Luka 5

Alondeshi ya ntangulo. Yakela aya antu

(Mt 4:18-22; Mk 1:16-20)

1Walangi pano iumba lyamfyenka pano lyapulikishanga iswi lyi Leesa, wene wimilile umbali yi yemba wi Genesaleti. 2Alola amawato yaili umbali yi yemba; leelo yakela iyafuma yalufula amasumbu yao. 3Wingila um-wato umwi, nao uwi Simoni, annena kuti autwale apatali uche nuku misenga. Nga awikala um-wato angi aluyasambilisha amaumba. 4Nga pano wamala ukuvwanga, annena Simoni, ati: “Twala ukwiyeshi, mkishe amasumbu yino, mwele inswi.” 5Simoni wannena, waati: “Mwene nkulu, twaomba usiku kwacha, leelo tutalemile chimwi, leelo ukwiswi lyako namwisha isumbu.” 6Nga pano yachita fiyo, yapasile inswi tupu nkani, na masumbo yao yatampa nu kuputoka. 7Yakapilisha anina yano yali um-wato wa uwili, yise ukuyaswa. Nayo yisa, yasusha mato yoshi yaili, yashita nu kutuwila. 8Simoni Petlo pano walola ifintu fiyo, wapona pa mulu yi Yesu, wati: “Tina kunondi, kuno nene nentu wa maifyo, Mwene.” 9Kuno wazungwike ponga na yoshi yano yali ponga nawe, ku wingi wa inswi shino yalemile. 10Fiyo kwene Yakobo na Yoane, ana yi Zebedeo yano yaombaa ponga na Simoni. Nga Yesu wanena Simoni, waati: “Utachopa; ukufuma li kwene li wambwa kela wa yantu.” 11Nga pano yaleta mato uku luselesenga, yasha fyoshi, yanndondela.

Yesu waposha untu wa ntana

(Mt 8:1-4; Mk 1:40-45)

12Walangi lino ali umunsi umwi, pali untu umwi, wino intana yalimba umwili woshi; nga pano walola Yesu, wapona afukime, wapapata, wati: “Mwene ndi ukasi, unganswefya.” 13Nawe akatusha ikasa lyaakwe, amwemya, wati: “Nkasime, swepa.” Liyo kwene intana yaakwe yanshila. 14Nga wanndesha, kuti atanena untu umwi. “Lelo yanga ukailange kuli kapela, ukafime uku kuswepa kwako, ndi fino Mose wafwanzile ifya pa kuswepa kwako, chiwe ushuta kuno yali.” 15Leelo amaswi yaakwe yalumbukisha, yakongana amaumba tupu, kuti yampulikishe nu kuposhiwa indwala shao. 16Leelo wene waile kuno kusi antu, ukuyupepa.

Yesu waposha witenda

(Mt 9:1-8; Mk 2:1-12)

17Walangi apa wanda umwi um-manda yalye, wasambilishanga. Nga aFaliseo na amanya-ya-ntambi yatensi penepo, yano yafumile chila unzi wonsi uwa mu Galilea num-Yudea num-Yelusalemu. Na maka ya Mwene yalipo, kuti apozye. 18Nga lolini, yisa antu yaseshile untu witenda apa chitala yashita ukuntwala unkashi nu kumbwika panali. 19Nga pano yaula uwasa wa kuntwala unkashi uku winji wa yantu, yaakweshile apidali, yampisha um-matofwali yapiyulu, nga yamwisha ni chitala chakwe pali Yesu. 20Nawe pano walola kusumila kwao, wannena, waati: “We katane, welelwa amaifyo yako.” 21Nga yakaandika na aFaliseo yatampa ukutondoshana, yaati: “Uwini wino alufwanga amaswi ya misuli? Uwini wino angelela amaifyo asi Leesa wenga?” 22Yesu wamanyile amelengushi yao, wayanena, waati: “Mulwelengula chani um-myenso yino? 23Ichangupala chilikwi? Ukuti: ‘Welelwa amaifyo yako,’ nanti: ‘Katuka, upite?’ 24Leelo mmanye fino uMwana-ntu ali na maka kuno ukushi aya kwelela amaifyo—wanenile uwitenda—ndukunena fi: katuka, utwike ichitala chako upite uku ng'anda ukwako.” 25Liyo kwene wankatuka pano yali, wambutwika chino walalile, wampita uku ng'anda ukwakwe, na kuno alutesha Leesa. 26Yoshi yasunguka ni ngofi shayalema, yatensha Leesa, angi yaluti: “Ilelo, twalola ifipesha-mano.”

Levi witwa

(Mt 9:9-13; Mk 2:13-17)

27Ichisila cha ifintu fi, wafuma walola kalifya wikodi, ishina lyaakwe i Levi, angi atesi apa folozani; wannena, waati: “Ndondela.” 28Nawe washa fyoshi, wakatuka ukunndondela.

29Nga Levi wamwimula uku ng'anda ukwakwe, pali iumba ikulu ili yakalisha yikodi na antu yanji kwene, yano yatesi apa chakulya ponga nayo. 30Nga aFaliseo na yakaandika yao yang'wing'witikila alondeshi yaakwe, yaati: “Nga fino mululya nu kunwa ponga na yakalifya yikodi na yamaifyo?” 31Yesu wayanena, waati: “Apuma yatangi yashite shing'anga, nkambi alwale. 32Ntisilu wita ayachumi, leelo ayamaifyo, kuti yafipele.”

Kuizilisha fyakulya

(Mt 9:14-17; Mk 2:18-22)

33Nayo yannena, yaati: “Alondeshi yi Yoane yakuluushilisa ifyakulya amaila tupu nu kupepa, ifino nalondeshi ya aFaliseo kwene, leelo alondeshi yako yalulya nu kunwa.” 34Leelo Yesu wayanena, waati: “Chene! munganena yano yali ponga na shiwinga yausilishe, ngi siwinga ali ponga nayo? 35Leelo amanda yalwisa yano siwinga ataluwa ponga nayo; apano yaluiushilisha amanda yao.”

36Wayanena unndumbe, waati: “Kushi wino akululepula ichilaka cha mwenda umpya nu kuchitela uku mwenda wa kali. Ngi watela, angalepula umpya, ni chilaka chio icha mwenda umpya chitalingine nu mwenda wa kali. 37Na kushi untu wino akutela amasi mapya aya mizabibu un-nyingu sha kali; ngi watela, amasi mapya yao yanndepulainyingu yiyo, amasi ya mizabibu yitike, ni nyingu shononeke. 38Leelo amasi mapya aya mizabibu ayakutelwa un-nyingu impya. 39Na kaili kushi wino akunwa amasi ya kali aya mizabibu, ashe awelengule amapya, kuno aluti: ‘Aya kali ayano yazipa.’ ”

Currently Selected:

Luka 5: FNT1988

Highlight

Copy