ZEKALIYA 10
10
Omu mwakalwila Yehova vatu jenyi
1Mulombenu Yehova vula hamwaka wavula yakukuminyina, kuli Yehova Ou eji kutenganga miveso, kaha mwakavahana jivula, mwakahana mwila kuli mutu himutu mucipapa.
2Mwomwo vakixi vanahanjika lyehi mwaufwefwelekete, vaka-kutaha vanamono lyehi mwakwonga. Vanambulula lyehi vilota vyamakuli, veji kuhanjikanga nakuvendejeka mwaufwefwelekete. Xikaho veji kuliyilanga kwavo nge vimuna vavandende, veji kumonanga malwa, mwomwo kakwexi kafungako, xikaho.
3Ngunakwate utenu kuli tufunga, kaha nangukavazangamisa vizamba javapembe. Mwomwo Yehova wamayongomena nalakana lyehi utanga wenyi zuvo yaYuta, mwavalingisa kupwa nge kavalu kenyi waupahu kujita.
4Kuli Ikiye kukiko nalikafuma lilolwa lyamumbango, kuli Ikiye kukiko nalukafuma lumbambo, kuli Ikiye kukiko naukafuma uta wamanana wakujita, kuli Ikiye kukiko navakafuma vaka-kuyula vosena hamwe.
5Navakapwanga nge vindume, nakulyatangila vaka-kole javo mumalova amujijila kujita. Navakalwa, mwomwo Yehova ali navo hamwe, kaha navakavevwisa vaka-kutambuka hatuvalu sonyi.
6Vakuzuvo yaYuta nangukavahana undume, vakuzuvo yaYosefwe nangukavalwila, nangukavakindulwisa, mwomwo ngunavevwila keke, kaha navakapwanga nge kangwavambilileko. Mwomwo Ami yami Kalunga kavo Yehova, kaha nangukavevwilila, xikaho.
7Vaze vaEfwalime navakapwanga nge vindume, micima yavo nayikawahililanga nge havinyo. Vana vavo navakacimona nakuwahilila. Micima yavo nayikakinyinyinanga muli Yehova.
8Nangukavasanyikila mumuloji nakuvahomesa, mwomwo ngunavakulu lyehi, xikaho. Navakavula nganomu vanavulila.
9Nangukavakuvila muli vatu veka naveka, kaha navakangwanuka mumafuci ali kwakusuku. Navakayoya navana vavo hamwe, kaha navakakinduluka.
10Nangukavaneha ceka nawa nakuvafumisa mulifuci lyaEjipitu, nangukavahomesa nakuvafumisa muAsulya, kaha nangukavaneha mulifuci Ngileyate namuLevanone, #Isa. 49.19, 20.kavexi kukavawanyina kumako.
11Mwakahita mukalungalwiji waluyando, mwakaveta makimba amukalungalwiji, mwakukunama mwamuNyile mwosena namukominyina. Utangalaji waAsulya navakauxikumwisa, kaha mukombo waEjipitu wawangana naukafumako.
12Nangukavahana undume muli Yehova, kaha navakatambwojokanga mulijina lyenyi. Mukiko mwanambe Yehova.
Currently Selected:
ZEKALIYA 10: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
