Yoane 8

1-2Im pol sugkū yumti dan Iyi yōĭmpelum mempe ūnisog nimo tumpora. Im netevokontū omwisū dūmūvelum pugi; miyi yemetesep mōĭmtavsokonda. 3Mōvun Somul, mōvun Faresi, dūmūtōri pugi sī nasiven mori yemtampalaū, mūmūtipe iyi ĭlebōteven, 4mūmūnūwi pugi mūmōkū Tavsogi imo nasiven okotampalaū, dōkesiwi. 5Kō ra mumpon ōvun nempasewugi Mōses umnempasewugkam, memagkū, ka kelantevi gi nevat; kō, kĭk emanūwi memagkū, sie? 6Mirora dūmūtagkeli imo mūmōkū wontapmi Iyi monirūara iran. Kō Iesū yemtelasah memetīyi ra nemap ugi dogorugon nokoven. 7Mirora dūmurūn tagkeli Iyi, miyi yemtelesah memenūwi, memokū, Iyi sī ra kĭmi ĭm tawi sat iran ampūm mantevi gi nevat. 8Miyi yōĭmtelasep mōmetĭyi ra nemap. Mirora dūmūrigi mūmūsepen nūmūs ūnōwanda mūmūve ilat, 9irorasū, mūmūwi Iesū wokon, ĭm nasiven mori yemetūrū ilebōteven. 10Iesū yōmetesep memokesi nasiven, iyi kosī, memtagkeli, memokū, Nasiven yēi irora ūvievri iram? tawi sī umworepatevi iram kū? 11Miyi yemenūwi, memokū, Narisah, tawi sī. Iesū yōmenūwi pugi, memokū, Im ya otūmnoworepatevi iram; eve, metūōmenumpi sat tawi ĭndowi.

12Iesū yōmenūwi punora, memokū, yaū Nilara ra nemap; iyi sī umamplesi irag otūonavan ra nelebokevat, kō ampi nilara nomūrep. 13Mōvun Faresi dūmūnūwi pugi mūmōkū, kĭk emasepen numpūvsok ugi kĭk, numpūvsok enugkĭk tawi itnesog.

14Iesū yemenūwi punora, memokū, Nagku sugkū ya umasepen numpūvsok irag numpūvsok enyaū ĭtnesog; popōwo yakum magkili iye yakum mamnea, im iye yakum mampia; kō kūmūtū kili iye yakum mamnea, kū iye yakum ampia. Kimi kūmūtarū iranda ōveteme sugkū ra nemap; 15kō ya otū mentarū sugkū iran sī neteme. 16Im nagkū yakum nūrian, nūrian enyaū oti tanepo: popōwo tawi yaū ko sī, kō yaū ūndū Nate yemtamūli yaū. 17Dūmūtīyi ra nam alam enugkĭmi, ma numpūvsok en ōveteme endūrū oti itnesog. 18Yaū sī mori yakum tesūwo irag, ĭm Nate mori yemtamūli yaū umnumpūvsok irag. 19Im irora dūmūtagkeli mūmūnūwi pugi mūmōkū, Iye Itemene kĭk? Iesū yemtamsi, Kūtmūtūkili yaū, kū Nate nagkū kūpmūkili yaū kūpmūkili Nate enyaū sugkū. 20Imosū Iesū yemenūwi ūnisog nimo woretaivnepon, pol sugkū yemtavsogi ra tempel: ĭm tawi sī neteme yemetipe nokoven iran; popōwo yetūvelum nimpugon isen,

21Polekū Iesū yemenūwi punora memokū, Yakum mampe, ĭm kimi kwonesorokoyaū, ĭm kimi kwamas ra satindi enugkĭmi; ĭm kimi tawi faneteme worevelum ra nūrū ya umampewi. 22Mōveteme Isrēel dūmūsepen tagkelora, mūmōkū, Iyi asepen talugi Iyi, kū? popōwo Iyi umanūwi memagkū, Ra nūrū mori ya umampewi kĭmi tawi faneteme worevelum. Miyi yōmenūwi punora, memokū, Kĭmi kūmne ĭmpwap, yaū memne ĭmĭluo. 23Kimi kūmne ra nemap, yaū metūmne ra nemap. 24Popōwo imo sugkū ya onūwi pugkūm, mokū, Kĭmi kwamas ra satĭndi enugkĭmi. Popōwo nagkū kĭmi kūtūontavnirĭgi yaū, kĭmi kwamas ra satsū enugkĭmi. 25Mirora dūmūtagkeli, mūmōkū, Kĭk e mē? Iesū yemenūwi punora, memokū, Mori ya umandūnenūwi memagkū ugi. 26Sikat mōmū nam enyaū worenūwi magkū ugi kĭmi, monūrian; kō Iyi mori yemtamūli yaū ĭtnesog; ĭm siamesū mori yaū morigi Iyi yemenūwi, ya umanūwi punora ōveteme omwisū. 27Irora dūmūtūkili ma Iyi yemenūwi punora memokū ugi Itemen. 28Popōwo imo sugkū Iesū yōmenūwi punora memokū, Pol sugkū kĭmi kwandiukisah Netni eni neteme kĭmi kwagkili yaū. Im ya otūmasepen numpi sī se sī; 29ya umanūwi imosū Itemen enyaū yemtavsokoyaū. Miyi mori yemtamūli yaū Iyi ūndū yaū kosĭ, popōwo ya umnumpi imosū mori Iyi umagkū aremī ugi. 30Polekū Iyi yemenūwi imo, sikat dūmūtavnirĭgi Iyi. 31Popōwo imo sugkū Iesū yemenūwi punora oveteme Isrēel mori dūmūtavnirĭgi Iyi, memokū, Nagkū kĭmi kwafĭnte nam enyaū ūnowami, kĭmi ōvun nūrie enyaū ĭtnesog, ĭm kĭmi kwagkili pe ĭtnesog, 32mĭtnesog mori onumpi kĭmi woretūlĭvsaū. 33Irora dūmūnūwi pugi, mūmōkū, Kam ōvun novsen eni Ebraham; ĭm kam letūmlĭvsaū wokon iran sī. Kĭk emanūwi memagkū, onumpi kĭmi woretūlĭvsaū wokon, nokowo? 34Iesū yemtamsi memenūwi, punora, memokū, Itnesog, ĭtnesog, ya umanūwi pugkūm memagkū, Iyi sī umorūnumpi sat, iyi livsaū ra sat; 35miyi lĭvsaū otūmantendōwi ūnisog nimo ĭndōwi, kō iyi Netni umantendōwi ĭndōwi. 36Popōwo imo sugkū, nagkū Iyi Netni omnumpi kĭmi woretūlĭvsaū wokon, anti sugkū irami, 37Ya umagkili ma kĭmi ōvun novsen eni Ebraham, kō kimi kūmosenteri yaū, popōwo tawi sī nūrū ūnōwami nimsin nam enyaū. 38Imo mori yaū mokesi ūndū Itemene yaū, ya umanūwi; ĭm imo mori kĭmi kūmōkesi ūndū ĭtemen enugkĭmi kūmnumpi. 39Irora dūmūnūwi pugi, mūmōkū, Ebraham itemen enugkam. Iesū yōmenūwi punora, memokū, Nagkū kĭmi ōvun netnime eni Ebraham kĭmi pumpi ōvun numpūrah eni Ebraham. 40Kō marima kimi kūmnesenteri yaū mori yemenūwi pugkūm memōkū ugi itnesog, mori yaū morigi Nōbū yemenūwi, Ebraham yetūumpi imo. 41Kĭmi kūmnumpi ōvnumpūrah eni itemen enugkĭmi. Irora dūōmūnūwi pugi, mūmōkū, kam letūmprokomol ugi tampalaū. Itemen enugkam siteven, Nōbū. 42Iesū yōmenūwi punora, memokū, Nagku Nōbū Itemen enugkĭmi kĭmi polentokoyaū ĭt yaū memne ra Nōbū, ĭmpelum; yaū metūsepen nevelum, Iyi yemtamūli yaū. 43Kĭmi kūtūmagkili nam enyaū, irantie? Popōwo kĭmi tawi faneteme woresepen norĭgi nam enyaū. 44Kĭmi kūmne ra ĭtemen enugkĭmi Sētan, ĭm kimi kūmnakiugi worumpi sugkū ōvun nelasivian eni ĭtemen enugkĭmi. Iyi umentalokonda ōveteme marugi ra nōbūm, miyi yetūatekĭsah ugi ĭtnesog popōwo tawi ĭtnesog ūnisog iyi. Pol sugkū sī umanuwi namlī iyi umasepen nenūwi mori eni iyi popōwo iyi neteme namli, im ĭtemen eni sugkū. 45Kō popōwo ya umanūwi ĭtnesog pugkūm kĭmi kūtūmuntavnirĭgi yaū. 46Mē sī ra kĭmi umesesi poyaū worokili ugi sat? Im nagkū ya umanūwi nam ĭtnesog, irantie kūtūmuntavnirĭgi? 47Iyi mori umamne ra Nōbū umandĭgi nam eni Nōbū; kō kĭmi kūtūmandĭgi popōwo kĭmi kūtūmne ra Nōbū. 48Mirora ōveteme Isrēel dūmūnūwi pugi mūmōkū, ka kelenūwives ĭm lokū kĭk neteme Samēria, ĭm sī naviatĭndi iram. 49Iesū yemenūwi, memokū, Tawi sī naviatĭndi irag; ya umesesieves ūnĭpmi eni Itemen enyaū, ĭm kĭmi kūmnumpi sat ūnĭmtūg. 50Kō ya otūmnesorugi nevietevisep nĭsekūg; umante sī mori umnesorugi memnūrian. 51Itnesog, ĭtnesog ya umanūwi pugkūm, memagkū, Nagkū sī afinte nam enyaū, iyi otūamas.

52Mōveteme Isrēel dūomūnūwi pugi, mūmōkū, Marima ka kĭmlagkili ma sī naviatindi iram. Ebraham yimas, mōvum Profet; ĭm kĭk emanūwi, memagkū, Nagkū sī afinte nam enyaū iyi otūamas. 53Kĭk mōmū horog ra Ebraham, ĭtemen enugkam, kū? mori yimas. Mōvun Profet dūmas; kemagkū kĭk e mē? 54Iesū yemtamsi memenūwi, memokū, Nagkū, ya umasepen nevietevisep yaū, nevietevisep wokon; Itemen enyaū umnumpievietevisep, ĭm kĭmi kūmanūwimumagkū Iyi Nōbū enugkĭmi. Kimi kūtūmagkili Iyi; kō ya umagkili Iyi. Im nagkū ya anūwi magkū, 55Ya otūmagkili Iyi ya anti neteme namli sugkū kĭmi. Kō, ya umagkili Iyi ĭm yaumafĭnte nam eni. 56Ebraham itemen enugkĭmi yemavos worokesi dan enyaū; miyi yemokesi mōmavosavos. 57Mōveteme Isrēel dūmūnūwi pugi, mūmōkū, Tawi nevisū fiti iram, ĭm kemokesi Ebraham, kū? 58Iesū yemenūwi punora, memokū, Itnesog, ĭtnesog, ya umanūwi pugkūm, memagkū, Ra nempugon Ebraham yetūte, yaū mesepen nete. 59Popōwo imo sugkū irora dūrumsi nevat mūmōkū wantevi. Kō Iesū yemamon mempe ilat mowi nimo tumpora, memavan ileboteven irora.

Currently Selected:

Yoane 8: ERGNT79

Highlight

Copy