MAKO 8

Yesu mwalisa vatu makombakaji awana

(Mateu 15.32-39)

1 # 6.32-44. Hamakumbi aze, omu kwapwile ceka liyongomena lyalinene, omu vahonene vyakulya, avasanyikile tumbaji twenyi veze kuli Ikiye, avambile ngwenyi,

2Liyongomena #Mateu 9.36.ngunavevwila keke, mwomwo vanaximbula lyehi makumbi atatu nayAmi, kaha kavexi navyakulyako.

3Kaci nge nanguvasuula vayenga nazala kumembo avo, kaha navafwafwa vizava mujila, kaha vakwavo vamwe vanafumu kwakusuku.

4Tumbaji twenyi vamukumbulwile ngwavo, Mutu mwahasa kuwanyina kulihi jimbolo jakwikucisa vatu ava kuno kupambo?

5Avehwile ngwenyi, Muli najimbolo jingahi? Vakivo vamwambile ngwavo, Jitanu najivali.

6Kaha lize liyongomena himwavalweza kusendavala hamavu. Jize jimbolo jitanu najivali ajitambwile, kahomu alingile hanasakwilila lyehi, ajipuzwile, ajihanyinenga kuli tumbaji twenyi, mangana ngwenyi, vajitumbyejeke kumeso avo. Kaha vajitumbyejekele kumeso alize liyongomena.

7Vapwile navaixi vamwe vavandende nawa. Omu alingile #Mateu 14.19.hanavawahisa lyehi, avalwezele vavatumbyejeke navakivo nawa kumeso avo.

8Valile, vekucile. Kaha vihanda vize vasezeleho vavikungulwile, mitonga yitanu nayivali yato.

9Vapwile malunga kafwe makombakaji awana. Avasuwile.

10Kaha linwomu vene engilile muwato natumbaji twenyi, ahetele kulifuci lyaNdamanuta.

Vatu navasaka cinjikizo

(Mateu 16.1-40; Luka 12.54-56)

11Jino vaFwaliseu valovokele, vaputukile kulihwojola nenyi #Mateu 12.38.nakusaka cinjikizo cakufuma mwilu kuli Ikiye, nakumweseka ngoco.

12Alixiximwine cikuma muxipilitu yenyi, avambile ngwenyi, Ikaze veji kusakilanga vaka-tanga yino cinjikizo? Camwenemwene nangumilweza ngwami, Vaka-tanga yino kavexi kuvalweza cinjikizoko.

13Kaha avasezele, engilile ceka muwato, afumine kuze, ayile musali.

Cimbalwila cavaFwaliseu

(Mateu 16.5-12)

14Kaha tumbaji twenyi vavulyamine kumbata jimbolo. Kavapwile najimbolo jajivulu muwatoko, xina mbolo yimwe kaha.

15Avahuhumwine ngwenyi, #Mateu 16.6; Luka 12.1.Nyingililenunga, lilamenunga kucimbalwila cavaFwaliseu nakucimbalwila caHelote.

16Valihanjikixile ngwavo, Mwomwo katwexi najimboloko, xikaho.

17Yesu acitacikijile, avehwile ngwenyi, Muli nakulihanjikixila ika ngwenu, Mwomwo katwexi najimboloko? Noholyapwa kanda mutacikize, kumana? Kanda mumone mwalumbunukila mangana nyi? Muli namicima yayikalu nyi?

18Mukweci meso, oloze kamwexi nakumonako nyi? Mukweci matwitwi, oloze kamwexi nakwivwako nyi? Kamwanukileko nyi?

19 # 6.41-44. Haze ngwavapuzwilile vatu makombakaji atanu jize jimbolo jitanu, mwakungulwileho jimbango jakuzala navihanda jingahi? Vamukumbulwile ngwavo, Likumi najivali.

20Ngwenyi, Kaha #v. 6-9.hakuvapuzwila vatu makombakaji awana jize jimbolo jitanu najivali, mwakungululangaho mitonga yakuzala navihanda yingahi? Vamukumbulwile ngwavo, Yitanu nayivali.

21Avehwile ngwenyi, Kaha kanda cimilumbunukile tahi?

Yesu mwahindula kapuputa kuMbetesaita

22Vahetele kuMbetesaita. Kaha vatu vamutwalilile #10.46-52; Yowa. 9.1-7.kapuputa, vamulembelelele ngwavo, amusalike livoko lyenyi.

23Amukwacile uze kapuputa kulivoko lyenyi, #7.33.ayile nenyi kusali yalimbo. Kahomu alingile #Yowa. 9.6.hanamufwijila lyehi maleji hameso enyi, #5.23.hanamunangika mavoko enyi, amwihwile ngwenyi, Unamono cuma cimwe tahi?

24Andwile meso enyi, etavile ngwenyi, Ngunamono vatu, ngunavamono nge mitondo yili nakutambuka.

25Kaha himwamunangika ceka mavoko enyi hameso enyi, kaha axixikile nakutala, kaha apwile ceka walambwe amwene vyuma vyosena vinatamuka.

26Kaha amusuwile ayenga kumahyenyi ngwenyi, #Mateu 8.4.Cipwe mwimbo eli kanda wingilamo cekako.

Kwitavila caPetulu

(Mateu 16.13-20; Luka 9.18-21)

27Yesu afumine kuze, ayile natumbaji twenyi kuvikwazo vyakuKesaliya Fwilipi. Kaha mujila avehwile tumbaji twenyi ngwenyi, Vatu veji kunguvulukanga ngwavo, yamiya?

28Vakivo vamwambile ngwavo, #6.14.Ngwavo, yove muka-kumbapacisa vatu Yowano. Veka ngwavo, yove Elija. Oloze veka nawa ngwavo, yove ukweci vakwenu vapolofweto.

29Ikiye avehwile ngwenyi, Oloze enu kwenu mweji kunguvulukanga ngwenu, yamiya? Petulu amukumbulwile ngwenyi, Ove yove Kulixitu.

30Kaha #Mateu 8.4; 16.20; Luka 9.21.avakanjile ngwenyi, Kanda mukangwambulula kuli mutuko.

Yesu mwavuluka kufwa cenyi

(Mateu 16.21-28; Luka 9.22-27)

31Aputukile kuvanangula ngwenyi, Kuvanga Mwanamutu akayande navyuma vyavivulu, vakamukane kuli vakulwane nakuli vapilixitu vavalemu nakuli vaka-kusoneka, vakamujihe, kahomu namukahita makumbi atatu, numbanyi akasanguke ceka.

32Cihande cino acihanjikilenga musana weye. Petulu amutwalile kupenge, aputukile kumuhanjikila.

33Oloze Ikiye alumukile, avamwene tumbaji twenyi, amuhanjikilile Petulu ngwenyi, #Mateu 4.10.Ove Satana, hita munyima yami, mwomwo kawakava vyuma vyaKalungako, oloze vyuma vyavatu kaha.

34Kaha liyongomena alisanyikile lize kuli Ikiye, natumbaji twenyi hamwe, avambile ngwenyi, Kaci nge mutu nazange kungukava, alikanyise ivene, #Mateu 10.38; Luka 14.27.ambate kulusu yenyi, angukavangizenga.

35 # Mateu 10.39; Luka 17.33; Yowa. 12.25. Mwomwo wose mwazanga ngwenyi, alwile mwono wenyi, mwakaujimbalisa. Kaha wose mwajimbalisa mwono wenyi hali Ami nahamujimbu wamwaza mwaulwila.

36Mwomwo kaci nge mutu mwaheta lifuci lyahamavu lyosena nakuvindama mwono wenyi, mwakawanyinaho ika?

37Mwomwo mutu akahane ika kutambasana namwono wenyi?

38 # Mateu 10.33; Luka 9.26; 12.9. Mwomwo Wexowo mwangwivwila sonyi Ami namazu ami muli vaka-tanga yino yaujila naxili, naMwanamutu nawa mwakamwivwila ikiye sonyi nawa, omu mwakeza muupahu waise navangelo vajila hamwe.

Currently Selected:

MAKO 8: LUE70

Highlight

Copy