Milimo 12

Kufwa kwi Yakobo na Petlo unjela

1Apa manda yalye kwene umwene Yelodi akatusya makasa, alema yamwi pali yeneyo aya mwikongani, kuti ayachuzye. 2Aumola Yakobo, unnina na Yoane ni mpanga. 3Nga fino walola chazipila aYudea, awitukilila ukulema Petlo. Amanda yao yali amanda ya mikate-isi-ninsasyo. 4Nga pano wannema, anjalila uku nyololo, anena asalifi ikumi na sita, kuti yannolele, yani yani; wakasime ukuti pano iPasaka yasila, amfime nu kumwika pa yantu. 5Nga pano Petlo alulolelwa uku nyololo, ikongani lyannombelanga kuli Leesa nanti kutonta.

6Nga pano Yelodi wasita ukumfumya, usiku uo kwene Petlo wawizi apakasi ya asalifi yaili, angi anyefilwe ni minyololo iili, na yakalolela yali apa nnyango angi yalulolela ing'anda-ya-nyololo. 7Nga zuwa malaika wa Mwene awimilila penepo lwa pipi, umwengelela uswefya un-ng'anda, nga auma Petlo unduwazu annansya, ati: “Katuka suwa!” Liyo kwene minyololo impona uku makasa yaakwe. 8Nga malaika wannena, waati: “Unyepei myenda yako, uzwale ni vilatu vyako.” Nga pano wachita ndikuti fiyo kwene. Annena, ati: “Swala inkanjo yako, undondele.” 9Apano wafuma nu kunnondela, angi atamanyile ngi umwenemo ichintu chino chaombeka na malaika, kuno watangi kunde alulola amalele. 10Nga pano yachila yakalolela ya ntangulo na ya uwili, yapita apa nnyango wa chela uwakuila uku nzi, nao wayulika ukola. Yafumila apanzi, yapita umu nzila imwi, apano Malaika waatina nu kumsya.

11Nga Petlo pano umweso wawela, ati: “Fwandi nga namanya ningo fino Mwene atumile malaika waakwe uku nfyusya um-makasa yi Yelodi nu ku kusita kwa antu yao aYudea.”

12Pano achiliwelengula ifintu fiyo afika apa ng'anda yi Malia nyina wi Yoane, izina linina i Malko, umuno ainji yakonganile ukupepa. 13Pano wakong'onsya apa nkuli, awiza umuofi umwi ukupulikisya, izina lyaakwe i Loda. 14Nga pano wamanya iswi li Petlo, atachili ayule unnyango uku kuchimba, leelo aya zuwa, ayanena aya unkasi, fino Petlo awimilile apa nnyango. 15Nayo yannena, yaati: “Siku ukupena!” Leelo wene alemasya nkani, avwanga fino uwenewe. Yaati: “I malaika wakwe.” 16Petlo wala watengwa ukukong'onsya, yanjulila, yannola, yazunguka ndi. 17Ayasinizya ikasa, kuti yatuzye, nga wayalandila fino Mwene amfumizye un-nyololo, ati: “Kanenini Yakobo na anji amaswi ya.” Nga afuma aya ukunji.

18Nga pano kwacha asalifi yawa na masima nkani, yatamanyile kuno Petlo wataya.

19Nga pano Yelodi wansita, nanti kunnola, watondokesya yakalolela yao, alanda kuti yanyepwe. Nga apita ukufuma uku Yudea ukuya uku Kaisalia, ukuno awikala.

Yelodi wafwa

20Nawe Yelodi walile atayalakalikila nkani antu ya ku Tilo ni Sidoni. Apano yaya yoshi kunali ukumweeso onga, nga pano yapulikanya Blasto, wino wali kalolela wa mwene, yannombe yapulikane, kuno insi yao yapasile ivyakulya uku nsi ya mwene. 21Ngu wanda uno yasolwile, Yelodi azwala imyenda ya wene, awikala apa chisumbi cha wene, avwanga amaswi pano yali. 22Antu yumi chongo, yaati: “Iswi li Leesa, asi lya ntu!” 23Liyo kwene malaika wa Mwene amuma kuno atapile Leesa ukulu; aliwa ni ngonyo, umweso umputuka.

uMweso Nswefu waita Balanaba na Paulo

24Leelo iswi lya Mwene likula nu kulimba kwinji. 25Nga Balanaba na Saulo, lino yamala imilimo yao, yawela uku Yelusalemu, yasenda na Yoane wino yatangi Malko.

Currently Selected:

Milimo 12: FNT1988

Highlight

Copy