Marako 8

Yesu Opito Jo Tutumia Ongwon

(Matayo 15.32-39)

1I kare nono di ekodet adwong oudo ocokere karacel, doko di oudo kili kede gi me acama, Yesu oko lwongo josiao mege bute di eko waco ne gi be, 2“Kisa omaka kede jogi twatwal, pien kibedo kan keda nan oromo ceng adek, doko nan likame kitie kede gi me acama. 3Ka nan aperuno gi be kioti i miere gi, kec bino nuono gi i yongayo, pien mogo kikom gi owok ki kakabor.”

4Josiao mege oko penye be, “Ngai en kame karuno pito jogi kede mugati i tim kan?”

5Di Yesu oko penyo gi be, “Itienu kede mugati adi?” Gin kiko dwoko be, “Kanyaare.”

6En eko waco ne ekodet be bed piny. En eko kwanyo mugati kanyaare nogo, eko mino pwoc but Rubanga, eko tuturo gi di eko mino josiao mege pi popoko ne jo. Di gin kiko timo kamanono. 7Oudo gin kitie kede deknam atitino anonok. Yesu oko mino pwoc pirgi, di en eko waco ne josiao mege pi popoko gida ne jo. 8Jo dedede oko cam, di kiko yeng, di josiao oko coko angidingidin me cam kame odong oko pongo ibukito kanyaare. 9Jo kame oudo tie kuno oudo romo tutumia ongwon. Yesu oko do peruno jo. 10Esawa nono en eko donyo i yi yee kede josiao mege kiko ot i adul me Dalamanuta.

Iparisayon Openyo Giaura kibut Yesu

(Matayo 12.38-42; 16.1-4)

11 # Matayo 12.38; Luka 11.16 Iparisayon oko ot but Yesu kiko cako piem kede en, di kimito be etim gianena moro kame yai ki malo; gin oudo kitie tame. 12#Matayo 12.39; Luka 11.29Yesu oko oomo cunye di eko waco be, “Pinyo komio jo me i kare ni penyo gianena? Ateteni awaco ne wu be, likame tie gianena moro kame kobino mino jo me i kare ni.”

13En eko yai eweko gi kuno, eko dok i yi yee, di eko ngolo nam loka tetuca.

Arup me Iparisayon kede me ka Erode

(Matayo 16.5-12)

14Josiao ka Yesu oudo wi gi owil mako mugati. Oudo kitie kede mugati acel kenekene i yi yee. 15#Luka 12.1Di Yesu oko kwenyaro gi pi gwokere kikom arup me Iparisayon kede arup ka Erode.

16Gin di kiko cako yamo ken gi ken gi be, “En eyamo kamano pien wan oliunu kede mugati.”

17Do Yesu oudo ngeo gikame gin kitie yamo, en eko penyo gi be, “Pinyo komio wun itienu yamo kop kame mako wun bedo li kede mugati? Mam pwodi wun likame ingeunu gigi arabo iniangunu i kom gi? Mam wun wi wu tek? 18#Yeremia 5.21; Esekeri 12.2; Marako 4.12Itienu kede wangu, pinyo komio likame inenunu? Itienu kede yitu, pinyo komio likame iwinyunu? Likame iyutununu 19kare kame bin atuturo kede mugati kany ako pito kede jo tutumia kany? Ikounu bin coko ibukito adi me angidingidin kame odong?”

Gin kiko dwoko be, “Ibukito tomon kiwie are.” 20Yesu oko penyo gi be, “Do i kare kame apopoko kede mugati kanyaare ne jo tutumia ongwon, ikounu bin coko angidingidin kame odong opongo ibukito adi?” Kiko dwoko be, “Kanyaare.”

21Yesu oko penyo gi be, “Do nan likame pwodi iniangunu?”

Yesu Ocango Emuduk i Betesaida

22Yesu kede josiao mege oko bino Betesaida. Jo mogo oko kelo icuo kame wange oto bute di kiko kwane be eket cinge i kome. 23Yesu oko mako cing emuduk nono eko pene tere tenge me calo nono. En eko ngulo lau i wange, eko keto cinge i wie di eko penye be, “Tie gikame itwero neno?”

24Loca oko tingo wange malo eko waco be, “Ebo, atie neno jo, do kical bala yen kame tie ot.”

25Yesu bobo oko mulo wang icuo nono, lo nono oko temuno nganyo wange di wange oko doko ber, en eko do donyo neno jame dedede kiber. 26Yesu oko cwane dok paco di ewaco ne be, “Kur idoki i calo.”

Kop kame Petero Otuco i kom Yesu

(Matayo 16.13-20; Luka 9.18-21)

27Yesu kede josiao mege oko ot i calere kame tie Sisiria Pilipi. I kare kame kitie ot kede, Yesu oko penyo gi be, “Kara ber jo waco be ango en ngai?”

28 # Marako 6.14-15; Luka 9.7-8 Gin kiko dwoko ne be, “Jo mogo waco be in en Yokana Ngaibatis, mogo waco be in Elia, doko mogo da waco be in ibedo ngat acel kikom inabin.”

29 # Yokana 6.68-69 En eko penyo gi be, “Do wun iwacunu be ango en ngai?” Petero oko dwoko ne be, “In en Kirisito.”

30Yesu oko ciko gi kitek be kur kiwac ne ngatamoro kop i kome.

Yesu Owaco Kop kame mako Can kede To mere

(Matayo 16.21-28; Luka 9.22-27)

31Yesu oko cako pwonyo gi di ewaco be, Wot ka dano miero bei i can atot; di joadongo me piny, jodongo me josaseredoti kede jopwony me Iswil ko bino dage, di kiko neke da. Do ingei ceng me adek en ebino yaruno. 32En ewaco kop noni kakaler. Di Petero oko kwanye otere tenge di oko donyo bunano en be koto kur di eyamo kamanono. 33Do Yesu oko lokere oneno josiao icegun eko coko Petero be, “Dok cen ngea, in Sitani! Pien likame tam nin owok kibut Rubanga do ebedo me ka dano.”

34 # Matayo 10.38; Luka 14.27 Di do Yesu oko lwongo ekodet dedede karacel kede josiao mege bute, en eko waco ne gi be, “Ka ngatamoro mito luba, poore kong edagere kene, di en eko riongo musalaba mere eko luba. 35#Matayo 10.39; Luka 17.33; Yokana 12.25Pien dano kame mito lako kuo mere, ebino rwenye; do ngat kame rwenyo kuo mere pira kede pi ejiri bino lake. 36Bero nyo kame dano udo ka eudo gi dedede kame cunye mito i piny kan di eko kei kuo mere? 37Pien nyo kame dano twero mino pi dwoko kuo mere? 38Ngat kame nan lewic make i koma kede pi kop na i kare kanataman me kwina Rubanga kede me dub, Wot ka dano da lewic bino make i kome i kare kame ebino dwogo kede di etie i deyo ka Papa mere, karacel kede imalaikan kacil.”

Currently Selected:

Marako 8: BILKDC13

Highlight

Copy