Luka 4

Yesu alweshiwa

(Mt 4:1-11; Mk 1:12-13)

1Nga Yesu lino washula uMweso Nswefu, wawela uku Yodani, wakolelelwa nu Mweso ukunyika. 2Angi alweshiwa na Chiwa amanda makumi yani. Na manda yao atalyanga chimwi, na pano amanda yashila alola insala. 3Chiwa wannena, waati: “Ndiwe Mwana wi Leesa, nena ifinga li liwe inshima.” 4Yesu wannena, waati: “Chaandikwe fino untu atalwikala ukukulya ichakulya sile.”

5Amkwesha apiyulu, wanndanga uwene ni ifintu fyoshi ifya kuno ukushi uku kashimbo kache. 6Nga Chiwa wannena, waati: “Ukulu u na maka ya nankupa wewe, kuno fili um-makasa yane, nene nkulupa weshi ndi fino nkasime. 7Ichino ngi wafukamila, fyoshi fyambwa ifyako.” 8Nga Yesu annena, wati: “Chaandikwe, fino, ufukamile uMwene Leesa wako, umombele wenga mpela.”

9Ankolelela uku Yelusalemu ambwika apa nsonje wa ng'anda-nkulu-iyi-Leesa, nga wannena, wati: “Ndi we Mwana wi Leesa, tumpuka apansi. 10Kuno chaandikwe: ‘Wankutumila yamalaika yaakwe yakusunge. 11Num-makasa yao yakukulema, kuti utakumika ikulu lyako apifinga.’ ” 12Yesu wannena, waati: “Chafwangwa fino utachesha uMwene Leesa wako.”

13Nga pano wamala insila shoshi isha kumwesha, Chiwa wapita, wansha uku kashimbo.

Yesu wakanwa uku Nazaleti.

(Mt 4:12-17; Mk 1:14-15)

14Nga Yesu wawela na maka ya Mweso, waya uku Galilea. Na maswi yaakwe yalimba isi shoshi isha mbali mbali. 15Nawe wasambilishanga um-mang'anda yao ayi Leesa, nu kuteshiwa na antu yoshi.

16Nga waya uku Nazaleti kuno wakulile nu wanda wa Sabato wingila un-ng'anda iyi Leesa, ndi fino wamanyilila, awimilila kuti asome. 17Yampa ichitabu chi lau Isaya, wakupula washita pano paandikwe vi:

18“Umweso wa Mwene uli ponga nene,

kuno wampaka amafuta,

ukuyumila apina imbila yi Iswi-sipe;

wantuma ukuyumila imbila yano yanyepwa

ukusapulwa kwao.

Napofu ukupiwa ukulola kaili,

nu kukulula yano yaonelwa.

19Nu kuyumila imbila

ya mwaka wa Mwene uno wasipa.”

20Akupika ichitabu, asuwisisha umbofi, nga wikala; na antu yoshi yano yalimo un-ng'anda iyi Leesa, yankundwila amanso. 21Atampa ukuyanena, wati: “Ilelo Amaandiko ya iyafikilila um-makutwi yino.” 22Yamsumilisha yoshi, yasunguka uku maswi masipe yano wafwanga, nga yafwanga ukuti: “Alawi asu mwana wi Yosefu?”

23Nawe wayanena, waati: “Umwenemo, mwannena ishenteko li: ‘Shing'anga auposhe wenkola. Ifintu fyoshi fino twapulika fino fyaombeka umu Kapenaumu, fichite nu munsi wa kumwino,’ ” 24Nga wafwanga, wati: “Umwenemo ndumunena, kushi ilau ukulusumilwa uku mwao. 25Leelo uku chumi, namunena, pali yano yafwilwa ainji un-nsi ya Islaeli um-manda yi Elia, pano iyulu lyayashilwe imyaka itatu ni myezi sita, insala inkulu yaponile isi yoshi. 26Elia atatumilwe nanti kuli umwi, siku ku mafwilwa wenga uwa ku Salepta, un-nsi ya Sidoni. 27Na kaili yalipo aya ntana ainji umwi Islaeli um-manda yilau Elisya, nga kusi wino waswefiwe, siku Naamani, uwa ku Silia.” 28Nga yoshi yano yali un-ng'anda yi Leesa yakalipa, pano yapulika ifintu fi. 29Nga yakatuka yansunkilisha ukutika yansi, yantwala uku lwema, kuno unsi wao ukushilwe wapiyulu, kuti yantenkele kweneko. 30Leelo wene wafyontoka muli yeneyo, wampita.

Yesu waposha aluale

(Mk 1:21-28)

31Atentenka ukuya um-Kapenaumu, unsi wa Galilea, angi aluyasambilisha apa wanda wa Sabato. 32Nga yasunguka leka uku masambilisho yaakwe, kuno iswi lyaakwe lyali na maka. 33Ngu un-ng'anda yi Leesa mwali untu wino wali ni chiwa ichiipe, wangula ukwiswi kulu, 34waati: “Leka nga tuli na chani newe Yesu wa ku Nazaleti? Uwisile ukwisa tonona? Nkumanyile we weni: We Nswefu wi Leesa.” 35Nga Yesu wachichensela, wati: “Tusha, ufume!” Nga apano ichiwa champonya apakasi yao, chafuma nanti kumchita chimwi. 36Yasunguka yoshi yafwangyanya, yaati: “Ichintu uli chi? Kuno alufwanga nkani na maka uku fiwa, nafyo filufuma.” 37Amaswi lyake yalimba koshi koshi unsi-nâsi iyo.

38Afuma un-ng'anda iyi Leesa, wawingila un-ng'anda yi Simoni. Na nyinafyala wi Simoni wali undwale insushi nkani, yanndombela kunali. 39Awimilila pipi nawe, wachensela insusi iyo, insila; liyo kwene wankatuka nu kuyaombela.

40Nga pano ilashi lyashutukila, yoshi yano yali nalwale ya ndwala tupu tupu, yayaleta kunali. Wawika makasa yaakwe kuli chila wenga, wayaposha. 41Ni fifa fyafumile uku yantu tupu, fyuma ichongo nu kuti: “Wewe uli Mwana wi Leesa!” Wafichensela fitachifwanga, kuno fimmanyile fino ali Klisto.

Unndimo wi Yesu

42Na pano kwacha, wafuma waya kuno kushi yantu. Na maumba yanshita, nga yaya kunali, yashita ukunndesha atachitina ukumwao. 43Leelo wayanena, waati: “Chindungime nkasunde Iswi-sipe ilya wene-wi-Leesa um-misi minina kwene, kuno ichino natumilwe.” 44Nga wasundaa um-mang'anda iyi Leesa aya uku Yudea.

Currently Selected:

Luka 4: FNT1988

Highlight

Copy