KULOVOKA 32
32
1Omu vamwene vatu Mose aximbwile, kasulukile waxi hapiliko, vatu vawungilile kuli Alone, vamwambile ngwavo, Katuka, #Vili. 7.40.tutengele tulunga, ava navatutwa-inyinangako, mwomwou Mose, lunga uze atulowele mulifuci lyaEjipitu, katwatacikizevi vinamuwaneko.
2Alone avambile ngwenyi, Hokolenu tupata twaulu tuli kumatwitwi amapwevo jenu, nawawa avana venu vamalunga navava vamapwevo, munguneheletwo.
3Vatu vosena vahokweleko tupata twaulu twapwile kumatwitwi avo, vatutwalile kuli Alone.
4Atutambwile kumavoko avo, ausongele nacikungo cakusongesa, #Vili. 7.41.autengele mwanangombe wakuzuzulula. Kaha vambile ngwavo, Enu vaIsalele, ava vakivo tulunga twenu, ava vamilowele mulifuci lyaEjipitu.
5Omu acimwene Alone, atungile lijiko lyakulumbila kumeso enyi. Kaha Alone avilikile ngwenyi, Hamene nakupwa ciwanyino cakulemesa Yehova.
6Ngoco hakuca Vamenekele cimenemene, vahanyine mawana akulumba, vanehele mawana akulweza keke. #Kol. 1, 10.7.Vatu vatwamine nakulya nakunwa, kaha vakatukile nakuhema.
7Yehova ahanjikile kuli Mose ngwenyi, Yako, suluka, mwomwo vatu jove vaze walowele mulifuci lyaEjipitu vanahukisa.
8Vananguhwa kupyapumuka mujila kana ngwavalwezanga. Vanalitengela mwanangombe wakuzuzulula, vanalifukula kuli ikiye nakumuvatwila vimuna ngwavo, Enu vaIsalele, ava vakivo tulunga twenu, ava vamilowele mulifuci lyaEjipitu.
9Yehova ambile kuli Mose ngwenyi, Ngunamono vatu ava, kaha tala, #Vili. 7.51.vanapu vatu vakukakama jixingo.
10Xikaho ngwece jino, mangana nguvakwacile utenu, nguvanongese, kaha nangukakulingisove kupwa umuyaci waunene.
11Mose alembelelele Yehova Kalunga kenyi, amwambile ngwenyi, Ove Yehova, ikaze nauvakwacila vatu jove utenu, ava unalovola mulifuci lyaEjipitu nangolo jajivulu nalivoko lyangolo?
12VaEjipitu vakambile ika ngwavo, Avalowele nakuvapihisa, akavajihe kujipili, akavalalise kwilu lyamavu? Alumuka kuliyena lyautenu wove, walumuke kulupi elu unasake kulinga kuli vatu jove.
13Anuka Apalahama naIsaka naIsalele, vangamba jove vaze walixikile nakulixingOve lyavene nakuvamba ngwove, Nangukavulisa vaka-tanga yenu nge vatanganyika vahelu, kaha lifuci lyoseneli ngunavuluka nangukalihana kuli vaka-tanga yenu, kaha navakaliswana haya myaka yosena.
14Ngoco Yehova alumukile kulupi luze ambile kulinga kuli vatu jenyi.
15Mose alumukile nakuxikumuka hapili, namalolwa aunjiho akuya muuhanda aze avali apwile mulivoko lyenyi. Malolwa akuya muuhanda aze apwile akusoneka kusali nakusali, apwile akusoneka noku noku.
16Malolwa akuya muuhanda aze apwile songeso yaKalunga, kaha sonekeso yapwile sonekeso yaKalunga, yakusoneka hamalolwa.
17Omu evwile Yoxuwa cungumo cavatu hakukuwa, ambile kuli Mose ngwenyi, Kucilombo kuli cungumo cajita.
18Mose ambile ngwenyi, Kawexi mazu avaze navatambakana hakuhambakana ngolo, kaha kawexi mazu avaze vali nakuteta hakuvahasa, Oloze ngunevu mazu avaze navemba myaso.
19Kaha casolokele, omu apandamine kucilombo, amwene uze mwanangombe, nomu vapwile nakukina. Kaha Mose akwacile utenu, ambilile aze malolwa akuya muuhanda mumavoko enyi, awahokwele kumavu yapili.
20Akwacile mwanangombe uze vatengele, amwocele hakakahya, amutwile nge lukungu, alusukwilile hameya, kaha avanwixilelwo vana vaIsalele.
21Mose ambile kuli Alone ngwenyi, Vatu ava vakulinganga ika numba uvavulumwise mulonga waunene ngana?
22Alone amwambile ngwenyi, Ove mwata wami, kanda ukwata utenuko. Ove unatacikiza vatu ava nomu vafwila vyavipi.
23Mwomwo vangwambanga ngwavo, Tutengele tulunga, ava navatutwaminyinangako, mwomwou Mose, lunga uze atulowele mulifuci lyaEjipitu, katwatacikizevi vinamuwaneko.
24Ngwavambanga ngwami, Wexowo ali naulu, auhokoleko. Ngoco vanguhanangawo. Ngwaumbilanga mukakahya, kaha mwalovokangou mwanangombe.
25Omu amwene Mose ngwenyi, Vatu vanahungukila muxili (mwomwo Alone avahungwilile muxili numba vavatoleke muli vaka-kole javo),
26kaha Mose emanyine kucikolo cacilombo, ambile ngwenyi, Ou nemana kuli Yehova iya? Eze kuli ami. Kaha vana vaLevi vosena vakungulukile kuli ikiye.
27Avambile ngwenyi, Yehova Kalunga kaIsalele nambe ngwenyi, Vwalenu lunga hilunga poko yenyi yamukwale hatungi yenyi, hitanganenu mucilombo kucikolo nakucikolo, jihenu lunga hilunga ndumbwenyi, nalunga hilunga mukwavo, nalunga hilunga uze alihata nenyi,
28Vana vaLevi valingile nge mwayile lizu lyaMose, kaha likumbi lize kuli vatu kwalindumukile malunga kafwe makombakaji atatu.
29Mose ambile ngwenyi, Lihandu-nwinenu lelo kuli Yehova, lunga hilunga hali mwanenyi nahali ndumbwenyi, mangana Yehova amikisule lelo.
30Kaha casolokele hakuca, Mose ambile kuli vatu ngwenyi, Munavulumuna mulonga waxili waunene. Kaha jino nangukanduka kuli Yehova, pamo nanguhasa kulipga cakufwika hamulonga wenu waxili.
31Mose akindulukile kuli Yehova, amwambile ngwenyi, Acivwilile mwane. Vatu ava vanavulumuna mulonga waunene, vanalitengela tulunga vaulu.
32Oloze jino, kaci nauvakonekela mulonga wavo —, kaci nge pimbi, aci ngujimbangane mwane hamukanda wove unasoneka.
33Yehova ambile kuli Mose ngwenyi, Wexowo navulumuna mulonga kuli Ami, ikiye nangumujimbangana hamukanda wami.
34Xikaho jino yako, twala vatu ava kuze ngunakuvulukila. Tala, kangelo kami mwakutwaminyinangako. Cipwe ngoco, halikumbi lize nangukavawana, nangukavazangamisa hamulonga wavo.
35Kaha Yehova avetele vatu, mwomwo vatengele mwanangombe, uze vatengele kuli Alone.
Currently Selected:
KULOVOKA 32: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.