Milimo 11

Petlo aluufwangila apa milimo yaakwe

1Ngi mitume na chao yano yatenzi uku Yudea, yapulika fino akulukuwa nayo kwene iyapokelela iswi lyi Leesa.

2Nga Petlo pano wapisile ukuya uku Yelusalemu, yano yachitwa ichibalu yapazyanya nawe. 3Yaati: “Waile uku antu yano yatachisilwe ichibalu, walya nayo.” 4Leelo Petlo atampa ukuyalandila ukuyalolola ningo, ati: 5“Nali umunzi wa Yafa, ndupepa, umweso wane wapita akashe, indola amalele; ichivya chilwika wa mwenda nkulu chilwika ukufuma umwiyulu uku masempela yaakwe yani; changikila. 6Nachilolekesya nkani, nelengula, nalola inkala zya kuno ukunzi, izili na mulu yani, ni vikangu vya nchundu, ni vikulusela, ni vyuni fino vikulelemba. 7Napulika iswi lilunena, liluti: ‘Katuka Petlo, ufyule, ulye!’ 8Nene nati: ‘Awe Mwene, kuno ichintu chino chaipa nanti chino chaziliziwa chitachili chiye umu nnomo wane nanti uche.’ 9Iswi lyanena ilya uwili ukufuma umwiyulu, lyaati: ‘Vino Leesa wazilula, utachiti vyakulyikizya.’ 10Ichintu chi chachitika amaila yatatu; apalinji ifintu vyonsi vyaakweselwa kaili umwiyulu. 11Nga lolini, liyo kwene antu yatatu yimilila apa ng'anda muno twali, yano yatumwa kunondi ukufuma uku Kaisalia. 12uMweeso wannena ukuti ndondekana nayo nanti kopa. Alaya achane sita yapita ponga nene, twingila un-ng'anda ya ntu wiyo. 13Watulandila fino wawine malaika wino wimilile un-ng'anda umwakwe, wannena, waati: ‘Tuma antu yaye uku Yafa, yakite Simoni wino yakuluti: Petlo. 14Wino wankunena amaswi yano yankufyusya wewe ni ng'anda ko yoshi.’ 15Pano natampa ukuvwanga uMweeso Nswefu waikila ndi fino watwikile neswe apa ntangulo. 16Niusya iswi lilye ilya Mwene, fino wavwanzile, ati: ‘Umwenemo Yoane wabatishanga uku manzi, leelo mwemwi mulubatiziwa uku Mweso Nswefu.’ 17Ali ndi Leesa wayapa uwila wuwu kwene, ndi fino watupile sweswe, yano twazumila uMwene Yesu Klisto, nene wini wino mpingule Leesa?” 18Pano yapulika amaswi yao yatuzya, yatensya Leesa, yaati: “Fwandi Leesa watayapa akulukuwa nayo ukuvipela kuno kululeta upuma.”

Balanaba na Saulo yapita uku Antiokia

19Ichino yano yasambazile uku nnandu wa uchuzi uno wakatukile pali Stefano, yapisile yafika uku Foiniki nu ku Kiplo nu ku Antiokia. Yatasunzile apiswi liyo, siku uku aYudea sile.

20Leelo yamwi pali yeneyo yali antu ya ku Kiplo ni Kilene, nga wene pano yafika uku Antiokia, yavwanga na aGliki, angi yalusunda iswi-zipe lya Mwene Yesu. 21Ikasa lya Mwene lyawa ponga nayo, antu tupu yazumila yaseleukila uku Mwene.

22Impwepwe zya antu yao zipulikikwa uku makutwi yi kanisa lya ku Yelusalemu. Yatuma Balanaba ukuti aye uku Antiokia. 23Nawe pano waya nu kulola inkumbu zyi Leesa, achimba, ayachinchizya yoshi yalemane nu Mwene uku kukunda kwa mweso. 24Kuno wali ntu nzipe wazyula uMweeso Nswefu nusumilo. Niumba ikulu lyungiliziwa uku Mwene. 25Nga atina kweneko aya uku Talso ukusita Saulo. Na pano wannola, anneta uku Antiokia. 26Nga uku mwaka mpuma yakonganaa ponga ni kanisa nu kusambilizya antu tupu. Na alondeshi apano yatangwile ukwitwa. “Aklisto” apa Antiokia.

27Amanda yao kwene amalau yapisile ukufuma um-Yelusalemu, yaya uku Antiokia. 28Wenga pali yeneyo, izina lyaakwe i Agabo, awimilila, alauzya uku maka ya Mweso Nswefu, fino inzala inkulu ilupona insi yoshi. Nayo yalolike apa manda yi Kalaudio. 29Nga alondeshi yao yasolola ukwazwilizya anina yao yano yatenzi uku Yudea, ukulingana na maka yi chila ntu. 30Yachita ndikuti fiyo kwene, yatwalila ayikolo uku makasa yi Balanaba na Saulo.

Currently Selected:

Milimo 11: FNT1988

Highlight

Copy