Yoane 7

1Penūri imosū Iesū yemnavan ra Kalĭli; iyi yetūakĭugi woravan ra Yūdia, popōwo oveteme Isrēel dūmūsenteri 2Yemumpotipot sī narigari nirora oveteme Isrēel irora dūmnumpi ugi ōvun tent. 3Popōwo imo sugkū, ravensieme eni dūmūnūwi pugi, mūmōkū, Owi nūrū Igko ĭmpe ra Yūdia, ma ōvun nūrie enugkĭk wagesi ōvun numpūrah enugkĭk mori kemnumpi. 4Tawi sī umnumpi sī se sī memantiumpene, nagkū iyi umnakīugi woretūratumpene ūnimĭnda oveteme. Nagkū kĭk emnumpi imosū esepen sesi kĭk punora oveteme omwisū. 5Ravensīeme eni dūtūtavnirĭgi Iyi. 6Iesū yemenūwi punora, memokū, Nempugon enyaū otūvelum; kō nempugon enugkĭmi ĭndōwi. 7Lō ra nemap ūtūmnakan pugkūm; kō, ūmnakan poyaū, popōwo ya umnumpūvsok ugi irora, memagkū ōvun numpūrah enirora satindi. 8Kĭmi ūvesah ra imo narĭgari; ya otūosah marima ra imo narĭgari popōwo nempugon enyaū otūvelumsū. 9Pol sugkū Iyi yemenūwi punora imo Iyi yemetendōwi ra Kalĭli.

10Penūri ravensieme eni dūmōvesah, Iyi sugkū yivesah ra narigari, tawi ūnimĭnda oveteme, kō sugkū vamon. 11Mōveteme Isrēel dōmosorugi Iyi ra narigari, mūmmūtagkeli, mūmōkū, Yei Iyi? 12Memeti tavuntan sikat ra ōvun numpūn lō popōwo ugi Iyi. Nugkoneme dūmūnūwi mūmōkū, Iyi neteme aremi; ĭm nugkoneme dūmūnfiwi, mūmōkū, Eyi; Iyi umnempiriwokonda ōvun numpūn lō. 13Kō, tawi sī yemenūatumpene Iyi popōwo irora dūmūmtetokonda ōveteme Isrēel.

14Dan ileboteven ra narigari Iesū yivesah mempe ūnisog nimo tumpora memtavsogi. 15Mōveteme Isrēel dūmavlugi, mūmūsepen tagkelora mūmōkū, Imo neteme umagkili ōvun netiyi nokowo? dūtūtavsogi. 16Iesū yemtamsi memenūwi punora, memokū, Nam tavsogi enyaū tawi enyaū; eni Iyi mori yemtamūli yaū. 17Nagkū sī umnakīugi worumpi sugkū tarū eni, iyi agkili ugi nam tavsogi mori, nagkū eni Nōbū, kū nagkū ya umasepen nenūwi. 18Iyi sī umasepen nenūwi umnesorugi nevietevisep nĭsekon; kō iyi sī mori umnesorugi nevietevisep nisekon iyi mori yemtamūli, iyi ĭtnesog, miyi tanepo wokon. 19Mōses yemovugkūm ōvun nempasewugisū, kū? ĭm tawi sī ra kimi umnumpi sugkū ōvun nempasewugi mori. 20Kimi kūmnesenteri yaū, irantie? Numpun lō dūmūnūwi, mūmōkū, sī naviatindi iram; mē umesenterok? 21Iesū yemtamsi memenūwi punora, memokū, Ya umpi sī numpūrah ĭm kĭmisū kwavlugi popōwo ugi imo. 22Mōses yemovugkūm worumpi namon, ĭm imo tawi marugi Mōses, kō yemne marokonda ritemendeme, ĭm kimi kūmnumpi namon iran sī neteme ran danemindog. 23Nagkū kūmnumpi namon iran sī neteme ran danemĭndog mūmagkū kwafĭnte ōvun nempasewugi eni Mōses, kūmnarakī po yaū popōwo ya umpi sī neteme horĭgives wokon ran danemĭndog, kū? 24Utūtarū sugkū kūmagesi wokon; kō, ūtarūgi tarūsū tanepo.

25Nugkon ra irora oveteme Yerūsalem dūmūnūwi, mū mōkū, Imo neteme mori irora ūmnesorugi mūmagkū wontalugi, kū? 26miyi umanūwi ūnimĭnda oveteme mirora ūtūmanūwi sī nam pugi; ōvun natemonok umagkili ĭtnesog ma Iyi Kristo, kū? 27kō kakīmlagkili nūrū imo neteme umnēa; kō, pol sugkū Krĭstō ampelum, tawi sī agkili nūrū Iyi amnēa. 28Popōwo imo sugkū Iesū yemtorenūwisah ūnisog nimo tumpora, polekū Iyi yemtavsokonda, memenūwi, memokū, Kĭmi kūmagkili yaū, ĭm nūrū ya umnēa sugkū; ĭm yaū metūsepen nevelum; kō, Iyi mori yemtamūli yaū, Iyi mori itnesog, kimi kūtūmagkili Iyi. 29Kō ya umagkili Iyi, popōwo yau ĭmpeĭum memne ra Iyi, miyi yemtamūli yaū. 30Mirora dūmosorūgi mūmōkū wandūleki, kō tawi yemelekavi Iyi, popōwo nempugon eni yetūvelum. 31Kō sikat ra irora numpūn lō dūmūtavnirĭgi Iyi mūmūnūwi, mūmōkū, Pol sugkū Krĭstō ampelum Iyi onumpi ōvun numpūrah mōmū horog ra imosū imo neteme umnumpi, kū? 32Mōvun Faresi dūmūrlgi ma numpūn lō dūmūtavuntan mūmōkū imo ugi Iyi; mōvun Faresi mōvun tavsogi tumpora dūmūtamūlora ōvun nivūo worelekavi Iyi. 33Popōwo imo sugkū Iesū yemenūwi punora, memokū, Nempugon virok mōmū ya antelap dal kimi, ĭm ya ōmampe pugi Iyi mori yemtamūli yaū. 34Kĭmi kwonesorokoyaū mūtūagesi, ĭm ra nūrū ya ampe kĭmi kūtūfaneteme worevelum. 35Mōveteme Isrēel dūmūsepen tagkelora, mūmōkū, Iyi mori ampēa ma kos keletūagesi? Iyi ampe punora umnaseviokonda ra nūrūsū enirora ōveteme Krik, montavsokonda oveteme Krik, kū? Tie imo Iyi onūwi mokū ugi, 36kĭmi kwonesorokoyaū, mūtūagesi, ĭm ra nūrū ya ampe Kĭmi kūtūfaneteme worevelum? 37Im ran dan nisah ra narigari, dan nūsian, Iesū yemetūrū memtorenūwisah, memokū, Nagkū sī kū sī umampiumnōk ampelum poyaū mamoneki. Iyi sī umentavnirĭgi 38yaū anti iran sugkū nam mori yemetĭyi memokū, Navūanda nomūrep wontavūandasah ūnōwan. 39Iyi yemenūwi imo memokū ugi Naviat mori irora wampī ūmūntavnirĭgi Iyi; ĭt Iyi Naviat tumpora yetuvelum iranda ra nempugon mori, popōwo Iesū yetūomentorĭmpe ra nilasilaswi eni. 40Popōwo imo sugkū sikat ra irora numpūn lō pol sugkū dūmūrĭgi imo nam, dūmūnūwi, mūmōkū, Itnesog Iyi Profet mori. 41Im nugkoneme dūmūnūwi, mūmōkū, Iyi Krĭstō; kō nugkoneme dūmūnūwi, Nokowo sugkū? 42Krĭstō amne ra Kalĭli kū? Dūmūtīyi, mūmōkū, Krĭstō amne ra novsen eni Dēvĭd ĭm nimote Betlehem, yūi Dēvĭd yemetewi, kū? 43Popōwo ugi imo dūmūtevavwora numpūn lō popōwo ugi Iyi. 44Nugkon ra irora dūmosorugi mūmōkū wandūleki, kō tawi sī yemelekavi Iyi. 45Mōvun nivūo dūmūvelum punora ōvun tavsogi horog mōvun Faresi, mirora dūmūtagkelora mūmōkū Irasie kūtūtōri iyi? 46Mōvun nivūo dūmūnūwi, mūmōkū, Tawi sī yemenūwi sugkū imo neteme īndowi. 47Mōvun Faresi dūōmūtagkelora, mūmōkū, Umnenipiriwugkūm sugkū, kū? 48Ia sī natemonok mori amen tavnirigi Iyi? kū sī neteme Faresi? 49kō imo numpūn lō mori umamgīugi ōvun nempasewugi umnavoret. 50Nĭkodimus, mori yive pugi Iesū pūmrok, Iyi sī ra irora, yemtagkelora, memokū, 51Ovun nempasewugi enugkos umnumpi sī neteme nworepatevi pol sugkū yetūrĭgi nam eni metūkili sie iyi umnumpi kū? 52Irora dūmūtamsi mūmūnūwi pugi, mūmōkū, kĭk sugkū kemne ra Kalĭli, kū? osorugi mokili, popōwo tawi sī profet yemne ra Kalĭli. 53Mirorasū dūmūve enirorawi. Kō Iesū yempe ra numpūo Olivet.

Currently Selected:

Yoane 7: ERGNT79

Highlight

Copy