Matayo 17

Cal ka Yesu Olokere

(Marako 9.2-13; Luka 9.28-36)

1 # 2 Petero 1.17-18 Ingei ceng kanyape, Yesu oko kwanyo Petero, Yakobo kede omin mere Yokana, di en eko tero gi malo i wi moru kargi ken gi. 2Kom Yesu oko lokere i wang gi kanono, di nyime oko rieny bala ceng, kede igoen mege oko doko tar liamaliam. 3Gin kiko neno Musa kede Elia di tie yamo kede Yesu. 4Petero oko waco ne Yesu be, “Rwot, eber pi wan bedo tie kan. Ka imito, abino gero kimere adek kan, acel ne in, acel ne Musa kede acel ne Elia.”

5 # Ageini 22.2; Iswilia 18.15; Sabuli 2.7; Isaya 42.1; Matayo 3.17; 12.18; Marako 1.11; Luka 3.22 Di oudo pwodi etie yamo, edou atar oko umo gi pukupuk, di dwan oko wok ki edou di waco be, “Man en Woda kame amaro, cunya yom i kome; winyenu.”

6Kakame josiao owinyo kede kop noni, gin kiko popoto kiriebo nyim gi piny, di kiko bedo kede lworo karacel kede wor. 7Do Yesu oko ot oko mulo gi di ewaco be, “Yaunu, doko kur ibedunu kede lworo.” 8Do kakame kitingo kede wang gi malo, likame tie ngatamoro kame kiko neno kwanyo Yesu kenekene.

9Kakame Yesu kede josiao mege oudo tie wok kede ki wi moru, en eko ciko gi be, “Kur iwacenu ngatamoro gikame inenunu, tuno kame koyaruno Wot ka dano kikom jo oto.”

10 # Malaki 4.5 Josiao oko penyo Yesu be, “Do pinyo komio doko jopwony me Iswil waco be Elia en kame miero gei bino?”

11Yesu oko dwoko be, “Ebo Elia en kame miero gei bino di en eko temuno gi dedede; 12#Matayo 11.14do awaco ne wu be, Elia otieko bino, do jo likame oko ngene, di gin kiko timo ne gikame cuny gi oudo mito. Wot ka dano da bino neno can i cing gi iepone acel nono.”

13Josiao di do oko niang be Yesu oudo tie yamo ne gi kop i kom Yokana Ngaibatis.

Yesu Ocango Awobi kame tie kede Jwogi

(Marako 9.14-29; Luka 9.37-43a)

14Kakame Yesu kede josiao mege odwogo kede but ekodet, icuo moro oko bino but Yesu di eko riondiko piny i nyime, di eko waco ne be, 15“Rwot, mi kisa maki i kom woda. En etie kede tuwo me ikwikwing, kame tie mine neno can twatwal, pien maro rereto en i mac kede i pii. 16Oudo akele but josiao ni, do gin likame kiko twero cange.”

17Yesu oko dwoko be, “Wun lwak koparao me i kare ni, kame li kede yei, miero abed kede wu pi kare kame rom amene? Apoore kanyakino kope wu tuno awene? Kelenu buta kan.” 18Yesu oko coko jwogi, di jwogi oko wok ki kom awobi nono, di do eko cango esawa nono.

19Josiao oko lwidar ot but Yesu kiko penye be, “Pinyo komio wan likame oudo otwero riamo jwogi nono?”

20 # Matayo 21.21; Marako 11.23; 1 Jokorinti 13.2 Yesu oko dwoko ne gi be, “Pien yei wu titidi. Pi ateteni awaco ne wu be, ka itie kede yei kame rom kede nyige me karadali, ikaruno waco ne moru ni be, ‘Yai ki kane i ot kuca,’ di eko bino yai da. Doko likame tie gimoro kame karuno loni. 21(Do ilega kede kanyo kec kenekene en kame mio gikame cal kamanoni yai, likame bobo tie gimoro ace.)”

Yesu Bobo Owaco Kop kame mako To mere

(Marako 9.30-32; Luka 9.43b-45)

22Kakame josiao oudo ocokere kede i Galilaya, Yesu oko waco ne gi be, “Kobino mino Wot ka dano i cing jo, 23gin kiko bino neke, do oko bino yaruno en i ceng me adek.” Josiao oko bedo kede cwercuny adwong.

Culo Esolo me Tempulo

24 # Yai 30.13; 38.26 Kakame Yesu kede josiao mege ooto kede Kaperanaum, jorar esolo me tempulo oko ot but Petero di kiko penye be, “Apwony wu mam culo esolo me tempulo?”

25En eko dwoko be, “Ebo, eculo.” Kakame Petero odok kede paco, Yesu oko cako yamo kede, di ewaco be, “Simoni, in iparo benyo? Abakai me piny kan gamo esolo me jame kede esolo me apugan kibut anywali me piny arabo kibut jokumbor?”

26Petero oko dwoko be, “Kigamo kibut jokumbor.” Yesu oko dwoko ne be, “Dwong mere be anywali me piny likame culo esolo. 27Do wan likame omito wango cuny gi, in ot i nam iko uco iliket, iko kwanyo deknam kame bino cako moko. Ka iyabo doge ibino udo ogap kame romo culo esolo nin kede mera me tempulo; kwany iko mino gi.”

Currently Selected:

Matayo 17: BILKDC13

Highlight

Copy