Malko 9

1Ayanena, ati: “uMwenemo, ndumunena: palantu pali yano yimilile pa, yatalulola infwa nanti uche, fika na lino yacha yalola uwene-wi-Leesa ulwiza uku maka.”

Yesu wawa um-mwata unnina

(Mt 17:1-13; Lk 9:28-36)

2Ni chisila cha manda sita, Yesu ayasenda Petlo na Yakobo na Yoane, yaya piyulu apa mwamba untali yao yonga. Wasenuluka ichata chakwe apa yakola. 3Imyenda yaakwe imesa-mesa iwa imitiswe nkani, fino kafula atangi aiswefye kuno kunzi. 4Nga Elia na Mose yalolike angi yaluvwanga na Yesu. 5Petlo wanena Yesu, waati: “Labi, chazipa sweswe tumwa pa na tuchite visansa vitatu chonga ichako na chonga ichi Mose na chonga ichi Elia.” 6Kuno atamanyile icha kuvwanga, ingofi zyayalemile nkani. 7Nga liza ipufi lyayachitila ichisau, iswi lyafuma umwipufi liyo, lyaati: “Wiyo uli Mwanane nkundikwa; mpulikini wi.” 8Liyo kwene yalola ku na ku, yatachili yalole untu ponga nayo, leelo Yesu wenga mpela.

9Na pano yalutentenka um-mwamba, wayalesizye yatalandila umwi fino yalile yalola, fika na lino Mwana-ntu wacha watutuluka uku yafwi. 10Nga yalemi iswi liyo, yatondosyana akola na akola, yaati: “Kuo ukututuluka uku yafwi, ali chani?” 11Yantondosya, yaati: “Nga fino yakaandika yakuluti: ‘Elia alutangula ukwiza?’ ” 12Wayanena, waati: “Umwenemo, Elia alutangula ukwiza nu kuchita vyonsi viwe ivipya; leelo ponga na fiyo waandikilwe uli uMwana-ntu, ukuti aluchula nkani nu kusulwa? 13Leelo ndumunena: Elia watawiza, nayo yamchita vyonsi fino yakasime, ndi fino waandikilwe.”

Yesu wapozya umwanche wa chiwa

(Mt 17:14-21; Lk 9:37-43a)

14Nga lino isa uku yalondeshi, yaloli umba ikulu kuno yali liyalizizye na yakaandika yalutondosyana nayo. 15Liyo kwene iumba lyonsi pano lyannola, lyazunguka, lyachonchomala kunali lyannaula. 16Wayatondosya, waati: “Mulutondosyana chani nayo?” 17Untu wenga umwiumba wannena, waati: “Kasambilizya, naleta umwanane kuli wewe; ali ni chiwa chinunu. 18Ngi pano chakatuka, chikulumponya pansi nu kutuka itomvu, nu kuchecheta mino nu kukala unkanka. Nanena alondeshi yako yaatisye chiwa, leelo yapotwa.” 19Wayanena, waati: “Mwe luko luntazumila, ngikale nemwe kufika li? Nammutekelela manda yanga? Nnetini kunondi.” 20Yanneta kunali; na pano wannola liyo kwene ichiwa chanchita ichifumfumi, nawe wapona pansi nu kusalakata, ni tomvu lyatuka. 21Watondosya isi, waati: “Channemile fuma li?” Waati: “Fuma uwanche. 22Na maila tupu chikulumponya um-moto nu um-manzi, kuti chimumole. Leelo nduli na maka ya kuchita chimwi, utukumbukile, utwazwe!” 23Yesu wannena, waati: “Ndi uwezizye! vyonsi vingaombeka kuli wino azumile!” 24Liyo kwene isi wa unnumendo awangula ukwiswi ikulu, ati: “Nzumile, ungazwilizye uku kuntazumila kwane!” 25Yesu nawe pano walola iumba lyakongana zuwa, wachenzela ichiwa chiipe, waati: “We, chiwa chinunu na chipuli, nene ndukunena, fuma muliwi, utachi uwele kaili.” 26Changula, chanchita ichifumfumi nkani, chamfuma; nawe wawa kanti watafwa, chaleka na inji yaati: “Watafwa.” 27Leelo Yesu wannema ikasa, wankatusha, nawe wimilila. 28Nga pano wingila un-ng'anda, alondeshi yaakwe yamtondosya ukumbali, yaati: “Nga fino swemwi twaposilwe ukuchitisya?” 29Wayanena, waati: “Alavi chitangi chitine ukwiswi limwi, leelo uku kupepa.”

Yesu walanda ilya uwili apa nfwa nu kututuluka kwakwe

(Mt 17:22-23; Lk 9:43b-45)

30Yaatina kweneko, yapita pakasi pa Galilea. Nawe atakasime ntu amanye. 31Kuno wayasambilizyanga alondeshi yaakwe, ayanena, ati: “Mwana-ntu wayufimwa um-makasa ya antu, nayo yalumumola, na ndi yamumola, ichisila cha manda ya tatu alututuluka,” 32Leelo yatalimanyile iswi liyo, yopa ukumtondosya.

Ukiwolo uwini um-wene-wa-mwiyulu

(Mt 18:1-5; Lk 9:46-48)

33Yafika ku Kapenaumu, nga pano ali un-ng'anda, ayatondosya, ati: “Mwapazyanyanga chani un-nzila?” 34Yatuzya, kuno un-nzila yapazyanyanga akola na akola, yaati: “Uwikolo uwini?” 35Awikala pansi, awita yaya ikumi na yaili, ayanena, ati: “Untu wino alusita awu wa ntangulo, aluwa uwachisila pali yoshi na kaombela wi yoshi.” 36Watola umwanche. wamwika pakasi yao, amfukatila, ayanena, ati: 37“Untu wino wapokelela umwanche wenga uwa fi ukwizina lyane, ampokelile nene; nu ntu ndi wampokelela nene, atampokelela asi nene, leelo wino wantumile.”

Anji paliponga neswe

(Lk 9:49-50)

38Yoane wannena, waati: “Kasambilizya, twawine untu aluwinga iviwa ukwizina lyako, wino atali ponga neswe; twezya kunnesya, kuno asi ponga neswe.” 39Leelo Yesu waati: “Mutachinnesya; kuno kusi untu aluchita ichipezya-mano ukwizina lyane, na kuno angalu mvwangila iviipe. 40Kuno wino atatuselewike, ali ponga neswe. 41Kuno wensi uwacha wamunwesya ulwako lwa manzi, kuno mwemwe yantu yi Klisto, umwenemo ndumunena, ataluula ichilambu chakwe.

Vya kukumika

(Mt 18:6-9; Lk 17:1-2)

42Na wensi uwacha waleka umwana unnono wonona palia yano anzumile, chinjile anyepelelwa ifinga lya kusyila un-ngalo yaakwe, nu kusumbilwa muli yemba. 43Nikasa lyako ndi liluleka ulonona, liputule; chingakuya ndi wingila um-upuma, we chinkuntu, apakuti uwe na makasa yaili nu kuyu un-chilinkwe cha moto untazima. [44Muno ingonyo zyao zisufwa nu moto untazima.] 45Nikulu lyako ndi lyaleka wonona, liputule; chingakuya ukwingila um-upuma ni kulu lyonga, apakuti uwe na mulu yaili nu kusumbilwa un-chilinkwe. [46Muno ingonyo zyao zisufwa nu moto usuzima.] 47Ni linso lyako ndi lyaleka ulonona, lifyonkole, ulisumbe; chingakuya ukwingila um-wene-wi-Leesa ni linso lyonga lyafwa, apakuti uwe na maaso yaili nu kusumbilwa un-chilinkwe. 48Muno ingonyo zyao zisufwa nu moto usuzima.

49Kuno chilantu alulungwa wa nsilya uku moto. 50Unsilya wazipa, leelo unsilya ndi utakalipe, mungatela chani chinono? Muwe nu nsilya unkasi yino; mukikale ningo, muwelezyanye na anyonko.”

Currently Selected:

Malko 9: FNT1988

Highlight

Copy