Matayo 18

Ngai en kame Pire Dwong Kalamo?

(Marako 9.33-37; Luka 9.46-48)

1 # Luka 22.24 Esawa nono josiao oko bino but Yesu kiko penye be, “Ngai en kame pire dwong kalamo i Ajakanut me malo?” 2Yesu oko lwongo atin, en eko mine ecungo i diere gi, 3#Marako 10.15; Luka 18.17di eko waco be, “Ateteni awaco ne wu be, kalikame ilokerenu ikounu doko bala idwe, likame ibinunu donyo i Ajakanut me malo. 4Ngat kame mwolere bala atin ni, en kame pire dwong kalamo i Ajakanut me malo. 5Ngat kame gamo atin bala man i nyinga udo egama.

Atama kame mio Dano Dubo

(Marako 9.42-48; Luka 17.1-2)

6“Do ngat kame mio acel i kom jo atino kame oyei ango gi dubo, oudo koto bedo ber ka kotweo ne kidi me riego i ngute di oko lwinye kede i nam. 7Can kame lobo tie iye pi bedo tie kede atama kame mio jo dubo! Atama poore bedo tie, do etie i can ngat kame kelo atama!

8 # Matayo 5.30 “Ka cingi arabo tieni en kame mi idubo, ngole iko uce tenge; eber ne in donyo i kuo me ateni abongo cingi arabo tieni, amotoko di ingwalo, akaka in bedo kede cingi are kede tieni are di oko uci i mac kalikame to. 9#Matayo 5.29Doko ka wangi en kame mi idubo, gole iuce tenge; eber ne in donyo i kuo me ateni kede wangi acel, akaka in bedo kede wangi are dedede di oko uci i mac kalikame to.

Agole me Oromo Korwenyo

(Luka 15.3-7)

10“Miero inenunu be likame icaunu acel kikom jo atino gi, pien awaco ne wu be, imalaikan gin tie nakanaka i nyim Papa na kame tie i malo. 11(Pien Wot ka dano obino pi lako jo korwenyo.)

12“Wun iparunu benyo? Ka dano tie kede romini tol acel, di acel kikom gi oko parao tenge, mam eweko ot kanyangon kiwie kanyangon i bad moru di eko ot mono koparao tenge nono? 13Ka eude, ateteni awaco ne wu be, en ebino lelo pire kalamo pi icegun ot kanyangon kiwie kanyangon kalikame oparao tenge ka. 14Iepone acel nono, Papa na kame tie i malo likame mito be acel moro kikom jo atino gi rweny tenge kibute.

Gikame ipoore Timo ka Ngat ocelu Odubo

15 # Luka 17.3 “Ka dano acel i ekodet wu otimo dub, ot imie engei raco mere di in itie kede en wun jo are. Ka ewinyo kop nin, udo itieko dwoko omini. 16#Iswilia 19.15Do ka edagi winyo kop nin, kwany dano acel moro arabo jo are apat iko ot kede gi, tetekeny tie me ijurak are arabo adek karuno moko kope kame wun iyamunu. 17Ka edagi winyo dwan gi, tatamo kop mere i dier ekodet me jokirisito. Do ka edagi winyo akadi kop me ekodet me jokirisito, tere bala ngat kalikame oyei amotoko bala ngarar esolo.

Tweno kede Gonyo

18 # Matayo 16.19; Yokana 20.23 “Ateteni ango awaco ne wu be, gi dedede kame wun itweunu i piny, kobino tweno i malo da, doko gi dedede kame wun igonyunu i piny kan kobino gonyo i malo da.

19“Doko awaco ne wu be, i wi lobo kan, ka jo are kikom wu owinyere i kom gimoro kame gin kikwao, Papa na kame tie i malo bino timo ne gi. 20Pien kakame jo are arabo adek ocokere iye i nyinga, udo ada atie i diere gi.”

Agole me Ngatic kalikame Sasiro Jo

21 # Luka 17.3-4 Petero oko nyiko but Yesu di eko penye be, “Rwot, ka omina otimo na dub, apoore sasiro en tien adi? Benyo, tien kanyaare?”

22 # Ageini 4.24 Yesu oko waco ne be, “Likame ango awaco ni be tien kanyaare, do ot kanyaare tien kanyaare. 23Pi mano, koporo Ajakanut me malo kede abaka kame mito ngingico epone kame jotic mege otio kede sente. 24I kare kame egeo ngingico kede epone kame kotio kede sente, oko kelo ne ngatic acel kame oudo eburao talente tutumia tomon. 25Do kite kame oudo likame etwero culo kede, ngadwong mere oko waco be cate ribo kede cege, karacel kede idwe mege, kede jame dedede kame etie kede di oko culo kede banya. 26Kikano ngatic nono oko riondiko piny, di eko donyo ngangao ngadwong mere nono be, ‘Adwong dire ber imia kare moro, ango abino culi gi dedede.’ 27Kisa oko mako abaka kede ngatic nono, en eko gonye di en eko sasiro en kur ecul banya nono.

28“Do kakame ngatic nono oudo tie ot kede, en eko ngoole i kom ngatic wad gi kame oudo eburao denari tol acel. En eko deno dwan icuo nono di ewaco ne be, ‘Amito icula banya na.’ 29Ngatic wad gi oko riondiko piny di eko donyo bako ne doge kede mwolo be, ‘Dire ber kong pi kare moro, ango abino culi.’ 30Do en eko dagi, di eko tero icuo nono rwako i otkol tuno kede di etieko culo banya mere. 31Kakame jotic wad gi oneno kede gi kotimere, gin kiko bedo kede cwercuny, kiko ot but ngadwong gi kiko tatamo ne gi kotimere dedede. 32Ngadwong mere oko lwonge di oko waco ne be, ‘In ngatic arac! Ango asasiro in be kur icula banya ca lung pien in ibako na dogi, 33do oudo ida mam ipoore timo kisa ne ngatic wadu, bala kame ada atimi kede kisa?’ 34Abaka oko bedo kede wangcuny di eko keto ngatic nono i cing jo kame daro otkol pi mine alola tuno kede ka eculo banya mere dedede. 35Aso, manono da en gikame Papa na me i malo bino timo ne dano acelacel kibutu, ka likame isasiro dano wadu i cunyi.”

Currently Selected:

Matayo 18: BILKDC13

Highlight

Copy