Luka 7

Usha wa Unkulu-wayasalifi

(Mt 8:5-13)

1Walangi pano wamala ukufwanga amaswi yaakwe yoshi apa yantu, waingila um-nsi wa Kapenaumu. 2Kwali unkulu wa yasalifi wali nunsha umwi, wali undwale pipi nu kufwa, nawe walile wamkunda nkani. 3Walangi pano wapulika amaswi ya pali Yesu, watumile ayikolo ya aYudea kunali nu kunndomba awise aposhe umbofi wakwe. 4Nayo lino yafika kuli Yesu, yapapata nkani, yaati: “Wene wasipile umbombele ichintu chi. 5Kuno wakunda antu yitu; nawe watukulile ing'anda yi Leesa.” 6Nga Yesu wapita ponga nayo. Nga pano wafika apipi ni ng'anda yaakwe, unkulu wa yasalifi wiyo, watuma kataakwe kunali, wannena, waati: “Mwene, utachichula, kuno intaine wewe ukwingila un-ng'anda yane. 7Ichino nawine nenkola ntaine ukwisa kunuli, leelo ufwange iswi lyonga sile, nu momfi wane wampola. 8Kuno nene kwene nene ntu wa kutumwa, indi na asalifi anono kuli nene, ngi nanena wi, nati: ‘Pita!’ wapita; nawi: ‘Nguna!’ awisa; nunsha wane: ‘Chita fi!’ achita.” 9Yesu pano wapulika ifintu fi, asunguka; wasenuka ukwiumba lino lyanndondile, afwanga, wati: “Ndumunena, nanti umwi Islaeli ntatana ndole kusumila kukulu ndi ku.” 10Na yaya yano yatumilwe, pano yawela uku ng'anda, yazana umbofi umpuma.

Unndumendo wa ku Naini watutuluka

11Ichisila amanda mache yapita ukuya uku nsi umwi ishina lyaakwe Naini. Alondeshi yaakwe yalonndekine nawe ponga niumba ikulu. 12Nga pano wapalamila ukwingila apa nndyango wa nsi, penepo pali ichala chiseshilwe apafika, nawe wali wenga umwana wi mama unsimbe, na antu tupu aya um-nsi yali ponga nawe. 13Mwene pano wannola, wanndolela inkumbo, wannena, waati: “Utachilila.” 14Wapalamila, wemya ichela—yano yaseshile yimilila—wafwanga ukuti: “Unndumendo, ndukunena, katuka!” 15Wino wafwile wakatuka, wikala, watampa ukufwanga. Nga ampa nyina. 16Ingofi shayalema yoshi, yatensha Leesa nukuti: “Ilau ikulu ililoleka kuno tuli na Leesa watalaula antu yaakwe.” 17Amaswi yaakwe ya yalumbuka umu Yudea yoshi, nun-nsi shosi isha mbali mbali.

Yesu na Yoane Kabatisha

(Mt 11:2-19)

18Alondeshi yi Yoane yanndandile amaswi ya ifintu fyoshi fiyo. 19Apano Yoane witile alondeshi yaakwe yaili, wayatuma kuli Yesu, atondosha, wati: “Wewe ali wino alwisa, nanti tulolele unji?” 20Nayo pano yaya kunali, yaati: “Yoane Kabatisha atutumile kuli wewe, ukuti: ‘Ali wewe wino alwisa, nanti tulolele unji?’ ” 21Na liyo kwene waposha ainji yali ni ndwala, na yano yalulukuwaika, ni fiwa fiipe, napofu ainji wayapile ukulola. 22Apano wayanenile, ukuti: “Yangini mukalandile Yoane ifintu fino mwalola nu kufipulika: apofu yalulola, aitenda yalupita, aya ntana yaluswepa, yachipuli yalupulika, afwi yalututululwa, apina yalusundwa iswi-sipe. 23Inkatakwe untu weshi wino ataluchituwa nene.”

24Nga yano atumilwe na Yoane, pano yaatina, atampa ukunena amaumba amaswi yi Yoane. “Mwafumile ukuyulola chani ukunyika? Itete lino unsa ulutelenganya? 25Leelo mwafumile ukuyulola chani? Untu waswite imyenda imitele? Mumanye antu ya myenda ya ukulu, alulya ningo, yali un-ng'anda ya mwene. 26Leelo mwafumile ukuyulola chani? Ilau? Endita! namunena, wene wino alesile ilau. 27Wiyo uwino waandikilwe fi: ‘Lolini natuma intumi yane apa maaso yako; wino alukuteyanyisha insila yako.’

28“Nene namunena, pali yano yafilwe nanachi, kushi wino alushile Yoane, leelo wino unnono um-wene wi Leesa, anndusile.” 29Nga antu yoshi na yakalifya yikodi, pano yapulika ifintu fi, yasumile ichumi chi Leesa, kuno yabatishiwa ulubatisho lwi Yoane. 30Leelo aFaliseo na amanya-ntambi yakanile ukuchita fino Leesa wakasime kuti yachite, kuno yatabatishilwe nawe.

31“Njakolanye na chani antu ya mpanda u? Yakoline na chani? 32Yakoline nanche yano yatenzi apa sokoni nu kwitana angi yaluti: ‘Tumumile impilimbi, leelo mutachili muchine; twalosyaa, leelo mutachili mulile.’

33“Kuno Yoane Kabatizya wizile, atalyanga unkate nanti ukunwa amasi ya mizabibu, nemwe muti: ‘Ali ni chiwa!’ 34uMwana-ntu wiza alulya nu kunwa, nemwe muluti: ‘Lolini, alawi walaka, nakuno ikanwa wa manzi ya mizabibu, ikatakwe na yakalifya yikodi na yamaifyo.’ 35Na mano yamanyika fino aya chumi uku yana yaakwe yoshi.”

Yesu wapakwa mafuta na mama umwi

36Untu wenga apa aFaliseo wamwisile akalye ichakulya ukwakwe; nga awingila un-ng'anda ya nFaliseo wiyo, wikala ukulya ichakulya. 37Nga lolini, umwanachi umwi uwa umunsi uo kwene, nawe untu wa maifyo, pano wapulika fino alimo un-ng'anda ya nFaliseo wiyo uku chakulya, waleta unsazi ka mafuta ya manunkilo. 38Awimilila uku chisila pipi na mulu yaakwe, angalulila, wata mpa ukutonesha amulu yaakwe amososhi nu kumpulukusa ni nyele sha ku ntwe waakwe nu kutunga amulu yaakwe nu kumpaka amafuta yao. 39Nga nFaliseo wiyo pano walola fiyo, um-mweso waakwe wati: “Untu wi, ngangi ilau, ngangi wamanya umwanachi wi wino wamwemye, ngu wini nawe ali uli, fino uwa maifyo.” 40Yesu wannena, waati: “Simoni, ndi niswi lino ndushita ukukunena.” Nawe afwanga ukuti: “Kasambilisha, nnena.”

41Nga waati: “Untu wenga ikakopisha, wali na yakakopa yaili; wenga wakopa impia imyanda isano, nu wa uwili amakumi yasano. 42Nga pano yaula ichakunndipa, wayelela yoshi yaili. Pali yao yaili uwini wino angamkunda nkani?” 43Simoni wafwanga ukuti: “Ndwelengula uwiwi wino welelwa ifyafula.” Nawe wannena, waati: “Walanda ningo.” 44Nga waseleuka uku mwanachi, wanena: “Simoni wati walola umwanachi wi? Nalingingile un-ng'anda umwako; utachili umpe amasi ya kufulala amulu yane, leelo wi wantonesha amulu yane amonsoshi nu kuyapulukusa uku nyele sha ntwe wakwe. 45Wemwi mchili untunge, leelo li fuma pano ngingile antoswelile nkani amulu yane. 46Uchili umpaka amafuta ukuntwe wane, leelo wi watampaka amulu yane amafuta. 47Uku finto fiyo ndukunena, atelelwa amaifyo yaakwe yano yafulisha, kuno wakunda nkani; leelo wino alwelelwa tuche, uwino wakunda tuche.” 48Apano wanenile umwamachi, waati: “Welelwe amaifyo yako.” 49Apano yaya yano yatesi ponga nawe apa chakulya, yatampa ukufwangila um-myeso yao, ukuti: “Uwini wi, wino angelela amaifyo?” 50Wanena umwanachi wiyo, waati: “Ukusumila kwako kwakufyusha; pita lumi.”

Currently Selected:

Luka 7: FNT1988

Highlight

Copy