Marako 9

1Di en eko waco ne gi be, “Ateteni awaco ne wu be, tie jo mogo kame nataman tie kan, kalikame bino bilo to tuno di kineno Ajakanut ka Rubanga obino kede twer.”

Cal ka Yesu Olokere

(Matayo 17.1-13; Luka 9.28-36)

2 # 2 Petero 1.17-18 Ingei ceng kanyape, Yesu oko kwanyo Petero, Yakobo kede Yokana, di eko tero gi malo i wi moru kargi ken gi. Kom Yesu oko lokere i wang gi kanono; 3igoen mege oko doko tar liamaliam, kame ngatamoro i wi lobo kan likame twero lwoko gi di kiko lony kamanono. 4Di gin kiko neno Elia kede Musa di tie yamo kede Yesu. 5Petero oko waco ne Yesu be, “Apwony, eber pi wan bedo tie kan. Nan do wek oger kimere adek kan; acel ne in, acel ne Musa kede acel ne Elia.” 6Petero oudo kwia gikame eyami, pien lworo oudo otieko mako gi kitek.

7 # Matayo 3.17; Marako 1.11; Luka 3.22 Edou oko umo gi pukupuk, di dwan oko wok ki edou di waco be, “Man en Woda kame amaro, winyenu.” 8Kiko loko wang gi awakawaka di kingongolo piny, do likame kiko neno bobo ngatamoro ace, kwanyo Yesu kenekene.

9Kakame oudo kitie wok kede ki wi moru, Yesu oko ciko gi be kur kiwac ne ngatamoro gikame kineno tuno di Wot ka dano oyaruno kikom jo oto.

10Gin kiko yei mungo kop nono di kipenyere ken gi ken gi dwong me kop me yaruno kikom jo oto. 11#Malaki 4.5; Matayo 11.14Kiko penyo Yesu be, “Pinyo ber komio jopwony me Iswil waco be, miero Elia kong cak dwogo di pwodi gini likame otimere?”

12En eko dwoko ne gi be, “Ebo, ateteni Elia miero cak bino me wek eik gi dedede bobo. Do kara pinyo komio iwandik kacil waco be Wot ka dano bino neno can kitek di oko timo ne tim me lewic? 13Do awaco ne wu be Elia otieko bino, di gin kiko timo ne gikame cuny gin oudo mito, bala kame iwandik kacil da waco i kome.”

Yesu Ocango Awobi kame tie kede Tipo Arac

(Matayo 17.14-21; Luka 9.37-43a)

14Kakame kituno kede but josiao icegun, kiko neno ekodet me jo di oluko gi, di jopwony me Iswil tie piem kede gi. 15Cucuto nono di ekodet dedede oneno Yesu, kiko uro twatwal di kiko ringo bute kiko mote. 16Yesu oko penyo josiao mege be, “Kop nyo kame wun itienu piem iye kede gi?”

17Ngat acel kikom ekodet oko dwoko ne be, “Apwony, ango akelo woda buti pien etie kede tipo arac kame genge yamo. 18Ka tipo arac nono obino ne, rete piny di buo ko donyo wok ki doge, en eko donyo ngururo di emwodo lake, di do eko teregego. Ango oudo akwao josiao ni be koto kiriame tenge, do likame kiko twero.”

19Yesu oko waco ne gi be, “Wun lwak kame li kede yei, miero abed kede wu pi kare arom amene? Abino kanyakino kede wu tuno awene? Kelenu buta kan.” 20Gin kiko tere but Yesu.

Cucuto kakame tipo arac nono oneno kede Yesu, en eko mino kom awobi nono odonyo miel teltel di eko rete piny, di eko mine edonyo bebelo di buo mol ki doge. 21Yesu oko penyo papa mere be, “Etieko nan kare arom amene di gini time kaman?”

En eko dwoko be, “Kom cako di pwodi en atin. 22Tien atot etieko rereto en i mac kede i pii di emito neke. Do ka itwero timo gimoro iye, tim wa kisa ikony wa.”

23Yesu oko dwoko ne be, “Pinyo komio iwaco na be, ka itwero? Jame dedede twerere ne ngat kame tie kede yei.”

24Cucuto papa me awobi nono oko kok be, “Ango atie kede yei; Okwe konya ikwany gungcuny tenge ki buta!”

25Kakame Yesu oneno kede be ekodet me jo oudo tie ringini cokere bute, en eko ciko tipo arac nono be, “In tipo kame dingo yit jo kede kame neko leb jo, aciki, wok tenge ki kome di kur iko dok bute bobo.”

26Tipo arac nono oko redo di eko mino kom awobi nono odonyo miel teltel, en eko wok. Awobi nono oko dong bala ngat otieko to; omio jo atot oko waco be, “Etieko do to!” 27Do Yesu oko mako cinge oko kiarao en, di eko yai malo.

28Di do Yesu otieko donyo i yi ot, josiao mege oko penye i mung be, “Pinyo komio wan likame oudo otwero riamo tipo arac nono?”

29Yesu oko dwoko ne gi be, “Likame tie gi ace kame twero riamo epone me tipo arac no, kwanyo ilega kenekene.”

Yesu Bobo Owaco kop kame mako To mere

(Matayo 17.22-23; Luka 9.43b-45)

30Yesu oko yai ki kuno kede josiao mege, kiko ot di kibeo ki Galilaya. Oudo likame emito be ngatamoro ngei kakame en etie iye, 31pien oudo etie pwonyo josiao mege di ewaco ne gi be, “Kobino mino Wot ka dano i cing jo, di gin kiko bino neke. Do kame koneke, ingei ceng me adek en ebino yaruno.”

32Do gin likame kiko niang kop mere nono, doko oudo kilworo penye.

Ngai en kame Pire Dwong Kalamo?

(Matayo 18.1-5; Luka 9.46-48)

33Di do Yesu kede josiao mege oko tuno Kaperanaum. Kakame oudo kitie kede i ot, Yesu oko penyo josiao mege be, “Kara ber nyo kame oki wun itienu piem iye i yongayo?”

34 # Luka 22.24 Do gin likame kiko dwoko ne kop moro, pien gin oudo kibedo piem ken gi ken gi di kioto i yongayo, be ngai en kame pire dwong kalamo kikom gi. 35#Matayo 20.26-27; 23.11; Marako 10.43-44; Luka 22.26Yesu oko bedo piny, en eko lwongo josiao mege tomon kiwie are di eko waco ne gi be, “Ka ngatamoro mito bedo dano me agege, miero kong emwolere ebed dano me ajikini di en eko donyo tic ne jo dedede.” 36En eko kwanyo atin atitidi di eko mino ocungo i nyim gi, di eko tingo i kore di ewaco ne gi be, 37#Matayo 10.40; Luka 10.16; Yokana 13.20“Ngat kame gamo atin atitidi bala man i nyinga, udo egama, doko ngat kame gama, udo likame egamango, do udo egamo ngat kame oora.”

Ngat kalikame Dagi Wa udo en Merwa

(Luka 9.49-50)

38Yokana oko waco ne Yesu be, “Apwony, wan oko udo ngatamoro da di tie riamo jwogi i nyingi, do wan oko genge, piento en likame ebedo ngat acel kikom wa.”

39Yesu oko dwoko ne gi be, “Kur igengenu, pien likame tie ngatamoro kame timo tic me twer i nyinga, kame bino lokere awakawaka waco kope areco i koma. 40#Matayo 12.30; Luka 11.23Pien ngat kalikame dagi wa udo en merwa. 41#Matayo 10.42Ateteni awaco ne wu be, ngat kame mio wu pii me amata pien wun ibedunu jo ka Kirisito, likame ebino kei giamia mere me pwoc kibut Rubanga.

Atama kame mio Dano Dubo

(Matayo 18.6-9; Luka 17.1-2)

42“Ngat kame mio acel kikom jo atino kame oyei ango gi dubo, oudo koto bedo ber ka kotweo ne kidi me riego i ngute di oko uce i nam. 43#Matayo 5.30Aso, ka cingi en kame mi idubo, ngole tenge; pien eber ne in donyo i kuo kame bedo nakanaka abongo cingi acel, akaka bedo kede gin are dedede di iko ot i mac kalikame to, i mac kalikame nekere. 44(Pien kudilinge kame camo gi ki kuno likame to, doko mac mere bedo nakanaka.) 45Doko ka tieni en kame mi idubo, ngole tenge, pien eber ne in donyo i kuo kame bedo nakanaka abongo tieni acel, akaka bedo kede tieni are dedede di oko uci i mac kalikame to. 46(Pien kudilinge kame camo gi ki kuno likame to, doko mac mere bedo nakanaka.) 47#Matayo 5.29Doko ka wangi en kame mi idubo, gole ooko, pien eber ne in donyo i Ajakanut ka Rubanga abongo wangi acel, akaka bedo kede wangi are dedede di oko uci i mac kalikame to. 48#Isaya 66.24Pien kudilinge kame camo gi ki kuno likame to, doko mac mere bedo nakanaka.

49“Pien kobino lonyo ngat acelacel kede mac bala kite kame koketo kede kado i cam.

50 # Matayo 5.13; Luka 14.34-35 “Kado ber, do ka tuto odoko bot, kotwero bobo mine edoko kec benyo?

“Bedunu bala kado, di itienu kede mulem i diere wu kenu kenu.”

Currently Selected:

Marako 9: BILKDC13

Highlight

Copy