Luka 8

Anachi yano yaombelanga Yesu

1Ichishila cha ifintu fi, wapitanga um-mizi nuntusi, angalusunda nu kuma imbila yi Iswi-sipe lya wene-wi-Leesa; na yaya ikumi na yaili yali ponga nawe. 2Na ananchi yamwi yano yali ni viwa ifiipe ni ndwala, yaposhiwa; nayo i Malia wino yatangi Mandalena wino wali ni fiwa saba. 3Na Yoana nka Kuza, wino wali kalolela wa fyuma fyi Yelodi, na Suzana nanina inji, yano yamwaswilishanga uku fyuma fyao.

Unndumbe wi kapela-mbesu

(Mt 13:1-9; Mk 4:1-9)

4Pano iumba ikulu lyakongana na yano yafumile chila nsi kwisa kunali, wafwangile uku nndumbe, ati: 5“Kapela wafumile ukuyupela imbesu shakwe; nga pano wapelanga, shimwi shaponile apipi ninsila, shilyatolwa; ifyuni ifikulelemba fisa fyakompa. 6Ni zinina shapona apipampa; pano shatampa ukumela shakala kuno shaula umfundo. 7Ni shinji shapona apa myonga; imyonga yamela ponga nasho, yashifyenka. 8Ni shinji shapona apa nsili mvundo, shamela, shasêka chila yonga umwanda.” Pano alufwanga ifintu fi, wakusha iswi, waati: “Uwa makutwi ya kupulikila, apulike.”

9Alondeshi yaakwe yantondosha, yaati: “Unndumbe u ichili chani?” 10Walanda, waati: “Mwemwi mwapiwa ukumanya melengwe ya wene-wi-Leesa, leelo anji uku milumbe, ukuti nanti yalola, yatamanya, nanti yapulika, yatamanya. 11Unndumbe uo alikuti: Imbesu, iswi li Leesa. 12Yaya yano yali apipi ni isila, ali yano yalupulika, nga awisa Chiwa atisha iswi liyo um-myenso yao, yaatisa yasumile nu kufyuka. 13Na ya pipampa ali yano pano yapulika, yakulupokela iswi liyo uku kuchimba; nayo yatakwite imisisi, yalusumila manda mache, na pano yasanwa na masosho yaupalula. 14Na shino shapona apa myonga, ayano yalupulika; num-wikalo wao yalufyenkwa ni milimo nu usafi ni fya kuno ukunshi, yatakusêka chimwi. 15Na sha apa nsili uno wafunda, ali yaya yano ukuli yapulika iswi ni myenzo ya ningo, yalilema, nga yasêka ifisêke ukukuteka imyenso.

Mwengelela wi koloboi

(Mk 4:21-25)

16“Kusi untu ndi wino wakosha koloboi, ankupike un-chifya, nanti ukuwika umwisungu, leelo akulwika lwa piyulu, ukuti yano yalwingila-mo, ayalola umwengelela wakwe. 17Kuno kusi iswi lino lyafisama lino litalusweluka, nanti lino yafisa lino litalumanyika nu kuloleka apatiswe. 18Ichino mulole fino mulupulika. Kuno wensi wino ali na chimwi alupiwa, na wiwi wino atakwite chimwi, kuli wene chilupokwa na chino alwelengula ali nacho.”

Yesu na a luko lwakwe

(Mt 12:46-50; Mk 3:31-35)

19Nga nyina nanina yisa kunali, leelo yatampalamile uku winji wa antu. 20Yanndetela iswi, fino: “Nyoko na anyonko yimilile apashi, yalushita ukulolana newe.” 21Leelo wayanena, waati: “Mama na chane aya, yano yalupulika iswi li Leesa nu kulilema.”

Yesu wamyalasha chipupu

(Mt 8:23-27; Mk 4:35-41)

22Nga chali um-manda yalye wanda umwi, wakwesile um-wato ponga na alondeshi yaakwe, wayanena, waati: “Tulambe uku mbalama yi yemba.” Nga yakatusha itanga. 23Nga pano yapitanga walola utulo. Ichipupu chisa muli yemba, nu wato watampa ukushula amasi, yawa undufu. 24Nga yaya kunali, yanndansha, yaati: “Mwene nkulu, Mwene nkulu, twafwa!” Walanka, wachensela unsa nu mumo wa mansi. Fyanta. kwawa chele. 25Wayanena, waati: “Kusumila kwino kuli kwi?” Nayo yopa nu kusunguka, yafwashanya yonga, yaati: “Uwini wi leelo wino alunena unsa na masi, nafyo fimpulika?”

Yesu waposha untu wa fiwa

(Mt 8:28-34; Mk 5:1-20)

26Nga pano yalamba, yaya ukunsi ya yaGelasi, yino iloline ni Galilea. 27Pano wika umbalama, wakomengana nu ntu wenga uwa umunsi ulye, ali ni chiwa, uku manda tupu ataswalaa umwenda nanti ukuwa un-ng'anda, wikalanga uku malindi. 28Pano walola Yesu, wauma ichongo, wapona panali, afwanga ukwiswi ikulu, wati: “Ndina chani Yesu, Mwana wi Leesa uwa mwiyulu? Napapata utachinchusha.” 29Kuno wanena ichiwa chiyo ukufuma umuntu wiyo. Kuno amaila tupu chikulunndema, watana wanyepwa uku nyololo nu kunyepwa ni minyololo ni mpingu; aputula ifinyepelo fiyo, awituka uku maka ya chiwa ukuya uku luselesenga. 30Nga Yesu wamtondosha, waati: “Ishina lyako we weni?” Nawe waati: “Ishina lyane ne Legio.” Kuno ifiwa tupu fyamwingila. 31Fyampapata kuti atafinena fiye ukusimu. 32Nga pao kwene kwali ufyo wi kapoli, walyanga um-mwamba, fyampapata, kuti afisumile ukuya muli yao. Wafisumila. 33Ifiwa fyafuma ununtu wiyo, fingila yakapoli, nu ufyo watentenkila suwa uku lwilo, wingila muli yemba, wanwela.

34Achemi pano yalola chino chatunka, yituka, yaya yalimfya amaswi umunsi nu m-fyalo. 35Nga antu yafuma ukuyulola ichatunka, yaya kuli Yesu, yalola untu wiwi wino waatishiwa ifiwa, atesi apa mulu yi Yesu, aswite imyenda akwite amano, ingofi shayalema. 36Na yano yalile iyalola, yayalandila fino wiyo waposiwa wino wali ni ifiwa. 37Na antu ainji aya nsi ya yaGelasi iya mbali mbali, yannenile atine uku mwao, kuno yalemike ni ngofi nkani. Nga wakwela um-wato, wawela. 38Nu ntu wiyo wino waatisishiwa ifiwa, wanndomfile kuti alondekana nawe. Leelo wene wanndambalika, waati: 39“Suwila uku nganda ukwako, ukusunda ifintu fino Leesa wakuchitila.” Nawe waya, wasunda umunsi wonsi ifintu ifikulu fino Yesu wamchitila.

Mwana-kachi wi Yailo na mama wino wafwanga uwashi

(Mt 9:18-26; Mk 5:21-43)

40Nga pano Yesu wawela iumba limpokelela uku kuchimba, kuno yoshi yanndolelanga. 41Nga lolini, untu wenga awisa, ishina lyaakwe i Yailo; nawe wali untu nkulu un-ng'anda yi Leesa. Wapona apa mulu yi Yesu, wapapata kuti awingile un-ng'anda umwakwe. 42Kuno umwanakwe kachi ali apa lufu, nawe ali wenga, imyaka yaakwe yali ikumi na ili. Nga pano wapitanga, amaumba yamfyenka.

43Nu mwanachi wenga wino waswanga uwasi uku myaka ikumi na ili—wasumfile ifyuma fyaakwe fyoshi ukupa yasinganga—lelo kusi umwi wino wamwaswishe. 44Waile uku ntindi yaakwe, awemya isempele lya mwenda wakwe; liyo kwene ukuswa kwakwe uwashi kwashila. 45Yesu wafwanga ukuti: “Uwini wino wangemya?” Nga pano antu yoshi yakana, Petlo wannena, waati: “Mwene nkulu, amaumba yakulisishe nu kukufyenka.” 46Leelo Yesu wafwanga ukuti: “Umwi wangemya, kuno nalola amaka yanfuma.” 47Umwanachi wiyo pano walola fino atangafisame, wisa nakuno alutetema, wapona apa mulu yaakwe, wanndandila apa yantu yoshi, chino chaleka wamwemya, na fino wapola suwa. 48Nga wannena, waati: “Mwanane, kusumila kwako kwakuposha, pita lumi.”

49Pano achili alufwanga fiyo, awisa untu ukufuma kwa wikolo wa ng'anda yi Leesa, waati: “Umwanako kachi watafwa; mululu kuchusha Kasambilisha.” 50Leelo Yesu pano wapulika fiyo, wannenile, waati: “Utachopa, leelo sumila shile, nawe akupola.” 51Pano wafika uku ng'anda, atachili aleke umwi awingile ponga nawe, shiko Petlo na Yoane na Yakobo ni isi wa mwana wiyo na nyina. 52Na antu yoshi yalilanga na kulosha. Leelo wafwanga ukuti: “Mutachilila; alawi atafwile, watalala utulo sile.” 53Yanseka nkani, kuno yamanyile fino watafwa. 54Wanndema ikasa, afwanga ukwiswi kulu, wati: “Mwana, katuka!” 55Umweso waakwe wapiluka, nawe wamwimilila liyo kwene. Wayanena kuti apiwe chakulya, alye, 56Avyazi yaakwe yasunguka nkani, leelo wayalesha yatachinena umwi chino chaombeka.

Currently Selected:

Luka 8: FNT1988

Highlight

Copy