Luka 6

Yesu, Mwene wa Sabato

(Mt 12:1-8; Mk 2:23-28)

1Walangi apa wanda umwi uwa Sabato, wapitanga um-fyalo fya ngano. Nga alondeshi yapukusa imitwe ya ngano, yalya. 2Leelo aFaliseo yamwi yayanena, yaati: “Nga fino muluchita chino chitaile uwanda wa Sabato?” 3Yesu wayanena, waati: “Mutachili musome chino Daudi wachisile pano wali ni isala, unkola na yano yali ponga nawe? 4Fino wingile un-ng'anda yi Leesa, watola imikate ya Ulangisho, walya, wapa nachakwe, fino chitaile, shiko kuli yakapela sile.” 5Wayanena, waati: “Mwana-ntu uli Mwene wa Sabato.”

Untu wikasa lino lyalemala

(Mt 12:9-14; Mk 3:1-6)

6Walangi apa wanda unnina uwi Leesa, awingila un-ng'anda yi Leesa, asambilisha. Nga mwenemo mwali wino ikasa lyaakwe lilunji lyalemala. 7Yakaandika na aFaliseo yatangi uleke tulole ndi wamposha uwanda wa Sabato, ukuti yalole iswi lya kumbwikila unndandu. 8Leelo wene amanya amelenguzi yao, wanena wino walemala ikasa, waati: “Katuka, wimilila apakashi.” Wakatuka, wimilila. 9Apano Yesu wayanena, waati: “Ndumutondosha nemwe Chene! chili ningo ukuchita ifisipe uwanda wa Sabato, nanti ukuchita ifiipe; ukufyusha umweso nanti ukumola?” 10Wayakundwila amaso yoshi konshi, wanena untu wiyo, waati: “Olola ikasa lyako.” Nga wolola ikasa; ikasa lyaakwe lyawa ilipuma kaili. 11Leelo wene yalakalika, yamba ifyakuti yachite Yesu.

Alondeshi ikumi na yaili

(Mt 10:1-4; Mk 3:13-19)

12Nga chali um-manda yalye, waya ku mwamba ukuyupepa, angi alupepa Leesa usiku wonshi. 13Nga pano kwacha, wayita alondeshi yaakwe, wasolola ikumi na yaili pali yeneyo, ayano waatile: “Imitume.” 14Simoni, wino wamtemele ishina lya uwili, wati: Petlo, na Andelea unnina, na Yakobo na Yoane na Filipo na Batolomeo. 15Na Mateo na Toma na Yakobo umwana wi Alfeo, na Simoni wino yatangi Zelote. 16Na yuda, mwana wi Yakobo, na Yuda Iskaliote wino wamfimile. 17Atentenka ponga nayo, awimilila pano pikala, ponga na alondeshi yaakwe tupu, na maumba tupu aya antu, yano yafumile umu Yudea yoshi ni Yelusalemu nu mbali yi yemba wi Tilo ni Sidoni, yano yishile, kuti yampulikisye nu kuposhiwa indwala shao. 18Na yano yachushiwa ni fiwa fiipe, yaposhiwa. 19Na maumba yoshi yashitanga ukumwemya, kuno amaka yafumanga ukuti aposhe yoshi.

Upepelelo na kalanda

(Mt 5:1-12)

20Ainuluka walolekesha alondeshi yaakwe, wati:

“Inkata yino mwemwe mwe yapina,

kuno uwene-wi-Leesa uwino.

21Inkata yino mwemwi yano muli ninzala kalasaka,

kuno mulwikuta.

Inkata yino mwemwi yano mululila kasalaka,

kuno muluseka.

22Inkata yino mwemwi lino antu yacha yamutuwa nu kumupalula,

nu kumutuka nu kusula amashina yino wiswi iipe, ukwishina lya Mwana-ntu.

23“Chimbini apa wanda uo nu kutumpoka, kuno lolini ichilambu chino ichikulu umwiyulu; kuno fiyo kwene ifino yaisi yachitilanga amalau.

24Leelo, akalanda kino mwe yasafi,

mwemwi kuno mwanunatishwa.

25Akalanda kino yano mwikwite apa kasalaka,

kuno mululola insala.

Akalanda kino yano muluseka apa kasalaka,

kuno mululola amalanda nu kulila.

26Akalanda kino mwemwe antu yoshi pano yacha yamutesha,

kuni ifino isi yao

yachitilanga amalau ya ufi ifintu ndi fiyo.

Kukunda yasiluwembu

(Mt 5:38-48; 7:12a)

27“Lelo namunena mwe yano mulupulika, mukunde yasiluwembu yino, muyachitile ifisipe yano yamutuwa. 28Pepelelini yano yalumutipa, pepelini yano yalumuonela. 29Wino waakuma ukwitama lyonga, unsenwile nilya uwili, na wino wakupoka ikoti lyako, utachinndesha ni nkanjo kwene. 30Pa weshi wino wakulomba; na wino wakupoka ifintu fyako, utachishita akuweseshe. 31Na fino mulushita antu yammuchitile, yachitilini fiyo kwene.

32“Kuno ngi mwakunda yano yamukunda, angi mwayalanga chani? Kuno na yamaifyo kwene yakukunda yano yayakunda. 33Nemwe ngi mwanjachitila ifisipe yano yakumuchitila ifisipe, angi mwayalanga chani? Na yamaifyo yaluchita fiyo kwene. 34Na ngi mwakopisha antu, na kuno mulwelengula ukupiwa chimwi kuno yali, angi mwayalanga chani? Na yamaifyo kwene yakulukopisha a yamaifyo, kuti kuche yayaweseshe. 35Leelo mukunde yasiluembu yino, chitini ifisipe, nu kukopisha mutachelengula ukulipwa, ni chilambu chino chiluwa ichikulu, nemwe muluwa ana yi Wa-Mwiyulu; kuno wene unsipe kuli yano yatalumsamalisha nuku yaipe.

36“Ichino muwe ni kumbukila, ndi fino Tata wino ali ni kumbukila. 37Mutaputula imilandu, nemwe mutaluputwilwa; mutachisumbikila, nemwe mutalusumbikilwa; lekini, nemwe mululekwa. 38Pini antu ifintu, nemwe mulupiwa: ichilingilo cha kushula nu kusindelwa, nu kutesha kufika nu kwitika, ifino antu yalumpa apa fifuwa fino. Kuno ichilingilo chichi kwene chino mululingila, ichino mululingilwa.”

Ibao na kakona mwilinso

39Wayanena unnumbe, waati: “Chene! umpofu angakolelela umpofu? Yataluponela yoshi yaili un-chilina? 40Unndodeshi atangi akule ukuluta Kasambilisha wakwe, leelo chila ntu wino wamanya, akululingana na Kasambilisha wakwe. 41Nga uku chani kuno ululolekesha akakona kano kali umwilinso lya nnyonko, ni ibao lino lili umwilinso lyako utalulilola? 42Nanti ungannena uli unnyonko, uti: ‘Wachane, leka ntishe kakona kano kali umwilinso lyako!’ Newe utalulola ibao lino lili umwilinso lyako wenkola? We wa ufi, tangula tisye ibao lino lili umwilinso lyako wenkola apano ululola ningo ukutisha akakona kano kali umwiliso lya nnyonko.

Ichiti ni visêke vyaakwe

(Mt 7:16-20; 12:33-35)

43“Kuno kushi ichiti ichisipe chino chikusêka ifisêke ifiipe, nanti ichiti ichiipe ukusêka ifisipe. 44Kuno chila chit chikulumanyika uku visêke fyaakwe; kuno yatakusikula amasamu uku myonga, nanti ukusikula imizabibu uku mikololwa. 45Untu unsipe akulufumya ifisipe uku mweso waakwe fino wawika, nu ntu njipe uku mweso waakwe akulufumya ifiipe fino wawika. Kuno untu uku nndomo waakwe akufwanga fino fyashula umweso wakwe.

Yakakula yaili

(Mt 7:24-27)

46“Na kuno ichani mulungita: ‘Mwene, Mwene!’ leelo mutaluomba fino ndumunena? 47Wensi uwisa kunondi, nu kupulika amaswi yane nu kuyalema, namulanga unndumbe wakwe. 48Akoline nu ntu wino aluukula ing'anda nu kwimba ulufula ulushika nkani, pa matandala; na pano isemba yisa nndamba awikila ing'anda iyo uku maka, itachili itelengane, kuno yakulwa ningo. 49Leelo wino wapulika nanti kuomba, akoline nu ntu wino wakula ing'anda apa nsili pano pashi ulufula; nndamba wiikila uku maka, liyo kwene yapona; nu kupona kwa ng'anda iyo ukukulu.”

Currently Selected:

Luka 6: FNT1988

Highlight

Copy