Tice 5

Anania kede Sapira

1Do icuo moro kame nyinge Anania kede dako mere kame nyinge Sapira, oko gida cato gikame mako gi, 2do en eko nywako tam kede dako mere di eko poko sente mogo kame oudo ecato kede lobo nono, di do eko kelo dul mere kenekene, eko mino i cing joor. 3Do Petero oko penye be, “Anania, pinyo komio iyei ne Sitani odonyo i cunyi pi mini ngalo Tipo Kacil, di iko kano dul me sente kame in oudo icato kede lobo? 4Di oudo pwodi likame icate, mam oudo en meri? Doko akadi di oudo itieko cate da, sente mere mam oudo tie i akarunikin ni? Kara nyo do ber komio cunyi oyei timo gikame cal kamano? Aso neni, in likame ingalo dano do ingalo Rubanga.” 5Kakame Anania owinyo kede kope go, eko poto piny di eko to. Jo ace kame bin owinyo kop nono oko bedo kede lworo atek. 6Awobe oko bino, kiko bono kome di kiko tere ot yike.

7Di oudo pwodi okato bala isawan adek kenekene, dako mere da oko bino, en oudo likame engeo gikame otimere. 8Petero oko waco ne be, “Waca ka erume sente kame icatunu kede poto ine.”

Sapira oko dwoko be, “Ebo, erume mere inonono.”

9Di Petero oko penye be, “Benyo benyo komio wun iyeunu ngalo Tipo ka Rwot? Aso neni, tien jo kotero cwari ot yiko igo tie i ekeko, nan ida kiyaro teri.” 10Cucuto nono di Sapira poto piny i tien Petero, di eko to. Kakame awobe owok kede i yi ot kiko ude etieko to, di kiko tere kioto yike i nget cware. 11Jokirisito dedede kede jo kowinyo kope nogi oko bedo kede lworo adwong.

Joor Otimo Giaura kede gi me Isuur

12Joor oudo otimo gianena kede gi me isuur atot i dier jo. Gin dedede oudo kitie karacel i Balasa ka Sulumani, kame kogero wie. 13Likame tie ngatamoro ace kalikame oyei Kirisito, kame oko kanyakino bino bedo kede gi, do jo oko mino gi wor adwong. 14Di jo atot, cuo kede mon koyei Yesu oko meede ameda bino but Rwot kalamo lem sek. 15Man oko mino jo oko donyo tingo jotuwo kame oudo tie i miere di kikelo pielo i lak yongayo, i pualisin kede i pare tetekeny kame Petero tie beo, amotoko tipo mere bei i kom jo mogo kikom gi. 16Jo oko yai ki bomban koluko Yerusalem kiko cokere, di kikelo jotuwo kede jo kame tipo areco oudo omako, di gin dedede kiko cango.

Kotidilo Joor

17Ngatel Josaseredoti oko yai malo karacel kede jo dedede kame oudo tie kede, kame oudo obedo ekodet me Isadukayon. 18Pi nyeko omio kiko mako joor di kiko rwako gi i otkol kame bin kotweo iye jo dedede. 19Do iwor nono malaika ka Rwot oko yabo ekeko me otkol, di eko woto gi ooko, eko waco ne gi be, 20“Otunu icungunu i tempulo di ikounu tatamo ne jo kope dedede me Kuo noni.” 21Kakame kiwinyo kede kop noni, gin kiko ot i tempulo odiko di kiko pwony. Kikano Ngatel Josaseredoti karacel kede jo kame en oudo etie kede oko bino, kiko lwongo kansulo karacel kede joadongo, di kiko cwano kop i otkol pi kelo gi i nyim kansulo. 22Do kakame jo kame lo mabus otuno kede, kiko udo joor li i otkol, di do kiko dwoko ne jodongo gi kop i kansulo be, 23“Wan otuno kuno oko udo ikekon me otkol ogoore dedede kiber di isirikalen jodar tie cungo kanono, do kakame oyabo kede ekeko, likame oko udo ngatamoro i ot.” 24Kakame ngadwong me isirikalen kame bin daro tempulo, karacel kede jodongo me josaseredoti owinyo kede kope go, kom gi oko to kiko donyo parere pi gikame do oyaro timere. 25Ngatamoro oko bino di oko waco ne gi be, “Jo kame wun oudo itweunu i otkol ka tie cungo i tempulo di kipwonyo jo.” 26Di do ngadwong me isirikalen me tempulo karacel kede jodongo icegun oko ot, di kiko kelo gi, do likame kede gero, pien oudo kitie kede lworo be jo bino didipo gi kede kide.

27Kakame kikelo kede joor nogo, kiko mino gi kicungo i nyim kansulo. Ngatel Josaseredoti oko cako bunano gi di ewaco be, 28#Matayo 27.25“Wan oudo ociko wu kitek be miero kur ipwonyunu jo i nying Yesu, do di nan bobo wun itiekunu sarakino pwony wu i Yerusalem dedede. Wun itienu mito be remo me icuo ni dwog i wi wan.”

29Petero karacel kede joor icegun oko dwoko be, “Wan miero olub gikame Rubanga mito ne wa timo, do weko me ka dano. 30Pien Rubanga ka joakwari wa oyaruno Yesu kame wun bin inekunu di ilierenu i kom yat. 31Rubanga oko tinge malo oko kete i bade tetu cam, bala Ngapug, kede Ngalak, tetekeny idwe me Isirael ud winyo me swilaro kede kiud isasir ki dub gi. 32Wan karacel kede Tipo Kacil, kame Rubanga omio but jo kame wore, obedo ijurak me kope nogi.”

33Kakame jo kame bin tie i kansulo owinyo kede kope go, cuny gi oko doko kec di kiko mito neko gi. 34Do Ngaparisayo acel kame oudo tie i kansulo, kame nyinge Gamaliel, ngapwony me Iswil, kame jo dedede oudo woro, oko yai malo di eko mino dwan be ber kong ter joor nogo ooko pi esawa moro atitidi. 35Di en eko waco ne gi be, “Jo na me Isirael, gwokerenu i kom gikame itienu mito timo ne cuo gi. 36Pien icuo kame nyinge Teyuda bin owokun i kare okato di emire bala dano moro kame pire dwong, di cuo kame romo bala tol ongwon oko donyo bute; do bin oko neke di jo kame lube dedede oko sarakin, kop gi nono oko jik. 37Ingei mano, icuo acel Ngagalilaya kame nyinge Yuda oko eda wokun i kare me maro jo, di eko loko tam me jo atot oko donyo lube; do eda eko to. Jo kame bin lube da oko sarakin. 38Aso, i kom kop me tin noni da, ango awaco ne wu be, wekunu jogi, kur itimunu ne gi gimoro; pien ka tim gi no obedo iik ka dano, ebino poto; 39do ka ebedo iik ka Rubanga, wun likame iyarunu twero lono gi. Doko ibinunu udo be, cengemogo itienu yi kede Rubanga!”

40Kansulo oko yei lubo gikame Gamaliel owaco. Di do kiko lwongo joor i ot, kiko mino kodao gi, di kiko ciko gi be miero kur doko kitatamo ne jo nying Yesu, di do kiko weko gi kioto. 41Kikano di do joor oko yai ki nyim kansulo di kilelo pien kotero gin bala jo kame poore neno can pi nying Yesu. 42Di do gin kiko donyo pwony ceng dedede i tempulo kede i miere, di kituco kop i kom Yesu be en kame ebedo Kirisito.

Currently Selected:

Tice 5: BILKDC13

Highlight

Copy