KULOVOKA 31
31
Kalunga mwasanyika vaMbezalele naOholyave
(Kulo. 35.30—36.1)
1Yehova ahanjikile kuli Mose ngwenyi,
2Tala, ngunasanyika Mbezalele mwanaUli, mwanaHule, wakumuyaci WaYuta, halijina lyenyi,
3kaha ngunamusulisa naXipilitu yaKalunga, namumangana namukunangakana namucinyingi namuwino wosena,
4mangana akatake milimo yautotombwe, nakutula ulu napalata naunengu,
5nakusonga malolwa vakawalamike, nakusonga mitondo, nakuzata nawino wosena.
6KahAmi, tala, ngunatongola Oholyave mwanaAhisamake, wakumuyaci waNdane, hamwe nenyi. Kaha mumicima yavakweci mangana mumicima vosena ngunahakemo mangana, mangana vakalinge vyosenevi ngunakulweze,
7nambalaka yakuliwanyina, nacikaxa caunjiho, nacifwiko calikoji ciliho, navyuma vyambalaka vyosena,
8namesa navyuma vyayo, nacitumbikilo camanongo cakutomesa navyuma vyaco vyosena, nalijiko lyakulumbila vize vyalivumba lyamwaza,
9nalijiko lyakulumbila mawana akulumba navyuma vyalyo vyosena, nambaxiya nalitanda lyayo,
10navize vyakuvwala vyakutunga nawino, navize vyakapilixitu Alone vyakuvwala vyajila, navize vyavana venyi vyakuvwala, mangana vakanguzacilenga milimo yaupilixitu,
11namaji akuwavisa, navize vyakulumba vyalivumba lyamwaza vyamuze mwajila, vakalinge nge kutesa navyuma vyosenevi ngunakulweze.
Sambata hicinjikizo
12Yehova ahanjikile kuli Mose ngwenyi,
13Hanjikove nawa kuli vana vaIsalele ngwove, Lamenunga jisambata jami vene, mwomwo cinapu cinjikizo mukaci kami nayenu mukusemunwina cenu cosena, mangana mukangutacikize, Ami yami Yehova Muka-kumijilika.
14Xikaho lamenunga sambata, mwomwo yikiko yinapu yajila kuli enu. Wose mwakayijilula vakamujihe cakumujiha. Mwomwo wexowo mwakazataho milimo, mutu uze navakamuteta muli vatu vakwavo.
15Vazatenga milimo hamakumbi atanu nalimwe, oloze halikumbi lyamucitanu naavali hali kunoka casambata yayilemu, yajilila Yehova, Wexowo mwakazata milimo halikumbi lyasambata vakamujihe cakumujiha.
16Xikaho vana vaIsalele Valamenga sambata, valingenga sambata mukusemunwina cavo cosena, haluxiko lwahaya myaka yosena.
17Cinapu cinjikizo mukaci kami navana vaIsalele haya myaka yosena. Mwomwo hamakumbi atanu nalimwe Yehova atengele lilu namavu, kaha halikumbi lyamucitanu naavali anokele, kaha ahwimine.
Mwanangombe waulu
(Luxi. 9.6-29)
18Jino omu akumixile kuhanjika naMose hapili Xinai, amuhanyine aze malolwa aunjiho avali, malolwa akuya muuhanda, akusoneka namunwe waKalunga.
Currently Selected:
KULOVOKA 31: LUE70
Highlight
Share
Copy
Want to have your highlights saved across all your devices? Sign up or sign in
Luvale Bible © Bible Society of Zambia, 1970.