MAKO 7

Vyuma vika-kupihisa vatu

(Mateu 15.1-20)

1Jino vaFwaliseu hinavaunga kuli Ikiye, navamwe vakakusoneka nawa vakufuma kuYelusalema.

2Kaha vamwene tumbaji twenyi vamwe vapwile nakulya #Luka 11.38.namavoko avo akujiluluka, nge ngwavo, kumavoko kwakuzeneka kusana.

3Mwomwo vaFwaliseu navaYuleya vosena, kuvanga vanasane cikuma kumavoko avo, numbanyi valyenga. Mwomwo #Ngale. 1.14.valamovyo vavaselelele kuli vakulwane kulama, xikaho.

4Kaha hakufuma kucilanjilo, kuvanga vanasane mumijimba, numbanyi valyenga. Kaha kuli nawa vyuma vyavivulu vyeka vatambula kulama, kukosa jipasa najindeho navyenga vyaunengu.

5Jino vaze vaFwaliseu navakakusoneka Vamwihwile ngwavo, Ikaze vanakanyina tumbaji twove kulinga nge mwaya #Ngale. 1.14.oco vatuselelele vakulwane kulama, oloze veji kulyanga namavoko avo akujiluluka?

6Ikiye avambile ngwenyi, Isaya ahanjikile kanawa naupolofweto nakumivulukenu vaka-kulyonga, nge muze vasoneka ngwavo,

# Isa. 29.13. Vatu ava veji kunguvumbikanga namivumbo yavo kaha,

Oloze micima yavo yili kwakusuku nayAmi.

7Oloze veji kungulemesanga tuhu camokomoko,

Mwomwo kukunangula cavo veji kunangulanga jiximbi javatu kaha, xikaho.

8Enu Jiximbi jaKalunga mweji kujisezanga nakulinjililovyo vamisela kuli vatu kulama.

9Kaha avambile ngwenyi, Camwenemwene enu mweji kuleununanga Jiximbi jaKalunga mangana mulamengovyo vyenu vanamihane kulama.

10Mwomwo Mose ambile ngwenyi, #Kulo. 20.12; Luxi. 5.16.Vumbikanga iso nanoko. Kaha nawa ngwenyi, #Kulo. 21.17; Levi 20.9.Ou mwavuluka ise mwamupi, cipwe naye, akafwe cakufwa.

11Oloze enu mweji kwambanga ngwenu, Kaci nge mutu mwamba kuli ise cipwe kuli naye ngwenyi, Oco ngwahasanga kukukafwa naco cinapu Kolovane, nge ngwenyi, Ngunacihane lyehi wana kuli Kalunga,

12kaha kamwexi kumwitavila ceka kumulingila ise cipwe naye cumako.

13Ngoco mazu aKalunga mweji kuwazeyesanga nacumoco mweji kulamanga, oco munahane nawa vakwenu. Kaha mweji kulinganga vyuma vyangoco vyeka nawa vyavivulu.

14Kaha lize liyongomena alisanyikile ceka lize kuli Ikiye, avambile ngwenyi, Ngwivwililenu, enu muvosena, mangana kana amilumbunukile kanawa.

15Kakwexi cuma cakuweluka wamutu nacihasa kumujilulula hakwingila muli ikiyeko, oloze evi nayilovoka muli mutu, vikiko vene vize vyakumujilulula mutu.

16Kaci nge mutu ali namatwitwi akwivwa, evwilile.

17Omu engilile muzuvo nakuseza lize liyongomena, tumbaji twenyi vamwihwile ciximo kana.

18Kaha himwavamba ngwenyi, Kumana, nayenu nawa munahono ngoco kumona mwalumbunukila mangana? Kacamilumbunukilileko tahi? Cexoco cakuweluka nacingila muli mutu kacexi kuhasa kumujilululako.

19Mwomwo kacexi kwingila mumucima wenyiko, oloze mujimo lyenyi kaha, kaha hikucimbila. Ahanjikile ngoco #Loma 14.1-12; Kolo. 2.16; Luka 11.41.nakutomesa vyakulya vyosena.

20Kaha avambile ngwenyi, Oco nacilovoka muli mutu, cikiko vene nacimujilulula mutu.

21Mwomwo mutulo, mumicima yavatu, mukiko vene mweji kufumanga vixinganyeka vyavipi, namaujila, nakwiva, nakujiha vatu, namakoji,

22navilinga vyalukamakama, navyevi vyakuhuka, namakuli, nakuzunguma, #Mateu 6.23; 20.15.naliso lyalipi, natusautu, nautangalaji, nakuhulama.

23Vyavipi vyosenevi vyeji kufumanga mutulo, nakumujilulula mutu.

Kufwelela capwevo kaSulofwenyixa

(Mateu 15.21-28)

24Akatukile kuze, afumineko, ayile kulifuci lyaTule naXitone. Engilile muzuvo, kaha kasakile mutu naumwe kucitacikizako, oloze kahaxile kuliswekako.

25Oloze kwapwile pwevo, ukweci mwanenyi wapwevo wamundende apwile naxipilitu wamupi, omu evwile Yesu, linwomu vene ejile, alimbilile hamavu kumahinji enyi.

26Uze pwevo apwile kaHelase, wakutanga yavaSulofwenyixa. Kaha amulembelelele Yesu mangana ngwenyi, amulovole uze ndemone muli mwanenyi.

27Oloze Yesu amwambile ngwenyi, Vana valivange kwikuta, mwomwo kacawahile kutambula kulya cavana nakucimbila kuli vatuwako.

28Uze pwevo amukumbulwile ngwenyi, Mwomwo vene Mwata, navatuwa vali muxi yamesa nawa veji kulyanga kuwangululu wakukulya cavana.

29Amwambile ngwenyi, Mwomwo halizu elinyi, yakonga kwove, ndemone nalovoka lyehi muli mwanove.

30Kaha ayile kuzuvo yenyi, amuwanyine mwanenyi vanamusavalika lyehi hakahela, uze ndemone hanamulovoka lyehi.

Yesu mwahindula kajikamatwitwi ukweci kalaka

31Yesu afumine ceka kulifuci lyaTule, apulasanyine muXitone, ahetele kucijiva cakuNgalileya, apalikile mukaci kalifuci lyaNdekapole.

32Vamutwalilile kajikamatwitwi apwile nakalaka, kaha vamulembelelele ngwavo, #5.23. amunangike livoko lyenyi.

33 # 8.23. Ahengamine nenyi kwauka wavo nakuseza liyongomena, kahengixile minwe yenyi mumatwitwi enyi, afwijile maleji, amusalikile munwe wenyi halilimi lyenyi.

34Kaha hakutala kwilu alixiximwine, amwambile ngwenyi, Efwata, nge ngwenyi, Jikuka.

35Kaha matwitwi enyi ajikukile, lilimi lyenyi lyasovokele, kaha ahanjikile kanawa.

36Yesu #1.44; 5.43; Mateu 8.4.avakanjile ngwenyi, Kanda mukacambulula kuli mutuko. Oloze omu ahambakanyine kuvakanda, hinavahambakananyi kucitwala.

37Kaha vatu valihomokelelenga cakuhambakana, valyambilenga ngwavo, Nalingi vyuma vyosena mwamwaza, ngwavo, Cipwe tujikamatwitwi eji kuvevwisanga, kaha tumama eji kuvahanjikisanga.

Currently Selected:

MAKO 7: LUE70

Highlight

Copy