Milimo 13

1Nu mwi kanisa uku Antiokia kwali amalau na yakasambilisha, nayo i Balanaba na Simeoni, wino yatangi Nigeli na Lusio wa ku Kilene, na Manaeni, wino yonkile iyele lyonga nu mwene Yelodi, na Saulo.

2Pano yalupepa uMwene nu kuzilizya ivyakulya, Mweso Nswefu waati: “Mpalwilini Balanaba na Saulo uku nnimo uno njitile.” 3Nga pano yaluzilizya ukulya nu kupepa, yayawikila makasa apa mitwe yao, nga yayata, kuti yapite.

Mitume yasunda uku Kiplo.

4Nga antu yao, pano yatumwa nu Mweso Nswefu, yapita ukuya uku Seleukia, ukuno yaakwela uwato ukuya uku Kiplo. 5Nga pano yali uku Salami, yasunda amaswi yi Leesa un-ng'anda zyi Leesa izya aYudea. Yoane wali ponga nayo, angi aluyaombela.

6Yapita apakasi um-mânda yoshi, yafika uku Pafo, yazana unnozi umwi, kalauzya wa ufi, mYudea, izina lyaakwe i Ba-Yesu. 7Untu wiyo wali pipi nu nnâsi Segio Paulo, untu wa mano. Nga unnâsi wita Balanaba na Saulo yize kunali, asita ukupulika iswi li Leesa. 8Leelo Elima unnozi wiyo, izina lyaakwe ndi lyasenulwa—apazyana nayo, asita ukuti azozye unnâsi wiyo, ukuti ate usumilo wa mweso wakwe. 9Leelo Saulo, nawe uli Paulo, azyula Mweso Nswefu, ankundwila maaso, 10ati: “We wazyula uchenjezu nuipe onsi, mwana wi Chiwa, siluembu wa chumi chonsi, utaluta ukunyonganika inzila zya Mwene zino zyololwike? 11Nga lola, ikasa lya Mwene lili panuli ukukuma, newe wampofula utachilola ilanzi uku manda yamwi.” Liyo kwene apofula, ichanda chimkupila, apalapasya nu kusita untu wa kunnema ikasa nu kumkolelela. 12Ngu nnâsi wiyo pano walola chino chaombeka, asumila, azunguka uku masambilisho ya Mwene.

Balanaba na Paulo uku Antiokia Pisidia

13Nga Paulo na chakwe yaakwela uwato, yafuma uku Pafo, yafika uku Pelge um-Pamfilia. Yoane wayasya, wawela uku Yelusalemu.

14Leelo wene yaatina uku Pelge, yafika uku Antiokia, unzi wa Pisidia. Uwanda wa Sabato yingila un-ng'anda iyi Leesa, yikala mwenemo. 15Nga pano yasoma Ntambi ni chitabu cha malau, ayikolo ya ng'anda yi Leesa yatuma untu kuno yali, ayanena, ati: “Yachitu, ngi muli niswi lya kuzipila antu ya, vwangini.” 16Apano Paulo awimilila wayasonizya, ati: “Mwe yatata ya mwIslaeli, nemwe yano mwachindika Leesa, pulikisyini. 17Leesa wa antu ya Islaeli wasolwile yatata itu, ayakuzya antu yao, pano yikalanga wa yeni un-nsi ya Misili. Nga kaili akatusya ikasa lyaakwe, ayafumya nu kuyakolelela. 18Imyaka amakumi yani angi ali ni chelelezi kuno yali undusanga. 19Nga pano wonona inko saba un-nsi ya Kanani, ayapa insi yao kuti yapyanile. 20Uku myaka imyanda inni na makumi yasano pa chisila cha ifintu vi ayapa aputuzi ukufika na manda yi Kalauzya Samweli. 21Pano yasita umwene, Leesa ayapa Sauli umwana wi Kisi, untu wa luko lwi Benyamini, uku myaka amakumi yani. 22Na lino waatisya wiyo, akatusya Daudi uwino awe umwene wao, nawe uwino wamwimikile, ati: ‘Nalola Daudi umwana wi Yese, untu wino anzipile uku mweso wane, wino aluchita vyonsi fino nkasime.’ 23Umwikwata lyaakwe wiyo, Leesa waletela aIslaeli Unkuluzi Yesu, ndi fino wayalainye. 24Lino achili awize kuno yali, Yoane walile wasunda ulubatizyo lya kuvipela, kuli yoshi ya mwIslaeli. 25Yoane nawe pano wamala manda yaakwe, avwanga, ati: ‘Mulungelengula fino nene wini? Nene insi wenewe; leelo lolini, alwiza umwi uku chisila chane, wino ntalingine nu kusapula imikowa ya nfwato zya ku mulu yaakwe.’

26“Yachane, ana yikwata li Ablaamu, nemwe yano mwachindika Leesa, iswi lya ufyusi lyatumilwe ukwiza kuno tuli sweswe. 27Kuno yano yatenzi uku Yelusalemu na ikolo yao yatamanyile wiyo, leelo amaswi ya malau yano yalusomwa chila wanda wa Sabato, yayafikilizya uku kumputwila ukufwa. 28Nanti fino yatawine unnandu wa kumumola, leelo yalomvile kuli Pilato, kuti yamumole. 29Nga pano yamala vyonsi fino waandikilwe, yamwisya uku chiti chiyo, yamwika umwilindi. 30Leelo Leesa wamtutulwile uku yafwi. 31Aloleka amanda tupu kuli yano yapisile nawe ukufuma uku Galilea fika nu ku Yelusalemu, yano uku kasalaka ali yasyuta yaakwe apa maaso ya antu. 32Neswe tulumsunda iswi-zipe lya ulanyo ulye kwene, uno yatata yapilwe. 33Vino Leesa wayafikilizizye ana itu ulanyo uo, kuno watutulula Yesu ndi fino chaandikwe un-Sabuli ya uwili:

‘Wewe uli mwanane,

nene ilelo nakuvyala.’

34Na kaili fino wamtutulwile uku yafwi, kuti atawelela ukuola, avwanzile, ati:

‘Mwemwe namupa ifintu viswepe

ivyi Daudi ivya kutailwa.’

35Ichino avwanzile na panina, ukuti:

‘Utaluleka unswepe wako aole.’

36Kuno Daudi waombelanga Leesa ningo apa manda yaakwe, pa mpanda wakwe, walala undufu, azyikwa ponga na yaisi, wazana ukuola. 37Leelo wino watutulwilwe na Leesa, atatana zane ukuola. 38Ichino chimanyike kuli mwemwe yachane, fino kuli wiyo mulusundwa uwelelo wa maifyo. 39Na kaili kuli wenewe wino azumile akulwalilwa ichumi uku ifintu vyonsi fino atangi awalilwe ichumi uku Ntambi yi Mose. 40Ichino fiyo chenjelini mwemwe, vitamwizila fino vyandikwe na malau:

41‘Lolini mwe yano mulusula,

zungukini mulowe;

kuno nduomba nene unnimo

apa manda ino,

unnimo uno mutali muuzumile nanti uche,

nantu ntu angalandisya kuno muli.’ ”

42Nga pano yafumanga yayalomba, kuti kuche yasome kaili amaswi ya wanda wa Sabato unina. 43Nga pano yano yali un-ng'anda yi Leesa yasansantika, aYudea na alondeshi yao, yano yachindika Leesa, yalondekana na Paulo na Balanaba, yano pano yavwanga nayo, yayachinchizya, kuti yalande un-nkumbu zyi Leesa.

44Uwanda wa Sabato wa uwili antu tupu kwela unzi wonsi yakongana, yapulika iswi lyi Leesa. 45Leelo aYudea pano yalola maumba, yazyula uzuwa, yakana maswi yano yavwanzilwe na Paulo, angi yalupazya nu kusula. 46Leelo Paulo na Balanaba yavwanga uku chiposye, yaati: “Chalingine kuti iswi li Leesa litane lilandwe kuno muli; leelo kuno mwalitenkela ukutali, nu kuulola fino mutaine nupuma wa manda ti, lolini, twaseleukila uku akulukuwa. 47Kuno ifino utunenwa nu Mwene, ukuti:

‘Nakuwika uwe mwengelela wa antu yakulukuwa,

kuti uwe wa ufyusi fika na kuno insi yapela.’ ”

48Akulukuwa pano yapulika ifintu vi, yachimba, yatensya iswi lya Mwene; na yoshi yano yateyanyiwa upuma wa manda ti, yasumila. 49Iswi lya Mwene lyalimba insi ilye yoshi.

Yapita uku Ikonio ni Listela ni Delebe

50Leelo aYudea yatuwanya anachi yachindamu yano yachindika Leesa, na ikolo ya nzi, yasongelekanya antu, kuti yachuzye Paulo na Balanaba, yayaatisya muli lwato wao. 51Nayo yakung'unta inkungu ya ku mulu yao, yapita uku Ikonio. 52Na londeshi yashula ukuchimba na Mweso Nswefu.

Currently Selected:

Milimo 13: FNT1988

Highlight

Copy