Tice 4

Petero kede Yokana i nyim Kansulo

1Kakame Petero kede Yokana oudo tie yamo kede jo, josaseredoti kede ngadwong me isirikalen me tempulo kede Isadukayon oko bino but gi. 2Gin oudo kitie kede wangcuny, pien Petero kede Yokana oudo tie pwony be jo yaruno, di kiyamo be Yesu oyaruno kikom jo oto. 3Di do gin kiko mako Petero kede Yokana kiko rwako gi i otkol tuno oru mere, pien piny da do oudo oyuto. 4Do jo atot oko yei ingei winyo kop kame Petero kede Yokana opwonyo, di wel me cuo koyei oko romo bala tutumia kany.

5Oru mere, jo kame pugo Iyudayan, joadongo me piny kede jopwony me Iswil oko cokere Yerusalem, 6karacel kede Anas kame oudo obedo Ngatel Josaseredoti, kede Kayapa kede Yokana, kede Alekesanda kede jo dedede kame wok ki ekeko me Ngatel Josaseredoti. 7Gin kiko kelo Petero kede Yokana i diere gi, di kiko penyo gi be, “Wun itimunu gini kede twer mene, arabo i nying ngai?”

8Kikano Petero oko pong kede Tipo Kacil, di eko waco ne gi be, “Wun wegi apugan karacel kede joadongo me piny, 9ka tin kotie pepenyo wa kop i kom gi aber kame kotimo ne engwalas, epone kame kocange kede, 10wek wun dedede kede jo me Isirael dedede ingeunu be, icuo ni nan tie cungo i nyimu kan di eber, pi nying Yesu Kirisito me Nasaret. Yesu nono en kame wun bin igurunu i kom musalaba, di Rubanga oko yaruno en kikom jo oto. 11#Sabuli 118.22Man en kidi kame bin wun jogedo idagunu, kame nan oko lokere odoko kidi kame pire tek me esonda. 12Doko likame tie ngatamoro kame wan otwero udo alako kibute, pien likame tie nying moro i piny kan kame kotieko mino jo, kame mio wa alako.”

13Kakame kineno kede nwangcuny ka Petero kede Yokana, kede bobo di oudo kiniang be gin kibedo jo atatai kalikame osomo, kiko uro; di kiko ngeno be Petero kede Yokana oudo obedo kede Yesu. 14Do bin di kineno icuo kame kocango nono di cungo i nget gi, likame tie gimoro arac kame oudo kiromo yamo. 15Di do gin bin kitieko cwano Petero kede Yokana ooko me kansulo, kiko donyo ber poro kop di kipenyere be, 16“Otimunu ne jogi nyo? Pien kitieko timo gianena kame tie kakaler but jo dedede kame bedo Yerusalem, kame wada likame otwerunu dagi. 17Do pi mino kop ni kur med sarakin, wan poore omiunu gi dwan atek kame gengo gi bobo yamo nying Yesu but ngatamoro.”

18Di do gin kiko lwongo Petero kede Yokana, di kiciko gi kitek be miero kiwek atwal yamo nying Yesu arabo pwonyo jo kop amake. 19Do Petero kede Yokana oko dwoko ne gi be, “Wun en kame miero iyerunu, arabo epoore i nyim Rubanga pi wan winyo dwanu, amoto dwan Rubanga; 20pien wan likame otwero weko yamo kop i kom gikame oneno, kede kame owinyo.” 21Kakame bin kitieko kede medo wowono gi, kiko weko gi kioto, pien oudo likame tie epone moro kame gin kitwero mino gi kede alola moro. Gin oudo kilworo jo, pien jo dedede oudo tie pako Rubanga pi gikame otimere. 22Icuo kame bin gianena me cango otimere i kome nono oudo mwakini mege me dongo kalamo ot ongwon.

Jo Koyei Kirisito Okwao Rubanga pi Mino gi Nwangcuny

23Kakame kogonyo kede Petero kede Yokana, gin kiko dok but jowot gi, di kiko tatamo ne gi gikame jodongo me josaseredoti, kede joadongo me piny owaco ne gi. 24#Yai 20.11; Nekemia 9.6; Sabuli 146.6Kakame kiwinyo kede kop nono, gin dedede kiko kwano Rubanga kede dwan acel di kiwaco be, “Okwe Rwot Won twer, ngat kocweo malo kede lobo kede nam kede jame dedede kame tie i yi gi. 25#Sabuli 2.1-2 In en kame bin iwaco i dog ngatic ni kwaru wa Daudi kede twer me Tipo Kacil be,

“‘Pinyo komio jo kalikame Iyudayan odoko ger;

pinyo komio jo odonyo bedo kede tam i kom gikame kony gi li?

26Abakai me lobo ni otieko iikere kiteere cungo,

kede jotel da otieko cokere karacel,

pi yi kede Rwot kede Kirisito mere.’

27 # Matayo 27.1-2; Marako 15.1; Luka 23.1, 7-11; Yokana 18.28-29 “Pien ateteni bin Erode kede Pontio Pilato, kede jo kalikame Iyudayan, karacel kede jo me Isirael bin ocokere i bomba noni pi suro Yesu Ngatic nin kacil, kame in iwiro. 28Gin kitimo man pi cobo gi dedede kame cingi kede tam ni bin otieko iiko sek be bino timere. 29Okwe Rwot, nan do nen ber epone kame gin kitie wowono wa kede, di iko mino jotic ni nwangcuny me yamo abongo lworo moro. 30Riei cingi iko cango jo, doko wek kotim gi me isuur kede gianena pi nying Yesu Ngatic nin kacil.”

31Kakame kitieko kede ilega, kabedo kame gin oudo kicokere iye nono oko yangere, di gin dedede kiko pong kede Tipo Kacil, kiko donyo yamo kop ka Rubanga kede nwangcuny.

Jo Koyei Kirisito Onywako Jame gi

32 # Tice 2.44-45 Ekodet me jokoyei Kirisito oudo tie kede tam acel kede cuny da acel. Likame tie ngatamoro kikom gi kame oudo waco be gikame en etie kede obedo mere kene, do gin oudo kinywako jamini dedede karacel. 33Joor oko mino ijura i kom yaruno ka Rwot Yesu kede twer adwong. Doko kisa ka Rubanga oudo tie kede gin dedede. 34Likame tie ngatamoro kikom gi, kame gimoro oudo oremo, pien ngat acelacel kikom gi, kame oudo tie kede lobo arabo ode moro, bin ecato di eko tero sente kame eudo, 35di eko keto i cing joor. Bin sente nogo kopopoko ne ngat acelacel di lubo kony kame mitere ne.

36En komio Yosepu kame oudo joor ocako ne nyinge be Baranaba (kame dwong mere be ngasup cuny jo), kame oudo obedo Ngalebi, anywali me piny me Sipuro, 37oko eda cato poto mere di eko tero sente kame eudo but joor.

Currently Selected:

Tice 4: BILKDC13

Highlight

Copy