KULOVOKA 33
33
Yehova mwaxika kupwanga navo
1Yehova ahanjikile kuli Mose ngwenyi, Katuka, fuma kuno, nayove navatu ava unalovola mulifuci lyaEjipitu, muye kulifuci lize ngwalixingilile kuli Apalahama nakuli Isaka nakuli Yakova ngwami, Nangukalihana kuli vaka-tanga yove.
2Nangutuma kangelo kulutwe lwove, kaha nangukahangamo vaKanane navaAmole navaHete navaPeliji, navaHivi navaYevuse.
3Yenunga kulifuci lyakumbwambumuka mavele nawuci. Mwomwo kangwexi kukanduka mukaci kenuko, mwomwo enu munapu muvatu vakukakama jixingo, xikaho, kucina nangukamilalisa mujila.
4Omu vevwile vatu mazu amapi awa, valixonene, kaha kakwapwile mutu umwe avwalile vyuma vyenyi vyakulilengako.
5Mwomwo Yehova ambile kuli Mose ngwenyi, Vambulile vana vaIsalele ngwove, Munapu muvatu vakukakama jixingo. Kaci nge nangukanduka mukaci kenu cipwe kapyapya kakandende kaha, nangumilalisa. Xikaho jino lizulenu vyuma vyenu vyakulilenga, ngutacikize mwakumilingila.
6Kaha vana vaIsalele valizulile vyuma vyavo vyakulilenga kufumisa kupili Holeve.
7Jino Mose atwalilenga mbalaka nakuyilema kusali yacilombo, kwakusuku nacilombo, ayivulukile ngwenyi, Mbalaka yakuliwanyina. Kaha casolokele, wexowo atondele Yehova alovokele nakuya kumbalaka yakuliwanyina, yize yapwile kusali yacilombo.
8Kaha casolokele, omu alovokele Mose nakuya kumbalaka, vatu vosena Vakatukile, Vemanyine mutu himutu kucikolo cambalaka yenyi, nakutala Mose palanga nomu engilile mumbalaka.
9Kaha casolokele, omu engilile Mose mumbalaka, yize panda yalivwi yazezumukile, yemanyine kucikolo cambalaka, kaha Yehova ahanjikile naMose.
10Vatu vosena vamwene panda yalivwi kwimana kucikolo cambalaka, kaha vatu vosena vakatukile nakulifukula, mutu himutu kucikolo cambalaka yenyi.
11Yehova ahanjikile kuli Mose meso nameso, nge omu eji kuhanjikanga mutu kuli sepa lyenyi. Kaha Mose akindulukile ceka kucilombo, Oloze kambaji kenyi Yoxuwa mwanaNune, mwanalunga, kafumine mumbalakako.
12Mose ambile kuli Yehova ngwenyi, Tala, uli nakungwamba ngwove, Twala vatu ava. Oloze kawangulwezele ou nautuma nguyenga nenyiko. Oloze unambe ngwove, Ngunamutacikiza halijina lyove, ngwove, Unawane likoji kumeso ami.
13Xikaho jino, kaci nge ngunawane likoji kumeso ove, aci ngulweze jijila jove mwane, mangana ngukutacikize, mangana nguwane likoji kumeso ove, kaha nyingilila, mwomwo muyaci ou vanapu vatu jove.
14Yehova ambile ngwenyi, #33.14:KuuHepeleu ngwenyi, Meso ami nawaya nove.Ami Lyavene nanguya nove, kaha nangukakunokesa.
15Mose amwambile ngwenyi, Kaci nge Ove Lyavene kawexi kuya nayamiko, kaha kanda utufumisa kunoko.
16Mwomwo navakatacikijila halihi jino, omu ngunawane likoji kumeso ove, ami navatu jove? kacexi mwomwo uli nakuya nayetu numba? Ngoco tunatumbunuka, ami navatu jove, muli vatu vosena vali kwilu lyamavu.
17Yehova ambile kuli Mose ngwenyi, Nangulinga cumeci nawa unavuluka, mwomwo unawane likoji kumeso ami, kaha ngunakutacikiza halijina lyove, xikaho.
18Mose amwambile ngwenyi, Aci ngulweze upahu wove mwane.
19Yehova amwambile ngwenyi, Ami nanguhicisa kuwaha cami cosena kumeso ove, nanguvilika lijina lyaYehova kumeso ove. #Loma 9.15.Kaha nangutetelou vene nangutetela, nangwivwila keke ou vene nangwivwila keke.
20Amwambile ngwenyi, Kawexi kuhasa kutala kumeso amiko, mwomwo mutu kexi kungumona nakuyoyako.
21Yehova amwambile ngwenyi, Tala, kuli kumwe kwakamwihi nayAmi, kaha wimane aha halilolwa.
22Kaha nacisoloka, omu uli nakuhita upahu wami, nangukwingisa mumwaji wamulilolwa, nakukufwika nalivoko lyami palanga nomu nangulinga ngunahici lyehi.
23Kaha nangufumisa livoko lyami numba umone nyima yami, oloze kumeso ami kavexi kumonakoko.
Currently Selected:
KULOVOKA 33: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.
