Malko 13
13
Yesu walanda apa ifintu vya mpelelekezyo
(Mt 24:1-2; Lk 21:5-6)
1Na pano wafumile un-ng'anda-nkulu-iyi-Leesa, unndondeshi waakwe wenga, wannenile, waati: “Kasambilizya, lola amafinga ya fino yali, ni mikulo i!” 2Yesu wannena, waati:, ‘Walola imikulo imikulu? Litalusyala pa ifinga apali nina, lino litalupomolwa.”
3Na pano walile waatikala um-mwamba wa Mizeituni, wuno wulondekine ni ng'anda-nkulu-iyi-Leesa, Petlo na Yakobo na Yoane na Andelea yamtondosizye ukumbali, yaati: 4“Tunene ifintu fiyo viluwa li? Ni chilangizyo chi pano ifintu fiyo vilupalamila ukwiza?” 5Yesu atampa ukuyanena, ati: “Chenjelini, umwi atamuzosya. 6Ainji yalwiza ukwizina lyane, angi yaluti: “Nene nkola,’ nayo yaluzosya ainji. 7Nemwe pano mwapulika isumo ni mpwepwe zyi isumo, mutachopa; kuno fiyo vilwisa, leelo impelelekezyo ichili. 8Kuno antu yalukatuka ukulwa na antu, nu wene ulukatuka ukulwa nu wene; kuluwa ivitetema vya nsi mûntu-mûntu, kulupona inzala; ifintu vi uli ntangulo ya machulo.
9“Nemwe chenjelini; kuno yalumutwala apa yakombe nu um-mang'anda yi Leesa yalumuma, nemwe mulutwalwa pali yano yamulâsile na yene ukwizina lyane, ukuwu syuta kuno yali. 10Ni ntangulo iswi-zipe litane lisundwe uku yantu yoshi. 11Na pano yacha yamusenda nu kumusongelela, mutachelengula chino mwaulanda pao kwene, lyonsi lino mwacha mwanenwa lilandini, kuno asi mwemwe mululanda, leelo uMweso Nswefu. 12Nuntu alusongelela unnina, kuti yamumole, na isi alusongelela umwana, na ana yalukatukila avyazi yao nu kuyumola. 13Nemwe mulutuwiwa na antu yoshi ukwizina lyane. Leelo uwacha walemasya fika ni chisila, uwino alufyuka.
14“Lelo pano mwacha mwalola uipe wa wononi wimilila pataliile—kasoma amanya—apano yano yali um-Yudea itukile um-myamba. 15Nuntu wino ali apidali, atika nanti ukwingila nu kutola chimwi un-ng'anda umwakwe. 16Na wino ali un-chalo atapiluka uku chisila ukutola umwenda wakwe. 17Leelo akalanda kao ayanda na alonsya amanda yao. 18Leelo pepini vitacha vize apa manda ya nzusi. 19Kuno amanda yalye yaluwa ya machulo, ukuluta fuma na lino Leesa waumvile insi fika na kasalaka, na kaili kutaluwa nanti uche. 20Nu Mwene ndi atali aputukizye amanda yao, atala afyuke untu umwi, leelo kuno kuli asolole yano wayasolwile, chaleka waputukizya amanda yao. 21Na manda yalye nguntu wamunena, waati: “Lolini, Klisto ali pa, nanti ali kuku, mutachi zumila. 22Kuno yalwisa aklisto-ya-ufi, na malau ya ufi. Yaluchita ivipezya-mano ni vizunguko, kuti yamuzosye nasolola kwene ndi chingawa. 23Leelo mwemwi, chenjelini, inti munena vyonsi inkolelo.
24“Lelo amanda yalye, ichisila cha machulo yao, ilanzi lilufitokela, nu mwezi utaluwala. 25Ni ntanda zya mwiyulu zilupona, na maka yano yali umwiyulu yalutelengana. 26Apano yalulola uMwana-ntu alwiza um-mapufi uku maka tupu nukulu. 27Apano alutuma yamalaika uku yakonganika asolole yaakwe ukufuma isansa zini, ukufuma kuno isansa lyasilile ilya nsi, fika na kuno isansa lya mwiyulu lyasilila.
Amasambilizyo ya nsamvu
(Mt 24:32-35; Lk 21:29-33)
28“Sambililini unnumbe wa nsamvu: amatai yaakwe pano yalemba nu kufumya amafwa, mumanya fino ichisiku ichipalamila. 29Ifino nemwe kwene, pano mwalola ifintu fiyo vyatampa, mumanye fino ndi apipi um-milyango. 30uMwenemo ndumunena, uluko lu lutalusila ange ifintu vi vichili vize. 31Iyulu ni nsi vilusila, leelo amaswi yane yatalusila nanti uche. 32Leelo ukumanya kwa wanda ulye na pano chafika, kusi wino amanyile, nanti ayamalaika ya mwiyulu, nanti uMwana, leelo Tata mpela.
33“Tekelini, muchesye; kuno mutamanyile uluwa li. 34Unnumbe waakwe chili wa ntu wino wapita um-masi, wasya ing'anda yaakwe, wapa aomvi yaakwe amaka, na chila ntu u nnimo wakwe, nawe wanena kalolela wa ng'anda atachilala. 35Mutachilala leelo, kuno mutamanyile pano unkola ng'anda alwiza, ngi amanguzi nanti usiku apakasi, nanti pali ya nkolwa, nanti katondo-tondo. 36Atisa suwa amusane umulala. 37Naliyo ndumunena mwemwe, namunena mwensi: Mutachilala.”
Currently Selected:
Malko 13: FNT1988
Highlight
Share
Copy
Want to have your highlights saved across all your devices? Sign up or sign in
New Testament in Fipa © United Bible Societies, 1988. Bible Society of Tanzania.
