Malko 14

Yesu wapakwa mafuta. Yuda wazumila ukumfima

(Mt 26:1-5; Lk 22:1-2; Yn 11:45-53)

1Ni chisila cha manda yaili wali uwanda ukulu wa Pasaka, ni mikate-isi-ninsasyo. Ayikolo iyakapela na yakaandika yasita inzila ya kunnema uku uchenjezu nu kumumola. 2Kuno yalile yaati: “Chitawa pa wanda ukulu, kutache kuwe ni mpanzyela unjantu.”

3Nawe pano wali uku Betania un-ng'anda yi Simoni wa ntana, pano ali apa chakulya, awiza umwanachi ali nu nsazi wa mafuta ya nalido aya mpia tupu; atama unsazi awitulwila amafuta apa ntwe wakwe. 4Pali antu yamwi yalakalike, yaati: “Uku chani ukulovya mafuta vi? 5Kuno amafuta ya yali yakalwe uku mpia imyanda yitatu nu kuluta, yapiwe apina.” Yannakalikila nkani umwanachi wiyo. 6Leelo Yesu wavwanga, waati: “Nnekini, uku chani mulumchuzya? Anchitile ichazipa. 7Kuno amanda yoshi apina yali ponga nemwe, mungayachitila ichizipe chino mukasime, leelo nemwi musi nene manda yoshi. 8Watachita chino awezizye, wapaka umwili wane inkolelo ya kunzyika. 9uMwenemo ndumunena, konsi kuno iswi-zipe lilusundwa un-nsi yoshi, alachi chino umwanachi wachita chilulandwa uku kumwizukila.”

10Pali yaya ikumi na yaili, wenga Yuda Iskaliote, ayu ku yikolo iyakapela, kuti amfime kuno yali. 11Nayo pano yapulika, yachimba yannanya ukumpa impia. Wasita inzila ya kumfima uwanda uno uzifile.

Wanda wa Pasaka

(Mt 26:17-25; Lk 22:7-14, 21-23; Yn 13:21-30)

12Nu wanda wa ntangulo wa mikate-isi-ninsasyo, pano yafyuzile iPasaka, alondeshi yaakwe yannenile, yaati: “Api pano ukasime ukulyila iPasaka yi tukakuteye?” 13Watuma yaili apa alondeshi yaakwe, waati: “Yangini uku nsi, mwankomengana nu ntu asensile ichalusi cha mansi, munnondele. 14Na pano wingila, munnena unkola ng'anda, muti: ‘Kasambilizya aluti: Chilikwi ichumba chane icha eni, ndyile iPasaka muo ponga na alondeshi yane?’ 15Nawe unkola akumulanga chumba ichikulu ukwi golofa, ichiteye. Twimwile-mu.” 16Nga alondeshi yafuma yayu uku nsi, yaya yalola ndi fino ayanenile; yateyanya iPasaka muo. 17Nga pano yawa mangusi, awisa na yalye ikumi na yaili. 18Na pano yalile iyikala apa chulya, Yesu wayanenile, waati: “Umwenemo ndumunena: wenga pali mwemwe, nawe alulya ponga nene, alunfima.” 19Nga yalola ichikonko yamtondosya wenga wenga, yaati: “Chene! Nene?” 20Ayanena, ati: “Ali wenga pali ya ikumi na yaili, wino wasonda ponga nene un-nweso. 21Kuno Mwana-ntu wapita fino waandikilwe, leelo akalanda uku ntu wiyo wino wamfima Mwana-ntu; change chizipe untu wiyo ndi atala vyalwe.”

Chakulya cha Mwene

(Mt 26:26-30; Lk 22:14-20; 1 Akoli 11:23-25)

22Nayo pano yalyanga, watozile unkate aupepelela, aukunyola ayapa, avwanga, ati: “Tolini, alau mwili wane.” 23Nga atola untonto, asamalizya, ayapa, yanwela yoshi. 24Ayanena, ati: “Alau uli wazi wane uwa Upangano, uno ulwitika uku yantu tupu. 25Umwenemo ndumunena: ntalunwa kaili amasi ya nsabibu, kufika uwanda wuwu uno ndunwa apya um-wene-wi-Leesa.”

Yesu walanda fino Petlo wammkana

(Mt 26:31-35; Lk 22:32-34; Yn 13:36-38)

26Nga pano yamala ukulunda, yafuma yapita ukuya uku mwamba wa Mizeituni. 27Yesu ayanena, ati: “Mwanfwitoka mwemwi mwensi pa nnandu wane, kuno chaandikwe: ‘Nammuma unchemi ni nfwele zyansambala.’ 28Leelo apa kututuluka kwane ndumukolelela ukuyu ku Galilea.” 29Petlo wannena, waati: “Nanti yakusya yoshi, leelo nemwi pole.” 30Yesu wannena, waati: “Umwenemo ndukunena wewe, ilelo usiku wu, pano nkolwe achili alamule amaila yaili, wannkana amaila yatatu.” 31Leelo nawe avwanga na maka, ati: “Nanti ukufwa, namfwa ponga newe, napo kwene nsukukana nanti uche.” Yoshi yavwanga fiyo kwene.

Yesu un-Getsemane

(Mt 26:36-46; Lk 22:39-46)

32Nga yiza ukwitimba lino yakuluti: “Getsemane,” anena alondeshi yaakwe, ati: “Wikalini pa, pano njilu pepa.” 33Wasenda Petlo na Yakobo na Yoane ponga nawe. Atampa kusima nkani nu kusamala. 34Ayanena, ati: “Umweso wane uli na malanda nkani nanti ukufwa; wikalini pa mutachilala.” 35Aya pa nkolelo uche, apona pansi, apepa ukuti: “Atachiya um-machulo ndi chingawela.” 36Avwanga ukuti: “Aba, Tata; vyonsi vingaombeka kuli wewe, untisizye ulwako lu kuli nene; leelo chitaombeka fino nkasime nene, leelo chiombeke chino ukasime wewe.” 37Nga awiza azana iyalala utulo, wanena Petlo, waati: “Simoni, ukulala? Wapotwa ukuntalala nanti insaa yonga? 38Mutachilala, pepini, mutachimwingile um-mazosyo; umweso ukasime, leelo umwili utonsile.” 39Aya kaili apepa iswi lili kwene. 40Apiluka kaili azana iyalala, kuno amaso iyalemeka nu utulo; nga yatamanyile ni chakunnena. 41Wisa ilya utatu, ayanena, ati: “Ali lalini, puzini; chi chilingana; kazimbo ikafika, lolini Mwana-ntu watelwa um-makasa iya maifyo 42Katukini tupite; lolini wino alunfima watapalamila.”

Yalema Yesu

(Mt 26:47-56; Lk 22:47-53; Yn 18:3-12)

43Nga pano achili aluvwanga, liyo kwene Yuda awisa, wiwi uwikumi na yaili, ponga nawe iumba yali ni mpanga ni nonga, yafuma uku yikolo iyakapela na yakaandika na yikolo. 44Na wino alumfima walile watayapa akamanyililo, ati: “Wino natoswela uwiyo kwene; innemini, mnsende ningo.” 45Nga lino wiza wiyo kwene aya kunali, avwanga, ati: “Labi.” Wantosola. 46Yakatusya makasa yao, yannema. 47Nga wenga pali yano yalipo, asomola impanga, akoma unzya wi Kapela-nkulu, amsesula ikutwi. 48Yesu ayanena, ati: “Umufuma kuti myilulema ukulu poka-ivyayantu, muli ni mpanga ni nonga, ukundema nene? 49Manda yoshi nali pali mwemwe un-ng'anda-nkulu-iyi-Leesa, angi ndusambilizya, mutandema; leelo ifintu vi vyaloleka ukuti aMaandiko yafikilile.” 50Apano alondeshi yamsya, yituka yoshi.

51Nu nnumendo wenga wannondile, wakuwile uku mwili waakwe umwenda untiswe, yannema. 52Nawe wasya umwenda uo untiswe, wituka tupu.

Yesu mwitengo

(Mt 26:57-68; Lk 22:54-55, 63-71; Yn 18:13-14, 19-24)

53Pano yasenda Yesu kwi Kapela-nkulu, yankonganila yoshi ayikolo iyakapela na yikolo na yakaandika. 54Petlo nawe wannondela lwa patali, afika unkasi um-nsolo wi Kapela-nkulu, anga tenzi ponga na asalifi, alota umoto. 55Nga yikolo iyakapela na kombe yoshi, yasita usyuta kuli Yesu, kuti yamumole, leelo waula. 56Kuno ainji yamsyutile ufi, leelo nusyuta wao waleunkana. 57Na yamwi yimilile yamsyutile ufi, yaati: 58“Sweswe twampulike, aluti: ‘Nene nampomola ng'anda-nkulu-iyi-Leesa, yino yakuzilwe uku makasa, nu ku manda yatatu ndukula inina yino italukulwa uku makasa.’ ” 59Leelo na fiyo kwene usyuta wao utakomengine, waleunkana. 60Apano Kapela-nkulu wimilile apakasi, watondosya Yesu, waati: “Utaluvwanga chimwi? Alaya yalukutakila chani?” 61Leelo atuzya, atavwanga chimwi. Kapela-nkulu wamtondosya kaili, waati: “Wewe uli Klisto, Mwana wa Mpepelelwa?” 62Yesu avwanga, ati: “Ali nene; nemwe mululola Mwana-ntu atensi ikasa lya kwi lunji ilya Maka, alwisa na mapufi ya mwiyulu.” 63Kapela-nkulu walepola imyenda yaakwe, wafwaanga, waati: “Tulusitila yasyuta chani kaili? 64Mwapulika imisuli yaakwe; mwalola uli nemwe?” Yoshi yamputwila, yaati: “Chinjile ukumolwa.”

65Yamwi yatampa ukunswila amati, yamkuwa ukumanso nu kumuma vikonde, yannena, yaati: “Lauzya!” Na asalifi nayo yamuma makofi.

Petlo wamkana Yesu

(Mt 26:69-75; Lk 22:56-62; Yn 18:15-18, 25-27)

66Nga Petlo wali um-nsolo apansi; awisa umwi apa asungu yi Kapela-nkulu. 67Annola Petlo alotu moto, wamkundwile amanso, wavwanga, waati: “Newe kwene wali ponga na wiwi Yesu umNasaleti!” 68Wakana, waati: “Ntamanyile nanti ukupulika fino ululanda uwewe.” Afumila apansi unduselelo. 69Na wiwi umuofi annola kaili, atampa kuyanena yano yimilile palye, ati: “Alawi unnina wao.” 70Wakana kaili. Kazimbo kache kaili yano yimilile palye, yannena Petlo, yaati: “Umwenemo, wewe unnina wao, kuno wewe umGalilea.” 71Atampa kutipa nu kulapa, ati: “Ntamanyile untu wi wino mulutaka.” 72Liyo kwene nkolwe alamula ilya uwili. Petlo wisukila iswi lili lino Yesu wannenile, ukuti: “Pano nkolwe achili alamula luwili, ulunkana amaila yatatu.” Nga watalika ukulila.

Currently Selected:

Malko 14: FNT1988

Highlight

Copy