ZEKALIYA 9
9
Omu navakapayisa vaka-mafuci anahateko
1Eci cikiko citeli calizu lyaYehova cahalifuci lyaHatalake, kaha kuNdamaxiku kukiko kuma nacikatwamanga (mwomwo meso avatu veka nawawa amiyaci yaIsalele yosena anatale kuli Yehova, xikaho),
2kaha kuli Hamate nawa, likiko lyalihata nalyo, naTule naXitone, mwomwo ali namangana cikuma, xikaho.
3Tule lyalitungilile muma mwangolo, lyalilunjikilile palata nge lukungu, naulu wakutomesa nawa nge malova akujijila.
4Kumana, Mwata mwakalifumisa kuluheto lwalyo, ngolo jalyo mwakajiveta mukalungalwiji, kaha likiko navakalilya kukakahya.
5Axakelone nalikacimona nakwivwa woma, naNgaza nawa nakusalwomwoka cikuma, naEkelone nawa, mwomwo kufwelela calyo navakacivwisa sonyi, xikaho. Kaha mwangana mwakanonga kuNgaza, kuAxakelone kakwexi kukatwama mutuko.
6KuAxatote nakukatwamanga wakusemuwa kuujila, kaha utangalaji wavaFwilixite nangukautetako.
7Manyingenyi nangukawafumisa mukanwa kenyi, vyuma vyenyi vyaunyengwe nangukavifumisa mumazo enyi, kaha naikiye nawa mwakapwanga wakusalaho waKalunga ketu, mwakapwanga nge mwangana muYuta, kaha Ekelone nalikapwanga nge kaYevuse.
8Nangukatunga cilombo cami kuzuvo yami nakwimanyina lizavu, mangana vakahonenga kuhitamo cipwe kukinduluka. Muli vakivo kamwexi kukahita ceka muka-kuxinyinyikako. Mwomwo jino ngunamono lyehi nameso ami, xikaho.
Mwangana waZeyone ou mwakapwangako
9Ove mwanaZeyone, kinyinyina cikuma. Ove mwanaYelusalema, likuwe. Tala, #Mateu 21.5; Yowa. 12.15.mwangana wove mweza kuli ove. Napu wakwoloka, ali naulwilo. Napu wamuvwovu, ali nakutambuka hacimbulu, halivuvu lyamwanacimbulu.
10Kaha nangukatetako matemba kuEfwalime, natuvalu nawa kuYelusalema. Mata amanana ajita navakawatetatetako. Kaha mwakahanjika #Mika 4.2-4.kuunda kuli vaka-mafuci. Wata wenyi naukapwanga kufumisa kukalungalwiji mbwe nakukalungalwiji mukwavo, kufumisa kuKalwiji mbwe nakujisongosongo jamavu.
11Kaha nayove nawa, #Kulo. 24.8; Hepe. 10.29.hamanyinga aluxiko lwove, xikaho vafunge jove ngunavasuula lyehi muwina mwazeneka meya.
12Kindulukenu #Yele. 16.19; Yowe. 3.16.mwangolo, enu vafunge vakutalilila. Cipwe lelo nguli nakumilweza ngwami, Nangukamixixixilamo kavali.
13Mwomwo ngunalizembela lyehi Yuta, ngunapacikiza lyehi Efwalime muuta, kaha nangukasangumuna vana vove, ove Zeyone, kuli vana vove, ove Helase. Nangukakulingisa kupwa nge upoko yacindume yamukwale.
14Yehova mwakamweneka helu lyavo. Mwivwi wenyi naukalovoka nge muveso. Mwata Yehova mwakemba luneta, kaha mwakaya navijimbilanganga vyakusulo.
15Yehova wamayongomena mwakavakinga, kaha navakalyalya nakulyatangila malolwa akuvikapa vyakwaxisa. Navakanwa nakuzungumuka nge havinyo, navakasula nge vitasu, nge mavinji alijiko lyakulumbila.
16Kalunga kavo Yehova mwakavalwila halikumbi lize mwautanga wavatu jenyi, mwomwo navakapwanga nge malolwa akumucama, vakuzunduka helu lyalifuci lyenyi.
17Omwo catohwela kuwaha cenyi! Nomwo watohwela upahu wenyi! Kulya camanona nacikavafukisanga vakweze, wala wamihako yavinyo naukavafukisanga vasanda jamapwevo.
Currently Selected:
ZEKALIYA 9: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
