ndodu ndoni kɔi na ĩ, ko lo na dungɔ ka ya bɛ ĩ.

18“Ta mbi na ziangɔ ĩ nga ma aya ndũ ma, mbi na diringɔ ge tɛ ĩ. 19Angbã yakere, ta azi ti lɛ sese na hũngɔ mbi fani mɛ ndɛ̃ ma, kanda ĩ na hũngɔ mbi. Ta sanga ma, mbi na songɔ na pɛ kwa, ko ĩ nga na songɔ na pɛ kwá. 20Ngoi ko lá ni na lengbingɔ ko, ĩ na hĩngangɔ ya, mbi e na To mbi bo kɔi. Ĩ na hĩngangɔ nga ya, mbi e na ĩ bo kɔi.

21“Zo ko la ahĩnga andia tɛ mbi, atɔndɔ nga ni ko, wa yengɔ mbi la. To mbi na yengɔ zo ko la aye mbi, mbi nga na yengɔ zo ni ko, ko mbi na fangɔ tɛrɛ mbi na lo.” 22La Yudasi (ta Yudasi lskariɔtɛ ma) ahũnda lo ya: “Gbia, kɔdɛ mɛ mɔ na fangɔ tɛrɛ mɔ bo na e kɔi, ko ta mɔ na fangɔ tɛrɛ mɔ na azi mɛ ndɛ̃ ma sia?” 23Yezo agbinya hɛ̃ lo ya: “Zo ko la aye mbi ko, lo na tɔndɔngɔ tɛnɛ mɛ mbi ndotɛnɛ. To mbi na yengɔ lo, mbi na To mbi e na gangɔ ka tɛ lo, ko e nga na dungɔ ka tɛ lo. 24Wa zo ko la ta aye mbi ma ko, ta lo tɔndɔ nga tɛnɛ tɛ mbi ma. Tɛnɛ mɛ ĩ ndoma ge nyɔ mbi ko, ta mbi ndoko na bɛ mbi ma, kanda mbi ndotɛnɛ na se nyɔ To mbi mɛ wa tongɔ mbi.

25“Mbi pa tɛnɛ ni ko hɛ̃ ĩ na ngoi mɛ mbi dɛ ndoni kɔi na ĩ. 26Wa Tɔrɔ Santo mɛ To mbi na tongɔ lo ya, lò za ĩ na se lɛ mbi ko, lo na hangɔ ĩ na aye kwe zu, ko lo nga na dangɔ bɛ ĩ na atɛnɛ zu mɛ mbi tɛnɛ hɛ̃ ĩ.

27“Mbi na ziangɔ ĩ, ko mbi na lingɔ ya, bɛ ĩ adu pii. Adu bɛ pii mɛ mbi na ni, la mbi na lingɔ ya, ĩ du nga na ni. Kanda ta azi ti lɛ sese alengbi ti lingɔ ya, ĩ du na bɛ pii, nga ma se mɛ mbi li ya, ĩ du na ni ma. Ta ĩ kpa bɛ ĩ ngbũ ma, ta mbɛtɔ agbɔ̃ nga ĩ ma. 28Ĩ ma fɛ̃rɛ mbi pa hɛ̃ ĩ ya: ‘Mbi na gwengɔ, kanda mbi na diringɔ ge tɛ ĩ.’ Se adu ya, ĩ ye mbi ko, ale ĩ saba na lo ti gwengɔ tɛ mbi ka tɛ To mbi, na lo mɛ ya, To mbi aɔ mbi. 29Ko uzu ti aye ni ko singɔ ko, mbi pia mbi pa hɛ̃ ĩ na olo ya, ngoi mɛ aye ni ko asi, wa ĩ ye tɛnɛ mɛ mbi tɛnɛ hɛ̃ ĩ. 30Ta mbi ti tɛnɛ tɛnɛ kpa kpa kpa hɛ̃ ĩ ma, ta sanga ma, Satana mɛ gbia ti lɛ sese olo na gangɔ, kanda ta lo gbia ti ndo mbi bɛ gbɔ ma. 31Mbi ndoli ye na se nyɔ To mbi, ya azi ahĩnga ya, mbi ndoye lo. Wa ĩ longa, é lo so ndo mɛ é ɔ!”

Currently Selected:

Yoanɛ 14: NGB87

Highlight

Copy