Matayo 15

Pwony me Joakwari

(Marako 7.1-13)

1Kikano Iparisayon mogo kede jopwony me Iswil oko wok ki Yerusalem di kiko bino but Yesu kiko waco ne be, 2“Pinyo komio josiao nin likame lubo itok me joakwari wa? Pien gin likame kilwoko cing gi kame kiyaro cam.”

3Yesu oko dwoko ne gi be “Do pinyo komio wuda iturunu cik ka Rubanga me wek ilubunu itok wu? 4#Yai 20.12; 21.17; Iswilia 5.16; Jolebi 20.9Pien Rubanga bin owaco be, ‘Wor Papa ni kede toto ni,’ kede be, ‘Miero nek dano kame waco kop arac i kom papa mere arabo toto mere.’ 5Do wun ipwonyunu be, ka dano moro owaco ne Papa mere amoto toto mere be, ‘Gikame koto oudo iudo kibuta, ango atieko mino Rubanga,’ likame epoore do timo ne papa mere amoto toto mere gikame nyuto wor. 6Aso, wun itiekunu mino kop ka Rubanga kony mere odoko li pi wun lubo itok wu. 7Wun joecuke! Isaya bin omurao kop me ateni i komu di ewaco be,

8 # Isaya 29.13 “‘Jogi wora kede dog gi,

do cuny gi bor kibuta.

9Kiwora wor me nono,

pien gin kipwonyo iswilia ka dano ineno bala kidoko mega.’ ”

Gikame Pwoko Dano

(Marako 7.14-23)

10Yesu oko lwongo jo bute, en eko waco ne gi be, “Winyunu di ikounu niang. 11Likame gikame donyo i dog dano en kame munao en, do gikame wok ki dog dano en kame munao en.”

12Josiao oko ot but Yesu kiko penye be, “Ingeo be cuny Iparisayon oudo owang kakame kiwinyo kede kop kame in iwaco?”

13Yesu oko dwoko be, “Giapita moroni kame Papa na me malo en kalikame opito kobino puto. 14#Luka 6.39Wun wekunu gin ken gi, gin kibedo imuduka kame telo jo, pien ka emuduk opeo emuduk wad gi, gin duc kibino poto i bur.”

15Do Petero oko waco ne be, “Gony ne wa dwong me agole nono.”

16Yesu oko waco ne gi be, “Mere wuda kom likame pwodi itienu kede niang? 17Mam inenunu be gikame donyo i dog dano kato i yie di do eko pelao ooko me kome? 18#Matayo 12.34Do gikame wok ki dog dano udo owok ki cunye, gi nono en kame munao dano. 19Pien ki cuny dano wok kiye par areco, nek, adote, caro, kuwo, ijura me angalo kede dubo nying jo. 20Magi en gikame munao dano i nyim Rubanga, do camo cam kede cing kalikame kolwoko likame munao dano.”

Yei me Dako me Kanan

(Marako 7.24-30)

21Yesu oko yai tenge ki kuno di eko ot i adul me bomban me Taya kede Sidon. 22Dako moro me Kanan kame oudo bedo i adul me kuno oko bino but Yesu di eko lelemo be, “Okwe Rwot, Wot ka Daudi, mi kisa maki i koma, jwogi omako nyara nan etie kirac twatwal.”

23Do Yesu likame oko dwoko ne kop moro. Josiao ka Yesu oko ot bute kiko donyo bako ne dog gi be, “Koto iwaco ne dako no eot tenge, pien etie lubo wa di elelemo.”

24Yesu oko dwoko be, “Ango oudo oora but jo me Isirael kenekene, jo kame orwenyo bala romini.”

25Do dako nono oko ot oko riondiko i nyime di ewaco be, “Rwot konya.”

26Yesu oko dwoko be, “Likame eber cako kwanyo cam me idwe di iko uco ne igwogin.”

27Dako nono oko dwoko be, “Ebo Rwot, do igwogin da camo angidingidin me cam kame popoto ki wi emesa me ngadwong gi.”

28Yesu oko dwoko ne be, “Dako ni, yei ni dwong twatwal! Wek etimere ni bala kite kame in imito kede.” Kikano nyare oko cango esawa nono.

Yesu Ocango Jo Atot

29Yesu oko yai ki kuno di eko ririto dog nam me Galilaya. En eko ot i wi moru di eko bedo piny. 30Ikodeta me jo atot adikinicel oko ot bute di kitero ingwalasa, jo kame bad gi kede tien gi owanere, imuduka, jo kame leb gi oto kede apat atot. Gin kiko pielo gi piny i nyim Yesu di en eko cango gi. 31Ikodeta me jo oko uro kakame kineno kede di jo kame leb gi oudo oto tie do yamo, jo kame bad gi kede tien gi oudo owawanun di do odoko ber, di ingwalasa ogeo ot kede di imuduka ogeo neno piny. Gin kiko pako Rubanga me Isirael.

Yesu Opito Jo Tutumia Ongwon

(Marako 8.1-10)

32Yesu oko lwongo josiao mege bute, di eko waco ne gi be, “Kisa omaka kede jogi, pien kibedo kan keda nan oromo ceng adek, doko nan likame kitie kede gi me acama. Cunya likame mito peruno gi kede kec, pien kibino nure i yongayo.”

33Josiao oko penye be, “Tuai en kame obino udo kiye cam kame romo pito lwak jo kame rom kan i tim kan?”

34Yesu oko penyo gi be, “Itienu kede mugati adi?” Gin kiko dwoko be, “Kanyaare, kede deknam mogo atitino anonok.”

35Yesu oko waco ne jo be bed piny. 36En eko kwanyo mugati kanyaare kede deknam nogo, en eko mino pwoc but Rubanga di eko tuturo gi eko mino josiao; di josiao oko popoko ne jo. 37Gin dedede kiko cam di kiko yeng, di josiao oko coko angidingidin me cam kame odong oko pongo ibukito kanyaare. 38Jo kame ocamo oudo romo cuo tutumia ongwon di likame komaro iye mon kede idwe.

39Yesu oko peruno jo pi ot i miere gi, di en eko donyo i yi yee, di eko ot i adul me Magadan.

Currently Selected:

Matayo 15: BILKDC13

Highlight

Copy