Génesis 46

Egiptuman Jacob aywanqan

1Tsaypitanam llapan imaykanta apakurkur Egiptuman Israel aywakurqan. Beersebaman chaykurnam taytan Isaac creyikunqan Dios Yayata adorar sacrificiuta altarchö waykarqan. 2Tsay paqasmi Israelta Dios Yaya revelar nirqan: <<¡Jacob, Jacob!>>

Jacobnam nirqan: <<Taytay ¿imallatatan?>>

3Tsaymi Dios Yaya nirqan: <<Taytayki adoranqan Diosmi kä. Egiptuman aywayta ama mantsakuytsu. Tsaychömi qampita miraqkunaman bendicionnïta churashaq atskaman mirar juk nación kayänanpaq. 4Egiptuman aywaptikim kikï paqtayki aywashaq. Wañukuptikipis tsuriki Josémi läduykichö kanqa. Tsaynöllam llapan miraq aylluykikunatapis Egiptupita kikï jorqamushaq>>.

5Beersebapita Egiptuman aywakurmi Faraón apatsinqan carrëtakunaman tsurinkuna lätatsiyarqan taytan Jacobta, pishi wamrankunata y warminkunatapis. 6Canaánchö llapan imaykankunata apakurkur y wäkankunata, üshankunata qatikurkurmi Egiptuman aywakuyarqan.#Hech. 7.15. 7Tsaynöpam llapan tsurinkunawan y willkankunawan Egiptuman Jacob chäyarqan.

8Egiptuman aywaq Israel runakunapa shutinkunam karqan:

Jacobpa mayor kaq tsurin Rubén;

9Rubénpa tsurinkuna Enoc, Falú, Hezrón y Carmi;

10Simeónpa tsurinkuna Jemuel, Jamín, Ohad, Jaquín, Zohar y Saúl (Saúlmi cananea warmipa wawan karqan);

11Levípa tsurinkuna Gersón, Coat y Merari;

12Judápa tsurinkuna Er, Onán, Sela, Fares y Zara (Erwan Onánmi Canaánllachöna wañukuyashqa kayarqan);

Farespa tsurinkuna Hezrónwan Hamul;

13Isacarpa tsurinkuna Tola, Fúa, Job y Simrón;

14Zabulónpa tsurinkuna Sered, Elón y Jahleel.

15Paykunam kayarqan Jacobpa warmin Leapa wawankuna y willkankuna. Leapa ollqu wawankunam Padan-aramchö yuriyarqan. Tsaynöllam wawan Dinapis tsaychö yurirqan. Leapa wawankuna y willkankunam kayarqan kimsa chunka kimsa (33) warmipis y ollqupis.

16Tsaynöllam Egiptuman aywayarqan Gadpa tsurinkuna Zifión, Hagui, Suni, Ezbón, Eri, Arodi y Areli;

17Aserpa tsurinkuna Imna, Isúa, Isúi y Bería (paykunapa paninmi karqan Sera);

Beríapa tsurinkuna Heberwan Malquiel.

18Paykunam kayarqan Zilpapa wawankuna y willkankuna. Zilpam karqan Leapa serviqninpaq taytan Labán qaranqan. Zilpapa wawankuna y willkankunam kayarqan chunka soqta warmipis y ollqupis.

19Tsaynöllam Egiptuman aywayarqan Jacobpa warmin Raquelpa wawan José y Benjamín.

20Warmin Asenatchömi Josépa tsurinkuna Manasés y Efraín kayarqan.#Gén. 41.50-52. Paykunam Egiptuchö yuriyarqan. Asenatmi karqan On markachö täkuq sacerdöti Potiferapa tsurin.

21Benjamínpa tsurinkunam kayarqan Bela, Bequer, Asbel, Gera, Naamán, Ehi, Ros, Mupim, Hupim y Ard.

22Paykunam Jacobpa warmin Raquelpa wawankuna y willkankuna kayarqan. Paykunam chunka chusku kayarqan.

23Tsaynöllam Egiptuman aywayarqan Danpa tsurin Husim;

24Neftalípa tsurinkuna Jahzeel, Guni, Jezer y Silem.

25Paykunam Bilhapa wawankuna y willkankuna kayarqan. Bilhaqa Raquelpa serviqninpaq taytan Labán qaranqanmi karqan. Tsay warmipam wawankuna y willkankuna qanchis kayarqan.

26Egiptumanmi Jacob tsurinkunawan y willkankunawan soqta chunka soqta (66) chäyarqan. Paykunawanmi tsurinkunapa warminkunapis aywayarqan. 27Josépa ishkay tsurinkunanam Egiptuchö yurishqa kayarqan. Paykunatawan yupayaptinmi Egiptuchö Israel runakuna qanchis chunkana (70) kayarqan.#46.27 Septuaginta niyanqan unay griego traduccionchömi qanchis chunka pitsqa (75) kanqanta nin. Tsaynöllam Hech. 7.14 nin.

Gosénman Jacob chanqan

28Gosénman chaykarnam tsurin Judáta Jacob mandarqan Joséta willar ninanpaq: <<Taytantsikwan tinkuqshi aywanki>>.

Tsaypitaraqmi Gosénman Jacob charqan. 29Josénam cawalluwan qarachätsina carrëtanta alistaskatsir taytanwan tinkuq aywarqan. Taytanwan tinkuskirmi abrazanakurkur waqayarqan. 30Tsaymi Joséta Israel nirqan: <<Hïju, kananmi sïqa kawaykaqta rikaykurniki y kikïwan tinkushqanaqa jina wañukushaqpis>>.

31Tsaypitanam wawqinkunata y wakin kaq ayllunkunata José nirqan: <<Chäyämunqaykita willanäpaq aywä Faraón kaqpa. Paytam nishaq: <Canaánpitam taytäwan wawqïkuna y wakin kaq ayllükunapis chäyämushqa. Paykunam shayämushqa cercächö täkuyänanpaq. 32Tsaymi llapan imaykankunata apakurkur üshankunatawan cabrankunata y wäkankunatapis qatikurkur chäyämushqa. Paykunaqa wätakuna mitsikuyllatam yachayan>. 33Faraónta willaykuptï imachö aruyanqaykita tapuyäshuptiki 34niyanki: <Noqakunaqa unay ayllükunanömi wamra kayanqäpita wäta mitsiyllata yachayä>. Tsaymi üsha mitsikuq runakunata Egipto runakuna melanäyaptin Gosén partichö kaman täkuyänaykipaq rikätsishunki>>.

Currently Selected:

Génesis 46: qxn

Highlight

Copy