Génesis 45

Wawqinkuna kanqanta José willanqan

1Judá tsaynö rugaptinmi José awantarqannatsu wawqinkuna kanqanta willayta. Tsaymi serviqnin runakunata nirqan: <<¡Kaypita llapayki yarquyay!>>

Serviqninkuna yarquskiyaptinnam wawqinkunallawanna José quëdarqan.#Hech. 7.13. 2José qayaraypa waqanqantam Egipto runakunapis wiyayarqan. Tsaynöllam Faraónpa palaciunchöpis musyayarqan.

3Tsaypitanam José nirqan: <<Wawqikikuna Josémi kä. ¿Rasunpaku taytä kawaykanraq?>>

Josépa lädunchö kaykäyanqanta musyaskirmi wawqinkuna alläpa mantsakar ni imanakayta puëdiyarqantsu. 4Peru Josénam nirqan: <<Lädüman witiyämuy>>.

Witiykuyaptinnam nirqan: <<Egiptuman rantikayämanqayki wawqikikunam kä. 5Rantikayämanqaykipita amana llakikuyaytsu ni jitapunakur mana alli ñawikikunawan rikänakuyaytsu. Dios Yayam kayman puntaykikunata kachamashqa muchuywan runakuna mana wañuyänanpaq. 6Ishkay watanam maytsaychö muchuy. Tsaynöllam pitsqa wata masraq muchuy kanqa. Muruyaptinpis manam mikuykuna wayunqatsu. 7Tsaynö kananpaqmi puntaykikunata Dios Yaya kachamashqa muchuywan mana ushakäyänaykipaq. Tsaynöpam qamkunapita miraqkunapis ushakäyankitsu. ¿Piraq ichikllatapis yarpanman karqan Dios Yaya tsaynö permïtinanpaq? 8Dios Yaya munaptinmi mana tantiyaykarpis rantikayämarqayki. Kay nacionchömi Faraón churamashqa mandakäsinäpaq, wajinta rikänäpaq y Egipto runakunapa gobernadornin kanäpaq.

9<<Taytä kaqman saslla kutir willayay: <Tsuriki Josétam Dios Yaya churashqa Egipto runakunapa gobernadornin kananpaq. Tsayshi saslla tinkunaykipaq aywashun. 10Wañukunqaykiyaq José rikäshunaykipaqshi imaykantsiktapis aparkur llapan willkaykikunawan y wätaykikunawan Gosén partiman aywakushun. 11Tsay nacionchö yanapamashqash mikuynintsik ni imaykantsikpis faltämäshuntsu. Pitsqa wata masraqshi muchuy kanqa>.

12<<Tsaynö niyanqaqtam wawqï Benjamínwan llapayki wiyaykäyämanki. 13Taytäta willayanki kay Egiptuchö llapanpis respitayämanqantawan llapan rikäyanqaykita. Sas aywar taytäta pushayämuy>>.

14Tsaypitam Joséwan Benjamín abrazanakurkur waqayarqan. 15Tsaynöllam wakin kaq wawqinkunatapis mutsaykurnin abrazarkur José waqarqan. Tsaypitam manana mantsapar Joséta wawqinkuna parlapäyarqan.

Egiptuchö täkunanpaq Jacobta Faraón qayatsinqan

16Josépa wawqinkuna chäyämunqanta musyaskirmi llapan mandäsiqninkunawan Faraónpis kushikurqan. 17Tsaymi Joséta Faraón nirqan: <<Wawqikikunata niy ashnunkunata chaqnarkur Canaánman kutiyänanpaq. 18Llapan ayllunkunatawan taytaykikunata kayman pushayämutsun. Kaychömi mas allin kaq partita entregashaq tsaychö täkuyänanpaq. Tsaynöllam kay nacionchö mas allin kaq mikuykunatapis mikuyanqa. 19Tsaynölla manday kaypita carrëtakunata aparkur warmikunatawan wamrakunata y taytaykitapis apayämunanpaq. 20Llapan imaykankunata mana apamuyta puëdirqa ama llakikuyätsuntsu. Egiptuchö mas alli kaqkunatam chaskiyanqa>>.

21Israelpa#45.21 Israelmi Jacobpa jukaq shutin. tsurinkunam José ninqannölla llapanta rurayarqan. Faraón ninqannöllam carrëtakunata José apatsirqan. Nänichö mikuyänanpaqpis millkapankunam ruratsirqan. 22Tsaypitam wawqinkunata mushuq llatapankunata qararqan. Benjamíntanam kimsa pachak (300) siclo qellayta y pitsqa möday llatapan qararqan. 23Taytanpaqmi chunka ashnukunawan Egiptuchö imaykapis mas allin kaqkunata apatsirqan. Tsaynöllam chunka china ashnukunawan trïguta, tantata y wakin mikuykunatapis apatsirqan Egiptuman aywar nänichö mikuyänanpaq. 24Wawqinkunata despacharmi José nirqan: <<Cuidädutaq nänichö piñanakur aywayankiman>>.

Tsaynö yätsiskiptinmi aywakuyarqan.

25Egiptupita kutirmi taytan Jacob täkunqan Canaánman chäyarqan. 26José kawaykanqanta y Egiptuchö mandakuq kanqanta willaykuyaptinmi Jacob ni ima niyta mana puëdir willayanqantapis creyirqantsu. 27José llapan ninqanta willayaptinmi carrëtakuna apatsinqanta rikaykur alläpa kushikurqan. 28Tsaymi nirqan: <<¡Kananmi musyaskillä tsurï José kawaykanqanta! ¡Manaraq wañukur tsurïwan tinkunäpaq sas aywashaq!>>

Currently Selected:

Génesis 45: qxn

Highlight

Copy