Malko 10

Kufima lucheto

(Mt 19:1-12; Lk 16:18)

1Nga akatuka aya unmbali ya Yudea ni mbalama yi Yodani, amaumba tupu yakongana kaili kunali, ayasambilizya kaili fino wamanyilila. 2Nga aFaliseo yaya kunali yamtondosya, yaati: “Chene! Chili ningo untu ukuta unchi?” Na ku yalumwezya. 3Nawe ayanena, ati: “Mose wamunenile chani?” 4Yalanda, yaati: “Mose watunenile ukwandika imbaluwa ya kutana nu kunta.” 5Leelo Yesu ayanena, ati: “Uku ukomu wa myenzo yino wamwandikile ichilangaso chi. 6Leelo ukufuma ukulengwa kwa nsi, wayaumvile monsi nu mwanachi. 7Ichino fiyo untu alusya isi na nyina, alemana nu nchi. 8Na yao yaili yaluwa umwili wonga, nga yasi yaili kaili, leelo umwili wonga. 9Ichino chino Leesa walimba, untu atachilimbulula.” 10Nu ku ng'anda alondeshi yamtondosya kaili iswi liyo. 11Wayanena, waati: “Untu wensi uwacha wata unchi watola unji, aluchita ivya upundu kuli wiyo. 12Nu nchi ndi wasya iya nu kutolwa nunji, aluchita ivya upundu.”

Yesu wapepelela anche

(Mt 19:13-15; Lk 18:15-17)

13Nga yannetela anche yanono kuti ayemye; leelo alondeshi yaakwe yayachenzela. 14Leelo Yesu pano walola, atuwa nkani, ayanena, ati: “Lekini anche yanono yize kunondi. Mutachi yalesya, kuno anche ndi ya uwene-wi-Leesa uwao. 15Umwenemo ndumunena: wensi wino ataluzumila uwene-wi-Leesa wa mwanche nnono, atalwingila nanti uche.” 16Nga ayafukatila, awika makasa pano yali, ayapepelela.

Unnumendo unsafi

(Mt 19:10-30; Lk 18:18-30)

17Na pano alufuma ukuyu kunsila, untu wenga wisu lwilo, wamfukamila, wamtondosha, waati: “Kasambilisha nsipe, inchite uli kuti mpyane upuma wa manda ti?” 18Yesu wannena, waati: “Uku chani ukungita ne nsipe? Kusi unsipe leelo wenga ali Leesa. 19Umanyile ivilangaso: ‘Utachumola; utachichita ivya upundu. Utachiiya; utachisyutila ufi; utachifya; uchindike so na nyoko.’ 20Wannena, waati: “Kasambilizya, yoshi ya nayalema ukufuma uwanche wane.” 21Nga Yesu annolekesya nkani, amkunda, annena, ati: “Wawulilwa ichintu chonga: Yanga kakazye vyonsi fino uli navyo, upe apina, newe ukuwa ni vyuma umwiyulu; apano uwize undondele.” 22Leelo wene wakonza ichikole ukwiswi liyo, wapita ni chikonko, kuno wali ni vyuma tupu.

23Yesu alola konsi konsi, annena alondeshi yaakwe, ati: “Vino chilutala asavi ukwingila um-wene-wi-Leesa.” 24Alondeshi yazunguka uku maswi yaakwe. Yesu ayanena kaili, ati: “Yanane, fino chatala ukwingila um-wene-wi-Leesa. 25Chapepela ntwanga-mwendo kwingila nu kufuminkana umwilina lya sindani, kuluta unsafi ukwingila um-wene-wi-Leesa.” 26Nayo yasunguka leka, yannena yaati: “Uwini fwandi wino angafyuka?” 27Yesu ayalolekesya, ati: “Uku yantu chitangi chiwe fiyo, leelo kuli Leesa chisi fiyo. Kuno vyonsi vingaombeka kuli Leesa.”

28Nga Petlo atampa ukunnena, ati: “Lola, sweswe twasya vyonsi nu ku kulondela Wewe.” 29Yesu waati: “Umwenemo ndumunena, kusi untu wino wasyi ng'anda nanti anina ayonsi, nanti anina aziche, nanti nyina nanti isi, nanti ana, nanti fyalo kwisina lyane nu kwiswi-zipe; 30leelo angapiwa maila umwanda: li kwene apa kasalaka, ing'anda nanina ayonsi na aziche na nyina na ana ni vyalo ponga nu kuzunywa, nun-nsi yino ilwiza upuma wa manda ti. 31Leelo ali inji aya ntangulo yaluwa ya chisila, na ya chisila yaluwa ya ntangulo.”

Yesu walanda ilya utatu apa nfwa nu kututuluka kwakwe

(Mt 20:17-19; Lk 18:31-34)

32Nayo yapitanga ukuya ku Yelusalemu na Yesu angayakolelile; yazunguka, nayo apa kunnondela yali ni ngofi. Nga kaili ayatola yalye ikumi na yaili, atampa ukuyanena amaswi ya ifintu fino vyaumsana. 33Ayanena, ati: “Lolini, twayu ku Yelusalemu nu Mwana-ntu alufimwa um-makasa ya yikolo iyakapela na yakaandika, nayo yalumputwila ukufwa; yalumfima uku yakulukuwa. 34Nayo yalumsoweka nu kumswila amati, yalumuma ni mikowa nu kumumola; ni chisila cha manda yatatu alututuluka.”

Utalâsa, leelo ombela

(Mt 20:20-28)

35Nga Yakobo na Yoane ana yi Zebedeo, yaya kunali, yannena, yaati: “Kasambilizya, tulusita utuchitile lyonsi lino twakulomba.” 36Wayanena, waati: “Mulusita nmuchitile chani?” 37Yannena, yaati: “Tulusita utuleke sweswe twikale wenga ikasa lyako ilyi lunji na wenga ikasa lyako ilya kuli kamani, um-ukulu wako.” 38Yesu wayanena, waati: “Mutamanyile chino mululomba. Munganwela ulwako luno ng'welile nene, nanti ukubatiziwa ulubatizyo luno nbatiziwilwe nene?” 39Yannena, yaati: “Ee.” Yesu wayanena, waati: “Ulwako luno ndunwela nene, mulunwela, nu lubatizyo, luno mbatizilwe nene, mwambatiziwa. 40Leelo amaswi ya kwikala ikasa lyane ilya kwilunji nanti ikasa lyane ilya kuli kamani, lisi lyane ukumupa, leelo yalupiwa yao yano yawikilwe.”

41Na pano yalye ikumi yapulika, yatampa ukuyalakalikila Yakobo na Yoane. 42Nga Yesu ayita ayanena, ati: “Mumanyile yano yalwitwa aene ya akulukuwa yakululâsa uku maka, na ikolo yao yakuluyaombisya. 43Leelo chitali fiyo kuli mwemwe; leelo untu wino alusita ukuwa uwikolo kuli mwemwe, aluwa uwa kumuombela mwemwe. 44Nu ntu wino alusita ukumukolelela, aluwa umuofi wino. 45Kuno Mwana-ntu atizile ukwizu ombelwa, leelo ukuombela nu kuufima awe unkuluzi wa inji.”

Batimeo umpofu wapoziwa

(Mt 20:29-34; Lk 18:35-43)

46Nga yafika um-Yeliko na pano yalema inzila ukufuma ku Yeliko ponga na alondeshi yaakwe, niumba ikulu, mwana wi Timeo, Batimeo, wilye kalomba umpofu, wikazile umbali ya nzila. 47Nawe pano wapulika ukuti Yesu wa ku Nazaleti, watampa kwangula nu kufumya iswi lyaakwe nukuti: “Yesu, mwana wi Daudi, unkumbukile!” 48Na inji yamkalipila, kuti atuzye; leelo alusya ukwangula ukwiswi: “Mwana wi Daudi, unkumbukile!” 49Nga Yesu awimilila, ati: “Mwitini.” Nga yita mpofu wiyo, yannena, yaati: “Teka umweso; katuka, alukwita.” 50Nga asumba umwenda wakwe, atumpuka, aya kuli Yesu. 51Nga Yesu wannena, waati: “Ulusita nkuombela chani?” Nga umpofu wiyo waati: “Kasambilizya wane, ndusita umpe ukulola.” 52Nga Yesu wannena, waati: “Pitanga, usumilo wako wakupozya.” Liyo kwene atampa kulola, annondela un-nzila.

Currently Selected:

Malko 10: FNT1988

Highlight

Copy