Malko 11

Yesu wingila um-Yelusalemu

(Mt 21:1-11; Lk 19:28-40; Yn 12:12-19)

1Na pano yapalamila i Yelusalemu apipi ni Betfage ni Betania, uku mwamba wa Mizeituni, watumile alondeshi yaakwe yaili. 2Ayanena, ati: “Yangini umunzi wuwo ula apipi, na pano mwaya, liyo kwene mwaunnola umwana mpunda unyepe, atatana wakowelwa nu ntu; msapulini nnete. 3Nu ntu ndi waati: ‘Nga fino muluchita fiyo?’ muti: ‘uMwene alunsita; nga liyo kwene wamneta pa kaili.’ ” 4Yampita, nga yalola umwana mpunda anyefilwe apa nnyango, apanzi un-nzila inkulu, yamsapula. 5Antu yano yimilile penepo, yamwi yayanena, yaati: “Muluchita chani ukusapula umwana mpunda?” 6Yayanena fino Yesu ayatumile, nga yayazumila. 7Nga yaletela Yesu umwana mpunda wiyo, nga yala imyenda yao apiyulu, nga awikala penepo. 8Antu ainji yala imyenda yao un-nzila na yamwi amafwa yano yatema um-vyalo. 9Na antu yano yakolezile na yano yalondela, yangula uku maswi makulu, yaati: “Osana, alimpepelelwa, wino alwiza ukwizina lya Mwene. 10Wapepelelwa uwene uno ulwiza uwi tata witu Daudi; Osana umwiyulu.”

11Nawe awingila um-Yelusalemu un-ng'anda-nkulu-iyi-Leesa; na pano walola vyonsi konsi konsi, kuno amangusi, afuma ayu ku Betania ponga na yalye ikumi na yaili.

Yesu waatipwila unsamvu; waswefya ng'anda-nkulu-iyi-Leesa

(Mt 21:18-19)

12Nu ntondo pano yafuma uku Betania, alola inzala. 13Nga alola ukutali unsamvu uli na mafwa, aya kuti palimwi azane amasamvu kweneko; na lino wafika, atatana zane chimwi, leelo amafwa sile, kuno asumacha. 14Waunena, waati: “Kufuma ilelo na manda ti umwi atalulya ivisêke vyako!” Alondeshi yapulika.

15Yafika uku Yelusalemu. Nawe awingila un-ng'anda-nkulu-iyi-Leesa, atampa kuwinga yalye yano yakazyanga nu kukala un-ng'anda-nkulu-iyi-Leesa. Apenula imeza zyao yakakaunkana mpia, ni visumbi vi yakakazya ya nkunda. 16Nga atachili aleke umwi asende ichivya un-ng'anda-nkulu-iyi-Leesa. 17Asambilizya, ati: “Chene! Chitaandikwe ing'anda yane ilwitwa ng'anda ya kusalikila uku yantu yoshi? Leelo mwemwi mwaichita ichele lya ivi.” 18Ayikolo iyakapela na yakaandika yapulika nga yamba ivyakuti yamumole, kuno yamofile, kuno iumba lyonsi lyazungwike uku masambilizya yaakwe. 19Na pano lyawa amangusi wafumile umunsi.

20Nu ntondo pano yalupita, yalola unsamvu wuwo uwunyala ukufuma umwisinda. 21Petlo welengula fino chali, wannena, waati: “Labi, lola unsamvu wuno waatifile, uwunyala.” 22Yesu wannena, waati: “Zumilini Leesa. 23Umwenemo ndumunena, wensi uwacha wanena umwamba wu, waati: “Wipuka, ukaponele muli yemba, atachi tentenganya um-mweso wakwe, leelo ataile fino yano atasile iyawa, yaluwa yaakwe. 24Ichino fiyo ndumunena, yoshi yano mululomba nu kusalika, tailini fino mwanjapata, nayo yamwa yino. 25Nalino mulwimilila nu kusalika, mwelele ndi muli niswi nu ntu, ukuti na Tata wino uwa mwiyulu amwelele nemwe amaifyo yino. [26Leelo ngi mwemwe mutalwelela, na Tata wino uwa mwiyulu atalumwelela mwemwe amaifyo yino.]

Kutondosya Yesu apa maka yaakwe

(Mt 21:23-27; Lk 20:1-8)

27Kaili yaya um-Yelusalemu; na pano wapitanaa un-ng'anda-nkulu-iyi-Leesa, yaile kunali ayikolo iyakapela na yakaandika na yikolo. 28Yannena, yaati: “Uku maka chi uluomba ifintu vi? Nawe uwini wakupile amaka ukuomba vi?” 29Yesu wayanena, waati: “Namutondosye iswi lyonga, nemwe munene, apano namunena uku maka chi nduomba vi. 30Ulubatizyo lwi Yoane lwafumile umwiyulu nanti uku yantu? Munene.” 31Nga yatondosyana yonga, yaati: “Ndi twati: ‘Lwafumile umwiyulu,’ wanti: ‘Nga fino mutachili mutaile?’ 32Napo kwene, ndi twati: ‘Lwafumile uku yantu’ ” Yofile antu, kuno antu yoshi yawine Yoane fino ikalauzya unkola. 33Yannena Yesu, yaati: “Tutamanyile.” Yesu wayanena, waati: “Nene kwene nsumunena mwemwe uku maka uli yano nduomba vi.”

Currently Selected:

Malko 11: FNT1988

Highlight

Copy