Matayo 16

Iparisayon Openyo Giaura kibut Yesu

(Marako 8.11-13; Luka 12.54-56)

1 # Matayo 12.38; Luka 11.16 Iparisayon kede Isadukayon oko bino but Yesu pi kino doge. Kiko penye pi timo ne gi gianena moro kame yai ki malo. 2En eko dwoko ne gi be, “Kame piny oyuto, wun ikounu waco be, ‘Malo obokere, diki piny bino bedo ler.’ 3Doko odiko ikounu waco be, ‘Tin kot bino cwei pien malo obokere, doko idoun oliero.’ Wun ingeunu ngino malo di ikounu tuco ka kot oyaro cwei arabo li, do likame itwerunu niang dwong me gikame tie timere i kare ni. 4#Matayo 12.39; Luka 11.29Jo me i kare ni kame timo tim areco kede kalikame yei Rubanga mito be mi gi gianena, do likame tie gianena moro kame koyaro mino gi, kwanyo kenekene gianena kame otimere ne Yona.”

En eko yai eoto tenge eweko gi.

Arup me Iparisayon kede Isadukayon

(Marako 8.14-21)

5Kakame josiao otuno kede loka tetuca, wi gi oudo owil mako mugati. 6#Luka 12.1Yesu oko waco ne gi be, “Gwokerenu ki arup me Iparisayon kede me Isadukayon.”

7Gin kiko donyo yamo ken gi ken gi be, “En eyamo kamano pien wan likame okelunu mugati.”

8Do kite kame Yesu oudo ngeo kede gikame gin kitie yamo, omio en eko penyo gi be, “Wun jo kame yei wu nonok, pinyo komio itienu yamo kop me bedo li kede mugati wun kenu kenu? 9#Matayo 14.17-21Mam likame pwodi iniangunu? Mam likame iyutununu epone kame apito kede jo tutumia kany kede mugati kany? Bin ikounu coko cam kame odong opongo ibukito adi? 10#Matayo 15.34-38Arabo, mam likame iyutununu kite kame apito kede jo tutumia ongwon kede mugati kanyaare? Ikounu bin coko cam kame odong opongo ibukito adi? 11Benyo benyo komio likame iniangunu be ango oudo likame atie waco kop kame mako mugati? Gwokerenu ki arup me Iparisayon kede me Isadukayon.”

12Di do josiao oko niang be en oudo likame etie waco ne gi be kigwokere ki arup kame konyalo me timo mugati, do pi gwokere ki pwony me Iparisayon kede me Isadukayon.

Kop kame Petero Otuco i kom Yesu

(Marako 8.27-30; Luka 9.18-21)

13I kare kame Yesu ooto kede i adul me Sisiria Pilipi, en eko penyo josiao mege be, “Kara ber jo waco be Wot ka dano en ngai?”

14 # Matayo 14.1-2; Marako 6.14-15; Luka 9.7-8 Gin kiko dwoko be, “Mogo waco be Yokana Ngaibatis, mogo be Elia kede jo apat waco be en Yeremia arabo ngat acel kikom inabin.”

15En eko penyo gi be, “Do wun iwacunu be ango en ngai?”

16 # Yokana 6.68-69 Simoni Petero oko dwoko be, “In en Kirisito, Wot ka Rubanga kakuo.”

17Yesu oko dwoko ne be, “Simoni wot ka Yokana, in itie kede winyo! Pien likame dano adana en kame omi ingeo kop noni, do Papa na kame tie malo. 18Nataman awaco ni be, in en Petero. Ango abino gero ekodet me jo koyei ango i wi lela noni, doko akadi twer me to likame bino twero bwone. 19#Matayo 18.18; Yokana 20.23Abino mini isumilito me Ajakanut me malo. Gi dedede kame in ibino tweno i piny, kobino tweno i malo da, doko gi dedede kame in ibino gonyo i piny kobino gonyo i malo da.”

20Di do en eko ciko josiao mege kitek be kur kiwac ne ngatamoro be en ebedo Kirisito.

Yesu Owaco Kop kame mako Can kede To Mere

(Marako 8.31—9.1; Luka 9.22-27)

21Cako i kare no, Yesu oko cako niango josiao mege be, miero en eot Yerusalem di eko beo i can atot kibut joadongo me piny, jodongo me josaseredoti, kede jopwony me Iswil, di kiko neke, do di oko bino yaruno en i ceng me adek.

22Di Petero oko kwanye otere tenge di oko donyo bunano en di ewaco be, “Rubanga geng gini, Rwot! Gini likame miero timere ne in.”

23Do Yesu oko lokere oko waco ne Petero be, “Irwa tenge ki nyima, in Sitani! In itie gengo ango timo gikame amito pien likame tam nin owok kibut Rubanga, do ebedo me ka dano.”

24 # Matayo 10.38; Luka 14.27 Yesu oko waco ne josiao mege be, “Ka ngatamoro mito luba, ber kong edagere kene di en eko riongo musalaba mere eko luba. 25#Matayo 10.39; Luka 17.33; Yokana 12.25Pien ngat kame mito lako kuo mere bino rwenye, kede ngat kame rwenyo kuo mere pira bino ude. 26Bero nyo kame dano bino udo ka eudo gi dedede kame cunye mito i piny kan do di eko kei kuo mere? Arabo nyo kame dano bino mino pi dwoko kuo mere? 27#Matayo 25.31; Sabuli 62.12; Joroma 2.6Pien Wot ka dano oyaro bino kede imalaikan mege di etie i deyo ka Papa mere, di en eko bino culo ngat acelacel pi gikame etimo. 28Ateteni awaco ne wu be, tie jo mogo kame nataman tie kan, kalikame bino bilo to tuno di kineno Wot ka dano di etie bino di etie i Ajakanut mere.”

Currently Selected:

Matayo 16: BILKDC13

Highlight

Copy