Génesis 43

Egiptuman Benjamínta pushayanqan

1Entëru Canaánchö alläpa muchuy kaptinmi 2Egiptupita apayämunqan trïgu ushakaskiptin tsurinkunata Jacob nirqan: <<Wallkallatapis trïgu rantiq yapay kutiyay>>.

3Judánam nirqan: <<Egiptuchö trïgu rantikuq runam niyämarqan: <Tapshi kaq wawqikikunata mana pushamurqa ama kutiyämuypistsu>. 4Wawqï Benjamín noqakunawan aywaptinqa yapaymi trïgu rantiq aywayäshaq. 5Peru mana munaptikiqa manam aywayätsu. Ninqaqnöpis tsay mandaq runam niyämashqa: <Shullka kaq wawqikikunata mana pushamurqa ama kutiyämunkipistsu> >>.

6Tsaymi Israel nirqan: <<Alläpa llakikunäpaq ¿imapaqtan tsay runata willayashkanki tapshi wawqikikuna kanqanta?>>

7Tsaynam paykuna niyarqan: <<Tsay runam pï aylluntsik kanqanta musyayta munar tapuyämarqan: <¿Taytaykikuna kawanku? ¿Mas wawqikikunapis kanku?> Tsaynö tapuyämaptinmi rasunpa kaqllata willayarqä. ¿Maypitatan musyayäman karqan <wawqikikunata apayämuy> niyämänanpaq kaqta?>>

8Tsaymi taytanta Judá nirqan: <<Taytay, mallaqaypita mana wañunapaq paqtäkuna Benjamín aywatsun. Noqam imaykapitapis cuidashaq. Aywananta äniptikiqa sasmi aywayäshaq. Tsaynöpam noqantsikwan wamrantsikkunapis mallaqaypita wañushuntsu. 9Wamraykita imapis päsaptinqa noqam jutsayuq kashaq. Payta mana kutitsimuptïqa wañunqäyaqpis ama perdonamankitsu. 10Egiptupita chaykamur willanqaqpitana wamraykita pushayänäpaq äniptikiqa unaynam ishkay kutipis aywar kutiyämümanna karqan>>.

11Taytannam nirqan: <<Tsaynö kaptinqa ¿imanäshuntan, hïju? Egiptuchö mandakuqta qarayänaykipaq kaypita allin kaqkunata apayay: balsamuta, abëjapa mishkinta, perfümita, mïrrata, nueciskunata y almendraskunata. 12Pägayanqayki qellay kutitsiyämushunqaykitawan masta aparkur trïgu rantiq kutiyay. Chaykur kutitsiyämushunqayki qellayta kikinta entregayanki. capazchi pantar costalnikikunaman wiñäyämushqa. 13Tapshi wawqikikunata pusharkur sas aywayay tsay mandakuq runaman. 14Dios El-Shaddai#43.14 El-Shaddai ninanqa poderösu Dios ninanmi. tsay mandakuq runata tantiyaykatsitsun llakipäyäshurniki Simeóntawan Benjamínta dëjapuyäshunaykipaq. Llapan tsurïkunata oqranä kaptinpis imanäshaqtan. Tsaynöchi kallanqa>>.

15Jacob yätsiptinmi mandakuq runapaq qarayta alistayarqan. Tsaymi qellayta aparkur y wawqinkuna Benjamínta pusharkur Egiptuman aywayarqan. Chaykurnam Josépa despächunman yaykuyarqan. 16Benjamínta wawqinkunatawan rikaykurmi wajinchö mas confiakunqan serviqninta José nirqan: <<Kay runakunata wajïman pushay. Paykunawan kanan junaq mikuyänäpaq wäkata pishtay>>.

17Tsaynö niptinmi serviqnin runa Josépa wajinman pusharqan. 18Tsaynö pushaptinmi alläpa mantsakar kikinpura ninakuyarqan: <<Punta shamunqantsikchö qellaynintsikta kutitsimanqantsikpitam yachayllapa pushaykämantsik. Kananqa alli maqaykamarnintsikmi ashnuntinta serviqnin kanapaq quëdatsimäshun>>.

Josépa wajinchö wawqinkuna mikuyanqan

19Alläpa yarpachakur Josépa wajinman chaykurmi servikuqta rugar niyarqan: 20<<Taytay, musyanqaykinömi puntatana trïgu rantiq shayämurqä. 21Kutikurnin patsakurmi qepïkunata paskapakur cada ünu costalnïkunapa shiminchö tariyashkä pägayanqaq qellay complëtu kaykaqta. Tsay qellaytam entregayänaqpaq kutitsiyämushkä. 22Apartim qellayta apayämushkä trïguta yapay rantiyänäpaq. Peru manam musyayätsu tsay qellayta costalnïkunaman pï wiñämunqantapis>>.

23Tsaynam servikuq nirqan: <<Ama mantsakäyaytsu. Taytaykikunawan confiakuyanqayki Diosmi tsay qellayta costalnikikunaman churamushqa kanqa. Pägayämanqayki qellaytaqa llapantam chaskiyarqaq>>.

Tsaynö niskirmi Simeónta carcelpita jipiskamur wawqinkuna kaqman pusharqan. 24Josépa wajinman chaykatsirmi chakinkunata mayllakuyänanpaq yakuta qararqan. Tsaynöllam ashnunkunatapis qewata qararqan. 25Josépa wawqinkunanam musyayarqan paykunawan almuerzaq José chänanpaq kanqanta. Tsaymi qarayänanpaq apayanqankunata alistakushqa shuyaräyarqan.

26Wajinman José chaykuptillannam llapan qaray apayanqankunata entregar urkunkunapis patsaman töpanqanyaq qonqurpakuyarqan. 27Tsaymi imanö kaykäyanqanta tapurnin José nirqan: <<Punta shamunqaykichömi willayämarqayki taytaykikuna awkinna kanqanta. ¿Imanötan pay kaykan? ¿Kawaykanraqku?>>

28Tsaynö tapuptinmi llapan qonqurikuykur niyarqan: <<Awmi taytay, taytäkuna allillam kaykällan. Payqa kawaykällanraqmi>>.

29Paykunata José rikapaykarmi wawqin Benjamínta rikaykurqan. Benjamínwan Joséqa tsay mamallapita y tsay taytallapitam kayarqan. Wawqinkunatam tapurqan: <<¿Payku qepa kaq wawqikikunapaq willayämanqayki?>>

Tsaynö tapuskirmi Benjamínta José nirqan: <<¡Hïju, Dios Yaya yanapaykulläshuy!>>

30Wawqinta rikaykur Josépa shonqun jaqayaptinmi cuartunman yaykuskir waqarqan. 31Waqar päraskirmi qaqllanta mayllakuskir yarqamurqan. Tsaypitanam mikuyta serviyänanpaq serviqninkunata nirqan.

32Tsaymi juk mësaman Joséta serviskir jukaq mësaman wawqinkunata serviyarqan. Tsaynöllam juk mësamanna tsaychö mikuq Egipto runakunatapis serviyarqan. Tsaynö kaman kaman servikuyarqan Egipto runakunawan hebreo runakuna paqta mikuyanqan penqakuypaq kaptinmi. 33Mësamannam wawqinkunata José jamatsirqan mayorpita qallaykur shullka kaqyaq. Tsaynö jamatsiptinmi kikinkunapura mantsakashqa rikapänakuyarqan. 34Josémi mikunanpaq qarayanqanpita wawqinkunata yaparqan. Peru Benjamíntaqa wakin kaq wawqinkunapitapis masmi mikutsirqan. Tsay junaqmi alläpa kushishqa llapan wawqinkunawan José mikupakurqan y upyapakurqan.

Currently Selected:

Génesis 43: qxn

Highlight

Copy