ZEKALIYA 8
8
Yelusalema navakaliwahisa ceka
1Jino lizu lyaYehova wamayongomena lyejile kuli ami ngwenyi,
2Yehova wamayongomena nambe ngwenyi, Zeyone ngunalisungwila lisungu lyalinene, ngunalisungwila nakulundundu yayinene.
3Yehova nambe ngwenyi, Ngunakinduluka lyehi kuZeyone, kaha nangutwamanga muYelusalema. Yelusalema navalivulukanga ngwavo, Limbo lyamucano, kaha pili yaYehova wamayongomena navayivulukanga ngwavo, Pili yajila.
4Yehova wamayongomena nambe ngwenyi, Mujijila jaYelusalema namwiza kutwama tuxinakaji twamalunga navava vamapwevo, mutu himutu namukombo wenyi kulivoko lyenyi hakuvula camakumbi enyi.
5Kaha kujijila jalimbo nakukasula navanyike vamalunga navava vamapwevo vali nakuhema mujijila jalyo.
6Yehova wamayongomena nambe ngwenyi, Kaci nge cinapu cakukomwesa mumeso avatu ava vanasaleho makumbi ano, kaha cipwenga nawa cakukomwesa mumeso ami nawa? Mukiko mwanehula Yehova wamayongomena.
7Yehova wamayongomena nambe ngwenyi, Ivwenu, vatu jami nangukavalwila kulifuci lyakumwizakumbi nakulifuci lyakumuyakumbi.
8Nangukavaneha, kaha navakatwamanga muYelusalema. Navakapwanga vatu jami, kahAmi nangukapwanga nguKalunga kavo, mumucano namukwoloka.
9Yehova wamayongomena nambe ngwenyi, Mavoko enu alikolezezenga, enu mweji kwivwanga mazu awa makumbi ano kutunwa twavapolofweto vaze vapwileko halikumbi lize valile cihela cazuvo yaYehova wamayongomena, eyi tembele, mangana vayitungenga.
10Mwomwo ximbu apwile makumbi aze acili kanda, kakwapwile fweto yamutuko, cipwe fweto yakanyama. Kuli ou alovokele cipwe kuli ou engilile kakwapwile kuundako, mwomwo hali muka-kole. Mwomwo ngwalingixile vatu vosena kulimanyina nakole, mutu himutu namukwavo, xikaho.
11Oloze kangwexi kupwa jino nge hamakumbi akulivanga kuli vatu ava vanasalehoko. Mukiko mwanambe Yehova wamayongomena.
12Mwomwo nakupwanga mbuto jakuunda. Mivinyo nayihananga mihako yayo, mavu nawahanangevi vyakwimaho, melu nawahananga mume wawo, kaha vatu ava vanasaleho nanguvalingisa kuswana vyuma vyosenevi.
13Kaha nacikasoloka, nganomu mwapwilenga mucangu muli vakamafuci eka, enu vakuzuvo yaYuta nenu vakuzuvo yaIsalele, mukiko munangukamilwilila, kaha namukapwanga mukukisula. Kanda mwivwa womako, mavoko enu alikolezezenga.
14Mwomwo Yehova wamayongomena nambe ngwenyi, Nganomu ngwajinyine kumipihisa omu vangusowangijilenga vakaka jenu (mukiko mwanambe Yehova wamayongomena), nomu ngwakanyine kwalumukamo,
15ngoco mungunajinyi ceka hamakumbi ano ngwami, Nguwahisenga Yelusalema nazuvo yaYuta. Kanda mwivwa womako.
16Evi vyevi vyuma namulinganga. Hanjikenunga mutu himutu mwamucano namukwavo, yulenunga ciyulo camucano cakuunda muvikolo vyenu.
17Kanda mukajina mutu umwe kupihisa mukwavo mumicima yenuko, kanda mukazanga kulixinga cakwongako. Mwomwo vyosenevi vinapu evi #Vixi. 6.16-19.ngwahunga. Mukiko mwanambe Yehova.
18Lizu lyaYehova wamayongomena lyejile kuli ami ngwenyi,
19Yehova wamayongomena nambe ngwenyi, Kulitwamina kulya cahakakweji #Vamya. 2, 25.3, 4; Yele. 39.2.wamuciwana, nakulitwamina kulya cahali ou #7.3.wamucitanu, nakulitwamina kulya cahali ou #7.5; Vamya. 2, 25.25.wamucitanu navavali, nakulitwamina kulya cahali ou wakusokesa #Yele. 52.4.mulikumi, navikapwanga cisambo nakuwahilila kuzuvo yaYuta, hiviwanyino vyamwaza, xikaho Zangenunga mucano nakuunda.
20Yehova wamayongomena nambe ngwenyi, Naciza kusoloka, nakukeza vatu veka naveka, vaze vatwama kumembo amavulu,
21kaha vaze vatwama kwimbo limwe navakaya kulikwavo nakuvamba ngwavo, Twatuyenunga cakuya tukamulembelele Yehova atutale nalikoji, tukamutonde Yehova wamayongomena, hinatuya nayetu nawa.
22Nakukeza #Isa. 2.2, 3.vatu veka naveka vavavulu, nakukeza vaka-mafuci vakujikiza, nakumutonda Yehova wamayongomena kuYelusalema, nakumulembelela Yehova avatale nalikoji.
23Yehova wamayongomena nambe ngwenyi, Kumakumbi aze nacikasoloka, nakukalinjilila malunga likumi vakumalimi avaka-mafuci osena, navakalinjilila sanya yamutu wakaYuleya ngwavo, Natuya nayenu hamwe, mwomwo tunevu ngwavo, Kalunga ali kuli enu, xikaho.
Currently Selected:
ZEKALIYA 8: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
