Génesis 44

Josépa väsunta Benjamínpa costalninchö tarinqan

1Josémi mas confiakunqan serviqninta mandar nirqan: <<Kay runakunapa costalninkunaman trïguta junta wiñaparkur pägayäshunqayki qellayta costalninkunapa shiminman wiñarpunki. 2Tsaynölla tapshi kaq runapa costalninpa shiminman trïgupaq pägakunqan qellayta y qellaypita rurashqa väsüta wiñarpunki>>.

Tsaymi José mandanqannölla tsay serviqnin llapanta rurarqan.

3Patsa waraskiptinnam wawqinkuna kutikuyänanpaq despachaptin chaqnakurkur aywakuyarqan. 4Tsay markapita yarquskir amänullataraq aywaykäyaptinmi mas confiakunqan kaq serviqninta mandar José nirqan: <<Tsay trïgu rantiq runakunapa qepanta qatipar ayway. Taripaykur ninki: <Qamkunawan patronnï alli kaykaptin ¿imanirtan qellaypita rurashqa väsunta suwapayämushkanki? 5Tsay väsum karqan patronnï upyananpaq y adivinänanpaq. Tsaytam mana allita rurar suwapayämushkanki> >>.

6Patronnin ninqannölla aywar runakunata taripaykur niptinmi 7paykuna niyarqan: <<¿Imanirtan tsaynö tumpayämanki? Tsaytaqa ¿imanötaqshi rurakäyäman? 8Costalnïkunapa shiminchö tariyanqä qellaytapis markäkuna Canaánpitana kutiykätsiyämurqa ¿imanötaqshi patronnikipa wajinpita qellaynin y qorintapis suwapayämüman? 9Mayqäpa costalnïkunachöpis väsuta tariptikiqa wañutsun. Wakïkunapis patronnikipa serviqninmi quëdayäshaq>>.

10Tsaynam mas confiakunqan serviqnin nirqan: <<Niyanqaykinö katsun. Mayqayki karpis tsay väsuta katsiq kaqllam serviqnïpaq quëdanqa. Wakikiqa markaykikunamanmi kutikuyanki>>.

11Tsaymi cargankunata paskaskir cada ünu costalninkunata kichapuyarqan. 12Mayor kaqpa costalninpita tapshi kaqpa costalninyaq ashirmi Benjamínpa costalninchö väsuta tarirqan. 13Tsaymi alläpa mantsakar llatapankunatapis rachiskir jina höra ashnunkunata chaqnakurkur José kaykanqan markaman kutiyarqan. 14Wawqinkunawan Judá kutirmi Joséta wajillanchöraq tariskir jankat mantsakashqa puntanman pelatakuykuyarqan.

15Paykunatam José nirqan: <<¿Imanirtan suwapayämashkanki? ¿Manaku musyayanki adivïnu kar imatapis musyanqäta?>>

16Tsaynam Judá nirqan: <<Taytay, manam ni ima niynikita puëdiyätsu. Jutsata ruraykaqtam#44.16 Josépa väsunta mana suwaykarpis Judámi reconöcirqan wawqinta unay rantikunqanpita jutsayuq kanqanta. Tsaymi nirqan: Jutsata rurayanqätam Dios Yaya rikäyämashqa. Tsaypaq masta musyanaykipaq liyinki Gén. 42.21-22. Dios Yaya rikäyämashqa. Kananqa väsuykita katsiqwan llapäkunach serviqniki kayäshaq>>.

17Josénam nirqan: <<Manam llapaykiqa serviqnï kayankimantsu. Väsüta suwaq kaqllam serviqnïqa kanqa. Wakikiqa taytaykikuna kaqpa kutikuyay>>.

Benjamínpaq Judá rugakunqan

18Tsaynam Josépa lädunman witiykur Judá nirqan: <<Taytay, qammi kaychö mandakuq kikin Faraónnö kanki. Rugakuptiq mana piñakurlla wiyaykallämay. 19Puntata shayämuptïmi tapuyämarqayki taytäkuna kawanqanta y wawqïkuna mas kanqanta. 20Tsaynö tapuyämaptikim willayarqaq taytäkuna kawanqanta y awkinna kaykaptin tsurin yuriqpis jövinllaraq kanqanta. Tsaynöllam willayarqaq tsay mamapita juk wawqïkuna wañushqana kanqanta y tapshi kaq wawqinllana kawaptin taytäkuna alläpa kuyanqanta. 21Qammi niyämarqayki tapshi wawqïkunata reqinaykipaq pushayämunäpaq. 22Tsaymi niyarqaq: <Tsay tsurinta pushayämuptïqa llakikuypitach taytäkuna wañunmanpis>. 23Tsaynö nikäyaptiqpis qammi niyämarqayki payta mana pushayämuptïqa mana chaskiyämänaykipaq.

24<<Tsaymi taytäkuna kaqman kutiykur llapan niyämanqaykita willayarqä. 25Tsaypitanam taytäkuna yapay trïgu rantiq kachayämarqan. 26Peru noqakunanam niyarqä: <Manam kutiyätsu wawqïkunata mana pusharqa. Tapshi kaq wawqïkunata mana rikarqa tsay mandakuq runa manam chaskiyämanqatsu>. 27Tsaymi taytäkuna niyämarqan: <Musyayankim tsay mamapita ishkaylla tsurïkuna kayanqanta. 28Jukaq tsurïtam yarqunqanpita kananyaq rikätsu. Rasunpachari chucaru wäta mikushqa. 29Tapshi kaq tsurïta pushayaptiki imapis päsaptinqa qamkunam jutsayuq kayanki llakikuywan wañuptï> >>.

30Tsaypitam Judá nirqan: <<Kay tsurintam taytä alläpa kuyan. Payta mana kutitsiyaptïqa 31llakikuywanchi wañunqa. Tsaynö wañunanpaq noqakunam jutsayuq kayäshaq. 32Taytätam prometishkä imaykanöpapis tsurinta kutitsinäpaq. Tsaymi nirqä tsurinta mana kutitsirqa wañunqäyaqpis jutsayuq kanäpaq. 33Tsaymi taytay, rugallaq tapshi kaq wawqïpa rantin serviqniki quëdanäpaq. Payqa wawqïkunawan taytä kaqman kutikutsun. 34Tapshi kaq wawqï mana kutiptinqa ¿imanötan taytä kaqman kutïman? Manam munätsu taytä llakikunanta>>.

Currently Selected:

Génesis 44: qxn

Highlight

Copy